(ភ្នំពេញ)៖ ក្រសួងព័ត៌មាន​ នាល្ងាចថ្ងៃទី១៨ ខែឧសភា ឆ្នាំ២០២៦ បានផ្តល់លិខិតសរសើរដល់បណ្តាញព័ត៌មាន Fresh News «អ្នកនាំសារពិត» ដែលចូលរួមយ៉ាងសកម្មក្នុងយុទ្ធនាការ «និយាយថាទេចំពោះព័ត៌មានក្លែងក្លាយ» ជំហានទី២​ ក្រោមប្រធានបទ «ពង្រឹងអក្ខរកម្មព័ត៌មាន និងប្រព័ន្ធផ្សព្វផ្សាយដើម្បីសុវត្ថិភាពព័ត៌មាន»។

ការប្រគល់លិខិតសរសើរនេះបានធ្វើឡើងក្នុងពិធីបើកកិច្ចប្រជុំតម្រង់ទិសស្តីពីការអនុវត្តយុទ្ធនាការ «និយាយថាទេចំពោះព័ត៌មានក្លែងក្លាយ» ជំហានទី២ ក្រោមអធិបតីភាពលោក នេត្រ ភក្ត្រា រដ្ឋមន្រ្តីក្រសួងព័ត៌មាន នៅសាលចតុម្មុខមង្គល នៃទីស្តីការក្រសួងព័ត៌មាន។

លិខិតសរសើរដែលចុះហត្ថលេខាដោយរដ្ឋម​ន្ត្រី នេត្រ ភក្ត្រា បានសរសេរយ៉ាងដូច្នេះថា៖ «សូមកោតសរសើរ និងវាយតម្លៃខ្ពស់ចំពោះការចូលរួមក្នុងយុទ្ធនាការ «និយាយថាទេចំពោះព័ត៌មានក្លែងក្លាយ ជំហានទី២​​​​» យុទ្ធនាការនេះមានគោលបំណងពង្រឹងអក្ខរកម្មព័ត៌មាន និងប្រព័ន្ធផ្សព្វផ្សាយ ដើម្បីធានាសុវត្ថិភាពព័ត៌មាន ក្នុងគោលដៅជំរុញឱ្យប្រជាពលរដ្ឋ ជាពិសេសយុវវ័យទទួលបានព័ត៌មានពិត ត្រឹមត្រូវ និងអាចជឿទុកចិត្តបានព្រមទាំងមានសមត្ថភាព ការពារខ្លួនពីផលប៉ះពាល់អវិជ្ជមាននៃបច្ចេកវិទ្យា និងគ្រោះថ្នាក់នៃព័ត៌មានក្លែងក្លាយ»។

បណ្ដាញព័ត៌មាន Fresh News បានចូលរួមយ៉ាងសកម្មក្នុងការផ្សព្វផ្សាយសារអប់រំអំពីការទទួលបានព័ត៌មានពិត​ មានប្រភពផ្លូវការ​ជាប្រចាំថ្ងៃ ដើម្បីរួមចំណែកជាមួយក្រសួងព័ត៌មាន និងរាជរដ្ឋាភិបាល ក្នុងការប្រយុទ្ធប្រឆាំងព័ត៌មានក្លែងក្លាយនៅកម្ពុជា ជាពិសេសយុទ្ធនាការប្រយុទ្ធប្រឆាំងព័ត៌មានក្លែងក្លាយលើកទី១ រហូតដល់យុទ្ធនាការលើកទី២ ដែលបានចាប់ផ្តើមបើកជាផ្លូវការនៅថ្ងៃតី១៨ ខែឧសភា ឆ្នាំ២០២៦នេះ ដោយធ្វើដំណើរចេញពីរាជធានីភ្នំពេញ។

លោក លឹម ជាវុត្ថា ស្ថាបនិក និងជាអគ្គនាយកបណ្ដាញព័ត៌មាន Fresh News បានថ្លែងអំណរគុណដល់ក្រសួងព័ត៌មាន ក៏ដូចជារាជរដ្ឋាភិបាល ចំពោះការផ្តល់លិខិតសរសើរដល់ Fresh News ហើយបណ្តាញព័ត៌មាន Fresh News នៅតែបន្តប្តេជ្ញាចិត្ត ចូលរួមជាមួយរាជរដ្ឋាភិបាលក្នុងផ្សព្វផ្សាយព័ត៌មានពិត សមិទ្ធផលដែលរាជរដ្ឋាភិបាលសម្រេចបានក្នុងបុព្វហេតុជាតិ មាតិភូមិ និងការអភិវឌ្ឍលើគ្រប់វិស័យ ដើម្បីចូលរួមចំណែកទប់ស្កាត់ព័ត៌មានក្លែងក្លាយនៅកម្ពុជា»៕