(ភ្នំពេញ)៖ លោក ឈួរ សុបញ្ញា សមាជិកគណៈកម្មការកណ្តាលសហភាពសហព័ន្ធយុវជនកម្ពុជា (ស.ស.យ.ក) បានលើកជាគំនិត និងស្នើថា ពេលរៀបចំកម្មវិធីជាតិនានា គួរតែច្រៀងបទនរគររាជ ដែលជាចម្រៀងជាតិ ចំនួន ៣វគ្គ និងច្រៀងដោយផ្ទាល់ ដើម្បីដាស់ស្មារតីជាតិ បន្ថែមទៀត។

បើតាមលោក ឈួរ សុបញ្ញា យោងតាមបទពិសោធន៍ដែលលោកដើរអង្កេតនៅតាមប្រទេសនានានា កន្លែងកម្មវិធីណា ដែលគេច្រៀងចម្រៀងជាតិដោយផ្ទាល់ ស្មារតីស្នេហាជាតិ មានថាមពលខ្លាំងក្លា ជាងការមិនច្រៀង។

លោកបានលើកឡើងបែបនេះ នាព្រឹកថ្ងៃទី ១៨ ខែឧសភា ឆ្នាំ២០២៦ ក្នុងឱកាសលោក សុខ សប្បាយណា សមាជិកគណៈអចិន្ត្រៃយ៍នៃគណៈកម្មាធិការកណ្តាល ស.ស.យ.ក ដឹកនាំកិច្ចប្រជុំជាមួយក្រុមអន្តរសាសនា ដើម្បីផ្តល់ព័ត៌មានស្តីពីការរៀបចំកម្មវិធី «ដាស់ស្មារតីជាតិ» នៅមជ្ឈមណ្ឌលម៉ានី អគារ The Kampus ។

កិច្ចប្រជុំនេះមានគោលបំណង ផ្សព្វផ្សាយជូនថ្នាក់ដឹកនាំអន្តរសាសនា អំពីព្រឹត្តិការណ៍ «ដាស់ស្មារតីជាតិ» ដែល ស.ស.យ.ក. គ្រោងរៀបចំនៅពេលខាងមុខ ដើម្បីឱ្យជនបង្គោលទាំងអស់ធ្វើការផ្សព្វផ្សាយបន្ត និងបំផុសសមាជិក សមាជិការបស់ខ្លួនឱ្យចូលរួមប្រកបដោយស្មារតីស្វាហាប់ និងមោះមុត៕