(កែប)៖ លោក ហ៊ួរ មិថុនា អភិបាលរងខេត្ត តំណាងលោកបណ្ឌិត សោម ពិសិដ្ឋ អភិបាលខេត្តកែប បាននាំយកថវិកាមួយចំនួន របស់លោកឧបនាយករដ្ឋមន្រ្តី សាយ សំអាល់ ប្រធានក្រុមការងាររាជរដ្ឋាភិបាលចុះមូលដ្ឋានខេត្តកែប ជូនក្រុមគ្រួសារសព ក្នុងឧបទ្ទវហេតុលិចទូកស្មាច់នៅសមុទ្រ ក្នុងភូមិសាស្ត្រ នៃភូមិអូរក្រសារ សង្កាត់អូរក្រសារ ក្រុងកែប ខេត្តកែប កាលពីរសៀលថ្ងៃទី១៧ ខែឧសភា ឆ្នាំ២០២៦។

ទន្ទឹមនេះ លោកឧបនាយករដ្ឋមន្រ្តី ក៏បានរ៉ាប់រងលើការចំណាយផ្សេងៗ ក្នុងកម្មវិធីបុណ្យសពទាំងមូលផងដែរ។

តាមលោក ឃន វុទ្ធី អភិបាលក្រុងកែប បានប្រាប់ Fresh News ឲ្យដឹងថា មកដល់ព្រឹកថ្ងៃទី១៨ ខែឧសភា ឆ្នាំ២០២៦ វេលាម៉ោង៧៖៣៥នាទីព្រឹក សពម្តាយ និងកូនៗ ៣នាក់ ត្រូវបានរកឃេីញ នៅទីតាំងផ្សេងៗគ្នា ក្នុងសមុទ្រ ស្ថិតនៅភូមិអូរក្រសារ សង្កាត់អូរក្រសារ ក្រុងកែប។

លោកអភិបាលក្រុង បញ្ជាក់ទៀតថា នេះជាករណីលិចទូកយ៉ កាលពីថ្ងៃទី១៧ ខែឧសភា ឆ្នាំ២០២៦ ក្រោយពីត្រឡប់មកពីរាវង៉ាវ នៅមុខឃ្លួងព្រែកសរសៀរ ក៏បណ្តាលឲ្យលិចទូកយ៉ខាងលើ ហើយក្នុងទូកមានមនុស្សចំនួន ៤នាក់ រួមមាន ឪពុក ម្តាយ និងកូនៗ។

ជនរងគ្រោះ រួមមាន៖ ឈ្មោះ រស់ សាម ភេទ ប្រុស អាយុ ៤០ឆ្នាំ នៅរស់ត្រូវជាឪពុក ឈ្មោះ ណាំ ធារី ហៅក្មេក ភេទស្រី អាយុ៣៨ឆ្នាំ (ស្លាប់)ឈ្មោះ សុខ បូរ៉ា ភេទប្រុស អាយុ១០ឆ្នាំ (ស្លាប់) និងឈ្មោះ សុខ បូរិន ភេទប្រុស អាយុ៨ឆ្នាំ (ស្លាប់) ហើយអ្នកទាំងអស់ខាងលេី រស់នៅភូមិ សង្កាត់កើតហេតុខាងលើ។

ក្រោយពីសមត្ថកិច្ច និងអាជ្ញាធរពាក់ព័ន្ធ បាននាំយកសាកសពជនរងគ្រោះ មកតម្កល់នៅគេហដ្ឋានគ្រួសារជនរងគ្រោះខាងលើ គឺអភិបាលក្រុងកែប ក្រោមការណែនាំរបស់លោកបណ្ឌិត សោម ពិសិដ្ឋ អភិបាលខេត្តកែប បានចុះរំលែកទុក្ខដ៏ក្រៀមក្រំ និងចូលរួមធ្វើបុណ្យតាមប្រពៃណីជាតិ។

គួររំលឹកថា ប៉ុន្មានថ្ងៃកន្លងមកនេះ លោកបណ្ឌិត សោម ពិសិដ្ឋ អភិបាលខេត្តកែប បានប្រកាសណែនាំដល់ប្រជានេសាទ ដែលប្រកបរបររកស៊ីនៅសមុទ្រ ត្រូវប្រុងប្រយ័ត្នខ្ពស់ ពាក់ព័ន្ធនឹងអាកាសធាតុ ចាប់ពីថ្ងៃទី១៨ ខែឧសភា នេះតទៅ ដែលបណ្ដាលឲ្យមានភ្លៀងធ្លាក់ ខ្យល់កន្ត្រាក់ និងមានព្យុះជាដើម៕