(ស្ទឹងត្រែង)៖ នៅល្ងាចថ្ងៃទី១៨ ខែឧសភា ឆ្នាំ២០២៦ លោក សរ សុពុត្រា អភិបាលខេត្តស្ទឹងត្រែង រួមជាមួយថ្នាក់ដឹកនាំមន្ទីរទេសចរណ៍ខេត្ត អាជ្ញាធរក្រុងស្ទឹងត្រែង និងមន្ត្រីពាក់ព័ន្ធជាច្រើន បានអញ្ជើញទទួលស្វាគមន៍ក្បួនរថយន្តទេសចរណ៍អន្តរជាតិ Caravan Tour កម្ពុជា-ចិន ដែលបានធ្វើដំណើរឆ្លងកាត់ខេត្តស្ទឹងត្រែង ដើម្បីបន្តដំណើរឆ្ពោះទៅប្រទេសចិន តាមរយៈច្រកទ្វារអន្តរជាតិត្រពាំងក្រៀល (កម្ពុជា-ឡាវ)។

ព្រឹត្តិការណ៍នេះបានបង្ហាញពីសារៈសំខាន់របស់ខេត្តស្ទឹងត្រែង ក្នុងនាមជាច្រកភ្ជាប់សេដ្ឋកិច្ច និងទេសចរណ៍អន្តរជាតិ ក្នុងតំបន់អនុតំបន់មេគង្គ-ឡានឆាង ដែលកំពុងក្លាយជាគោលដៅចម្បងសម្រាប់ដំណើរទេសចរណ៍ឆ្លងប្រទេស។ ក្បួនរថយន្ត Caravan Tour កម្ពុជា-ចិន នេះ គឺជាផ្នែកមួយនៃកម្មវិធី «Mekong-Lancang River FAM-Trip Discovery» ដែលមានគោលបំណងផ្សព្វផ្សាយសក្តានុពលទេសចរណ៍ តភ្ជាប់បណ្តាប្រទេសក្នុងតំបន់ និងលើកកម្ពស់កិច្ចសហប្រតិបត្តិការអន្តរជាតិឲ្យកាន់តែរឹងមាំ។

ក្នុងឱកាសនោះ លោក សរ សុពុត្រា បានបញ្ជាក់ថា ការមកដល់នៃក្បួនរថយន្តទេសចរណ៍អន្តរជាតិមួយនេះ គឺជាភស្តុតាងបង្ហាញពីស្ថេរភាពសន្តិសុខ សុវត្ថិភាព និងសមត្ថភាពទទួលភ្ញៀវទេសចររបស់ខេត្តស្ទឹងត្រែងក៏បានលើកឡើងពីការខិតខំប្រឹងប្រែងរបស់អាជ្ញាធរខេត្ត ក្នុងការអភិវឌ្ឍហេដ្ឋារចនាសម្ព័ន្ធ និងសេវាកម្មទេសចរណ៍ ដើម្បីទាក់ទាញភ្ញៀវទេសចរជាតិ និងអន្តរជាតិឲ្យកាន់តែច្រើនឡើង។

ជាមួយគ្នានេះ លោក អ៊ន់ ប៉ោសឿន ប្រធានមន្ទីរទេសចរណ៍ខេត្តស្ទឹងត្រែង បានឲ្យដឹងថា ដំណើរទស្សនកិច្ចតាមក្បួនរថយន្ត Caravan Tour នេះ នឹងប្រព្រឹត្តទៅចាប់ពីថ្ងៃទី១៨ ខែឧសភា ដល់ថ្ងៃទី៩ ខែមិថុនា ឆ្នាំ២០២៦ ដោយមានរថយន្តចូលរួមប្រមាណ ១០ គ្រឿង។ ក្បួននេះនឹងធ្វើដំណើរឆ្លងកាត់ប្រទេសកម្ពុជា បន្តទៅប្រទេសឡាវ ហើយឆ្ពោះទៅខេត្តយូណាន ប្រទេសចិន ដែលជាគោលដៅសំខាន់នៃកម្មវិធី។

លោកបានបន្ថែមថា ព្រឹត្តិការណ៍នេះត្រូវបានរៀបចំឡើងក្នុងក្របខណ្ឌយុទ្ធនាការ «ឆ្នាំទេសចរណ៍កម្ពុជា-ចិន ២០២៦» ដោយមានការសហការរវាងក្រសួងទេសចរណ៍ និងសមាគមទេសចរណ៍កម្ពុជា ក្នុងគោលបំណងផ្សព្វផ្សាយសក្តានុពលទេសចរណ៍ ក៏ដូចជាពង្រឹងទំនាក់ទំនងមិត្តភាព និងកិច្ចសហប្រតិបត្តិការល្អរវាងបណ្តាប្រទេសក្នុងតំបន់មេគង្គ-ឡានឆាង។

គួរបញ្ជាក់ថា តាមផែនការដែលបានកំណត់ ក្បួនរថយន្តទេសចរណ៍ Caravan Tour កម្ពុជា-ចិន នឹងវិលត្រឡប់មកដល់ប្រទេសកម្ពុជាវិញ នៅថ្ងៃទី៩ ខែមិថុនា ឆ្នាំ២០២៦ តាមច្រកទ្វារអន្តរជាតិខេត្តស្ទឹងត្រែង មុននឹងបន្តដំណើរទៅកាន់ខេត្តសៀមរាប ដែលជាគោលដៅទេសចរណ៍ដ៏ល្បីល្បាញមួយរបស់ប្រទេសកម្ពុជា៕