(ភ្នំពេញ)៖ ក្រសួងឧស្សាហកម្មលើកកម្ពស់ស្តង់ដា និងសុវត្ថិភាពឧបករណ៍ឧស្សាហកម្មក្នុងរោងចក្រ និងសិប្បកម្ម តាមរយៈការសហការជាមួយក្រុមហ៊ុន តេ ហ្សុង (Te Zhong Shebei Jiance Yanjiu Yuan Cambodia Co., Ltd.) រៀបចំសិក្ខាសាលាផ្សព្វផ្សាយស្តីពីការអនុវត្តអនុស្សរណៈនៃការយោគយល់ ស្តីពីការផ្តល់វិញ្ញាបនបត្របញ្ជាក់លក្ខណៈបច្ចេកទេស និងសុវត្ថិភាពសម្រាប់ឧបករណ៍ និងម៉ាស៊ីនដែលមានហានិភ័យនៅក្នុងរោងចក្រ និងសិប្បកម្ម។

សិក្ខាសាលាបានប្រព្រឹត្តទៅក្រោមអធិបតីភាព លោកបណ្ឌិត ទឹង ស៊ីនី រដ្ឋលេខាធិការ ដោយមានការចូលរួមពីថ្នាក់ដឹកនាំ បុគ្គលិក និងមន្ត្រីរាជការក្រសួង មន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ព្រមទាំងតំណាងសមាគម ក្រុមហ៊ុន រោងចក្រ សហគ្រាស និងសិប្បកម្ម សរុបជាង ៣០០ នាក់។

សិក្ខាសាលានេះមានគោលបំណងពង្រឹងការយល់ដឹង និងការអនុវត្តការគ្រប់គ្រងលក្ខណៈបច្ចេកទេស និងសុវត្ថិភាពឧស្សាហកម្មសម្រាប់ឧបករណ៍ ដូចជាឡចំហាយ ធុងផ្ទុកសម្ពាធខ្ពស់ និងឧបករណ៍ដែលមានហានិភ័យនៅក្នុងរោងចក្រ និងសិប្បកម្ម ឱ្យស្របតាមច្បាប់ស្តីពីការគ្រប់គ្រងរោងចក្រ និងសិប្បកម្ម។

ជាមួយគ្នានេះ លោក ផែ ច័ន្ទត្រាវុឌ្ឍ អគ្គនាយកឧស្សាហកម្ម មានប្រសាសន៍ថា បានបញ្ជាក់ថាការរីកចម្រើនក្នុងវិស័យឧស្សាហកម្ម កម្មមន្តសាល រួមមានឧស្សាហកម្មផលិតសម្លៀកបំពាក់ ជើងស្បែក, វិស័យអគ្គិសនី-អេឡិចត្រូនិក, ការផលិតកង់ និងកង់ម៉ូតូ, ការផលិតកង់ឡាន និងគ្រឿង បន្លាស់, និងការកែច្នៃកសិកម្ម កាន់តែមានសន្ទុះកើនឡើងជាលំដាប់។

លោកបន្តថា «យើងនឹងជួបបញ្ហាប្រឈមមួយចំនួន បង្កជាប៉ះ ពាល់បរិស្ថាន និងសុវត្ថិភាពឧស្សាហកម្ម ដែលបណ្តាលមកពីការធ្វេសប្រហែស និងការប្រើប្រាស់ឧបករណ៍គ្រឿងចក្រគ្រឿងម៉ាស៊ីន មិនមានស្តង់ដារបទដ្ឋានបច្ចេកទេស និងការត្រួតពិនិត្យឱ្យបានត្រឹមត្រូវ។ ដូច្នេះថ្ងៃនេះក្រសួង ឧ.វ.ប.ន បាន រៀបចំសិក្ខាសាលាផ្សព្វផ្សាយពីការអនុវត្តអនុស្សរណៈយោគយល់គ្នា រវាងក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងក្រុមហ៊ុន តេ ហ្សង ស៊ីប៉ី ជានស៊ី យ៉ាន ជីវ យ័ន (ខេមបូឌា) ក៏ដូចជាការអនុវត្តប្រកាសស្តីពីការ ផ្តល់វិញ្ញាបនបត្របញ្ជាក់លក្ខណៈបច្ចេកទេស និងសុវត្ថភាពនៃដំណើរការ ឧបករណ៍គ្រឿងចក្រ គ្រឿងម៉ាស៊ីនដែល មានហានិភ័យក្នុងរោងចក្រ និងសិប្បកម្ម ដើម្បីកាត់បន្ថយផលប៉ះពាល់ និងការពារគ្រោះថ្នាក់ដែលកើតមានឡើង ជាយថាហេតុ»។

បើតាមលោក ផែ ច័ន្ទត្រាវុឌ្ឍ នៅកម្ពុជាមានរោងចក្រធុនធំដំណើរការមានចំនួន ៣,០៨៣ រោងចក្រ កើនឡើងចំនួន ៦៥៨ រោងចក្រ ស្មើនឹង ២៧.១៣% បើធៀបទៅនឹងឆ្នាំ២០២៤។ កម្លាំងពលកម្មសរុបមានចំនួន ១,២៦៨,៩៥៣ នាក់ ក្នុង នោះមានស្ត្រីចំនួន ៩០៣,៩៩១នាក់ ស្មើនឹង ៧១.២៤% នៃកម្លាំងពលកម្មសរុប មានការកើនឡើងចំនួន ១០៨,៧៧២នាក់ ស្មើនឹង ៩.៣៨% បើធៀបទៅនឹងឆ្នាំ២០២៤។ ទុនវិនិយោគសរុបមានចំនួន ២៥,១៦៨ លាន ដុល្លារអាមេរិក មានការកើនឡើងចំនួន ៤,៧១១ លានដុល្លារអាមេរិក ស្មើនឹង ២៣.០៣% បើធៀបទៅនឹងឆ្នាំ ២០២៤។ ទុនវិនិយោគក្នុងស្រុកមានចំនួនជាង ៣,៩០៦ លានដុល្លារអាមេរិក ស្មើនឹង ១៥.៥២% នៃទុនវិនិយោគសរុប ហើយសហគ្រាសធុនតូច មធ្យមនិងសិប្បកម្មក៏មានការរីកចម្រើន និងកើនឡើងជាបន្តបន្ទាប់៕