(ព្រះវិហារ)៖ លោក ឃិត សុធារ៉ា អភិបាលស្រុកឆែប និងជាប្រធានកិត្តិយសអនុសាខាកាកបាទក្រហមកម្ពុជាសុក តំណាងលោក គីម រិទ្ធី អភិបាលខេត្តព្រះវិហារ និងជាប្រធានគណៈកម្មាធិការសាខាកាកបាទក្រហមកម្ពុជាខេត្ត នៅថ្ងៃទី១៨ ខែឧសភា ឆ្នាំ២០២៦ បានដឹកនាំក្រុមការងារ ចុះសួរសុខទុក្ខ និងនាំយកអំណោយមនុស្សធម៌របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ប្រគល់ជូនប្រជាពលរដ្ឋ ០១គ្រួសារ ដែលរងគ្រោះដោយអគ្គិភ័យឆេះផ្ទះ ស្ថិតនៅភូមិបុស្ស ឃុំម្លូព្រៃពីរ ស្រុកឆែប ខេត្តព្រះវិហារ។

នៅក្នុងឱកាសនោះ លោក ឃិត សុធារ៉ា បានថ្លែងពាំនាំនូវប្រសាសន៍ផ្តាំផ្ញើសាកសួរសុខទុក្ខ និងក្តីអាណិតអាសូរពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងលោក គីម រិទ្ធី អភិបាលខេត្តព្រះវិហារ និងជាប្រធានគណៈកម្មការសាខាកាកបាទក្រហមកម្ពុជាខេត្ត ជូនចំពោះគ្រួសាររងគ្រោះ ដែលបានជួបហេតុការណ៍ដ៏សោកស្តាយនេះ ព្រមទាំងថ្លែងលើកទឹកចិត្តឱ្យក្រុមគ្រួសារខិតខំតស៊ូជំនះការលំបាក និងបន្តប្រកបរបរចិញ្ចឹមជីវិតឡើងវិញ។

អំណោយមនុស្សធម៌ដែលបានប្រគល់ជូនរួមមាន៖ អង្ករ ២៥គីឡូក្រាម តង់ចំនួន០១ ទឹកសុទ្ធ០១កេស មី០១កេស មុង ភួយ កន្ទេល សារ៉ុង ទឹកត្រី ទឹកស៊ីអ៉ីវ ត្រីខ និងសម្ភារៈប្រើប្រាស់មួយចំនួនផ្សេងទៀត ព្រមទាំងថវិកាមួយចំនួន ដើម្បីជួយសម្រួលដល់ជីវភាពរស់នៅបឋមរបស់គ្រួសាររងគ្រោះ។

សូមបញ្ជាក់ថា គ្រោះអគ្គិភ័យនេះ បានកើតឡើងកាលពីថ្ងៃទី១៦ ខែឧសភា ឆ្នាំ២០២៦ វេលាម៉ោង ៩៖៤៥នាទីយប់ លើផ្ទះរបស់លោក មាស បូរី ជានាយកសាលាបឋមសិក្សា និងភរិយា ឈ្មោះ ឡាច សាម៉េន មុខរបរកសិករ ដោយបានឆាបឆេះផ្ទះឈើប្រក់សុីប្រូ ទំហ៊ំ៨ម៉ែត្រគុណ១៤ម៉ែត្រ និងសម្ភារៈប្រើប្រាស់អស់ទាំងស្រុង ដែលមូលហេតុនៃគ្រោះអគ្គិភ័យនេះ គឺបណ្តាលមកពីទុស្សេខ្សែភ្លើង៕