(ព្រះវិហារ)៖ ប្រធានរតនាគារថ្មីខេត្តព្រះវិហារ ត្រូវបានប្រកាសចូលកាន់តំណែងជាផ្លូវការ នៅព្រឹកថ្ងៃទី១៨ ខែឧសភា ឆ្នាំ២០២៦ ដោយលោក ជា សុជាតិ ជំនួសលោក អ៊ាង វណ្ណថា ដែលបានចូលនិវត្តន៍។

ពិធីប្រកាសចូលកាន់តំណែងនេះ ប្រព្រឹត្តទៅក្រោមវត្តមានលោក វ៉ាន់ ពុទ្ធិពល អនុរដ្ឋលេខាធិការ ក្រសួងសេដ្ឋកិច្ច និងហិរញ្ញវត្ថុ តំណាងលោកអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងលោក ប្រាក់ សុវណ្ណ ប្រធានក្រុមប្រឹក្សាខេត្ត លោក គីម រិទ្ធី អភិបាលខេត្តព្រះវិហារ ព្រមទាំងថ្នាក់ដឹកនាំ មន្ត្រីរាជការ អាជ្ញាធរក្រុង ស្រុក និងអង្គភាពពាក់ព័ន្ធជាច្រើនទៀត។

នៅក្នុងឱកាសនោះ លោក វ៉ាន់ ពុទ្ធិពល បានថ្លែងកោតសរសើរ និងវាយតម្លៃខ្ពស់ចំពោះលោក អ៊ាង វណ្ណថា និងមន្ត្រីរតនាគារខេត្តទាំងអស់ ដែលបានខិតខំបំពេញតួនាទី និងភារកិច្ចក្នុងការគ្រប់គ្រងហិរញ្ញវត្ថុសាធារណៈ ជូនរដ្ឋបាលខេត្ត និងមន្ទីរ-អង្គភាពនានា បានយ៉ាងមានប្រសិទ្ធភាព និងទទួលបានលទ្ធផលល្អប្រសើរ នាពេលកន្លងមក។

ជាមួយគ្នានេះ លោកអនុរដ្ឋលេខាធិការ បានណែនាំលោក ជា សុជាតិ ប្រធានថ្មីរតនាគារខេត្ត ត្រូវបន្តពង្រឹងសាមគ្គីភាពផ្ទៃក្នុងអង្គភាព បង្កើនកិច្ចសហការល្អជាមួយរដ្ឋបាលខេត្ត និងមន្ទីរ-អង្គភាពជុំវិញខេត្ត ដើម្បីធានាបាននូវតម្លាភាព គណនេយ្យភាព និងប្រសិទ្ធភាពក្នុងការគ្រប់គ្រងថវិកាជាតិ ស្របតាមកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈរបស់រាជរដ្ឋាភិបាល។

ដោយឡែកលោក គីម រិទ្ធី អភិបាលខេត្តព្រះវិហារ បានបង្ហាញការគាំទ្រ និងស្វាគមន៍ចំពោះការចូលកាន់តំណែងរបស់លោក ជា សុជាតិ ដោយចាត់ទុកថា ជាកម្លាំងបន្ថែមដ៏សំខាន់សម្រាប់ការងារគ្រប់គ្រងហិរញ្ញវត្ថុសាធារណៈ នៅថ្នាក់ខេត្ត។

លោកអភិបាលខេត្ត បានថ្លែងទៀតថា រតនាគារខេត្ត គឺជាសរសៃឈាមដ៏សំខាន់ក្នុងការគាំទ្រដល់ការអនុវត្តការងាររដ្ឋបាល និងការអភិវឌ្ឍនៅមូលដ្ឋាន។ ដូច្នេះការគ្រប់គ្រងហិរញ្ញវត្ថុប្រកបដោយតម្លាភាព ប្រសិទ្ធភាព និងការទទួលខុសត្រូវខ្ពស់ គឺជាកត្តាចាំបាច់ដែលត្រូវយកចិត្តទុកដាក់បំផុត។

លោក គីម រិទ្ធី បានថ្លែងជំរុញឱ្យថ្នាក់ដឹកនាំ និងមន្ត្រីរតនាគារខេត្តទាំងអស់ បន្តរក្សាសាមគ្គីភាពផ្ទៃក្នុង បំពេញការងារដោយវិជ្ជាជីវៈ និងសហការជិតស្និទ្ធជាមួយរដ្ឋបាលខេត្តដើម្បីធានាដល់ការប្រើប្រាស់ថវិកាជាតិឱ្យមានប្រសិទ្ធភាព ខ្ពស់ និងឆ្លើយតបទៅនឹងតម្រូវការអភិវឌ្ឍរបស់ប្រជាពលរដ្ឋនៅមូលដ្ឋាន៕