ឯកអគ្គរដ្ឋទូតថ្មីរបស់ក្រិកប្រចាំនៅកម្ពុជា ចាត់ទុកកម្ពុជាជាប្រទេសស្រស់ស្អាត និងមានប្រវត្តិសាស្ត្រ វប្បធម៌ចំណាស់ដូចទៅនឹងប្រទេសក្រិក (Video inside)
19-05-2026 13:13
(ភ្នំពេញ)៖ លោកស្រី ម៉ាហ្កាដាលីនី នីកូឡាអូ (Magadalini Nicolaou) ឯកអគ្គរដ្ឋទូតថ្មីរបស់ក្រិកប្រចាំនៅកម្ពុជា ដែលជាឯកអគ្គរដ្ឋទូតជាស្រ្តីលើកដំបូងរបស់ក្រិកនៅកម្ពុជា បានបង្ហាញអារម្មណ៍រីករាយបានបំពេញបេសកកម្មនៅកម្ពុជា។ លោកស្រី ចាត់ទុកប្រទេសកម្ពុជា ជាប្រទេសស្រស់ស្អាត មានប្រវត្តិសាស្ត្រ អរិយធម៌ និងវប្បធម៌ដ៏ចំណាស់ដូចទៅនឹងប្រទេសក្រិកដែរ។
លោកស្រី បានលើកឡើងបែបនេះ ក្នុងឱកាសអញ្ជើញប្រគល់សារតាំងជូនសម្តេចតេជោ ហ៊ុន សែន ប្រមុខរដ្ឋស្តីទីនាព្រឹកថ្ងៃអង្គារ ទី១៩ ខែឧសភា ឆ្នាំ២០២៦នេះ នៅវិមានសាមគ្គីភាពនៃព្រឹទ្ធសភាកម្ពុជា។
លោក ជា ធីរិទ្ធ អ្នកនាំពាក្យព្រឹទ្ធសភា បានឱ្យដឹងថា ក្នុងជំនួបនេះ សម្ដេចតេជោ បានសម្ដែងក្តីរីករាយ ហើយក្នុងព្រះបរមនាមព្រះមហាក្សត្រ សម្ដេចសូមអបអរសាទរចំពោះលោកស្រី នីកូឡាអូ ដែលបានតែងតាំងជាឯកអគ្គរដ្ឋទូតថ្មីរបស់ក្រិកប្រចាំនៅកម្ពុជា។ សម្ដេចតេជោ សង្ឃឹមថា តួនាទីរបស់លោកស្រីជាឯកអគ្គរដ្ឋទូត នឹងញ៉ាំងទំនាក់ទំនងរវាងកម្ពុជា និងក្រិក កាន់តែរីកចម្រើនបន្តទៀត។
លោកស្រី បានអរគុណសម្ដេចតេជោប្រមុខរដ្ឋស្តីទី អនុញ្ញាតឱ្យលោកស្រីជួបប្រគល់សារតាំងនាពេលនេះ។ លោកស្រីបានជម្រាបសម្តេចតេជោថា ពីមុនមកក្រិក មិនដែលតែងតាំងឯកអគ្គរដ្ឋទូតជាស្រី្តប្រចាំនៅកម្ពុជានោះទេ ដូច្នេះលោកស្រីរីករាយនឹងបានធ្វើជាឯកអគ្គរដ្ឋទូតនៅប្រទេសដ៏ស្រស់ស្អាតមួយនេះ។
លោកស្រីឯកអគ្គរដ្ឋទូត ប្ដេជ្ញាចិត្តថានឹងខិតខំប្រឹងប្រែងពង្រីកទំនាក់ទំនងរវាងកម្ពុជា និងក្រិកឱ្យកាន់តែរីកចម្រើនបន្តទៀត។ លោកស្រីបានលើកឡើងថា កម្ពុជា និងក្រិក មានប្រវត្តិសាស្ត្រ និងប្រវត្តិនៃការកើតឡើងប្រហាក់ប្រហែលគ្នា ដែលជាប្រទេសមានប្រវត្តិសាស្ត្រយូរអង្វែងដូចគ្នា ហើយមានវប្បធម៌ មានអរិយធម៌ដ៏អស្ចារ្យដូចគ្នា ដែលជាចំណុចមួយដែលលោកស្រីចាប់អារម្មណ៍ និងពង្រីកបន្ថែមទៀតនៅក្នុងពេលលោកស្រីបំពេញបេសកកម្មជាឯកអគ្គរដ្ឋទូតប្រចាំនៅកម្ពុជា។
សម្ដេចតេជោ បានសម្ដែងការពេញចិត្ត ហើយក៏ឯកភាពចំពោះការលើកឡើងរបស់លោកស្រី ជាពិសេសទាក់ទងទៅនឹងប្រទេសទាំងពីរដែលមានប្រវត្តិសាស្ត្រយូរអង្វែងដូចគ្នា។ សម្ដេចតេជោ ក៏ទទួលស្គាល់ថា ថ្វីត្បិតប្រទេសទាំងពីរមានប្រវត្តិសាស្ត្រយូរអង្វែង មានអរិយធម៌ វប្បធម៌សម្បូរបែបដូចគ្នាក៏ពិតមិន ប៉ុន្តែក្រិក គេអាចចាត់ទុកថា ជាប្រទេសមួយដែលចំណាស់ជាងកម្ពុជា និងសម្បូរបែបនូវវប្បធម៌ ហើយជាប្រទេសដែលធ្លាប់មានអ្នកប្រាជ្ញច្រើន។
តាមរយៈកិច្ចការរវាងកម្ពុជា និងក្រិក សម្ដេចតេជោសង្ឃឹមថា វត្តមានរបស់លោកស្រី នឹងជំរុញបន្ថែមទៀតនូវពាណិជ្ជកម្ម សេដ្ឋកិច្ច ក៏ដូចជាសក្កានុពលផ្សេងៗទៀត ដែលប្រទេសទាំងពីរត្រូវពង្រឹងជាមួយគ្នា និងធ្វើយ៉ាងណាឱ្យទំនាក់ទំនងនេះកាន់តែរឹងមាំ ជាពិសេស សម្ដេចតេជោសង្កត់ធ្ងន់ទៅលើការគាំទ្រគ្នាទៅវិញទៅមកលើឆាកអន្តរជាតិ៕
