(ភ្នំពេញ)៖ លោក ងួន ស្តេចភក្តី ទីប្រឹក្សាផ្ទាល់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីកម្ពុជា និងជារដ្ឋលេខាធិការក្រសួងធម្មការ និងសាសនា ទទួលបន្ទុកពុទ្ធិកសាកលវិទ្យាល័យព្រះសីហមុនីរាជា (PSBU) បានលើកឡើងថា លោកនឹងជំរុញការរៀបចំវេទិកាសាធារណៈពាក់ព័ន្ធនឹង «ការដាស់ស្មារតីជាតិ» មិនឲ្យភ្លេចមេរៀន ដែលកម្ពុជាបានឆ្លងកាត់ ក្នុងឆ្នាំ២០២៥។

មន្ត្រីជាន់ខ្ពស់រូបនេះ បានអះអាងថា លោកនឹងជំរុញឲ្យមានវេទិកានេះជានិច្ចនាពេលខាងមុខ ដែលជាសកម្មភាពមួយដើម្បីជាតិ។ លោកបានបន្ថែមថា បើសិនជាការនិយាយ តែមិនមានសកម្មភាពនោះ ស្មើនឹងការនិយាយដែលអត់ន័យ។

លោក ងួន ស្តេចភក្តី លើកឡើងបែបនេះ នាព្រឹកថ្ងៃទី១៨ ខែឧសភា ឆ្នាំ២០២៦ ក្នុងឱកាសលោក សុខ សប្បាយណា សមាជិកគណៈអចិន្ត្រៃយ៍នៃគណៈកម្មាធិការកណ្តាល ស.ស.យ.ក ដឹកនាំកិច្ចប្រជុំជាមួយក្រុមអន្តរសាសនា ដើម្បីផ្តល់ព័ត៌មានស្តីពីការរៀបចំកម្មវិធី «ដាស់ស្មារតីជាតិ» នៅមជ្ឈមណ្ឌលម៉ានី អគារ The Kampus ។

កិច្ចប្រជុំនេះមានគោលបំណងផ្សព្វផ្សាយជូនថ្នាក់ដឹកនាំអន្តរសាសនា អំពីព្រឹត្តិការណ៍ «ដាស់ស្មារតីជាតិ» ដែល ស.ស.យ.ក. គ្រោងរៀបចំនៅពេលខាងមុខ ដើម្បីឱ្យជនបង្គោលទាំងអស់ធ្វើការផ្សព្វផ្សាយបន្ត និងបំផុសសមាជិក សមាជិការបស់ខ្លួនឱ្យចូលរួមប្រកបដោយស្មារតីស្វាហាប់ និងមោះមុត។

យុទ្ធនាការ «ដាស់ស្មារតីជាតិ» ឬ «Day of Reckoning» ជាយុទ្ធនាការដែលរៀបចំឡើង ដើម្បីចងក្រង និងផ្សព្វផ្សាយឱ្យសាធារណជន ជាពិសេសយុវជនជំនាន់ក្រោយបានដឹង និងចងចាំទុក អំពីបទពិសោធ និងរឿងរ៉ាវ ជាមេរៀនដែលកម្ពុជាបានឆ្លងកាត់ក្នុងឆ្នាំ២០២៥៕