(កំពង់ចាម)៖ លោក ប៊ុន ហុន រដ្ឋលេខាធិការក្រសួងមហាផ្ទៃ រួមជាមួយថ្នាក់ដឹកនាំខេត្តកំពង់ចាម នៅថ្ងៃទី១៩ ខែឧសភា ឆ្នាំ២០២៦នេះ នៅសាលាខេត្តកំពង់ចាម បានបើកកិច្ចប្រជុំ ស្តីពីការបន្តនិរន្តរភាពយុទ្ធនាការ នៃការបោសសម្អាតការឆបោកតាមប្រព័ន្ធបច្ចេកវិទ្យា (Online Scams)។

អភិបាលខេត្តកំពង់ចាម លោក អ៊ុន ចាន់ដា បានលើកបទពិសោធន៍ក្នុងការអនុវត្តការងារប្រឆាំងបទល្មើសឆបោកតាមប្រព័ន្ធបច្ចេកវិទ្យា (Online Scams) ក្រោយទទួលបានបទបញ្ជាលេខ០១ របស់រាជរដ្ឋាភិបាល គណៈបញ្ជាការឯកភាពរដ្ឋបាលខេត្ត បានច្បាមជាប់នៅនឹងដៃ និងឈានទៅគ្រប់គ្រងភ្លាមៗ នូវគោលដៅសំខាន់ៗចំនួន ៤០២ទីតាំង និងកន្លែងផ្សេងៗ ចំនួន៧១៤ទីតាំង ក្នុងនោះមាន៖ បុរី៤ទីតាំង, រីស៊ត២ទីតាំង, រោងចក្រ៥០ទីតាំង, សហគ្រាស៣ទីតាំង, កសិដ្ឋាន៦ទីតាំង, ផ្ទះសំណាក់១០៦ទីតាំង, សណ្ឋាគារ២៨ទីតាំង, បន្ទប់ជួល១០៧ទីតាំង, ផ្ទះត្រចៀកកាំ៥០ទីតាំង, ទីតាំងសាសនា៤៤ទីតាំង, ខារ៉ាអូខេ២៥ទីតាំង, គ្រឹះស្ថានឯកជន២ទីតាំង, ក្រុមហ៊ុន១០ទីតាំង និងទីតាំងផ្សេងៗ២៧៧ទីតាំង។

លោកបានបន្ដថា គណៈបញ្ជាការឯកភាពរដ្ឋបាលខេត្ត បានដាក់ចេញនូវផែនការជាយុទ្ធសាស្ត្រកំណត់ និងគ្រប់គ្រងបាននូវបណ្ដាទីតាំងដែលសង្ស័យ មានការប្រមូលផ្តុំមនុស្សរស់នៅប្រកបអាជីវកម្មផ្សេងៗ តាមរយៈការកំណត់នូវវត្ថុវិភាគលើ៖ ទីតាំងដែលមានមនុស្សចេញចូលខុសប្រក្រតី ការប្រើប្រាស់ចរន្តអគ្គីសនីច្រើន ការប្រើប្រាស់ទឹកច្រើន ការបន្សល់កាកសំណល់សំរាមច្រើន ការប្រើប្រាស់ប្រព័ន្ធអ៊ីនធឺណេតច្រើនជាដើម។

ជាលទ្ធផលធ្វើឲ្យក្នុងភូមិសាស្ត្រខេត្តកំពង់ចាម មិនមាន Casino និងទីតាំងបទល្មើសឆបោកតាមប្រព័ន្ធបច្ចេកវិទ្យាទាំងនេះ អាស្រ័យដោយបានចាត់វិធានការណ៍នានា ជាប់ជាប្រចាំពីចម្ងាយ កំណត់គោលដៅមុន បានទាន់ពេលវេលា ចុះពិនិត្យ និងពង្រាយកម្លាំងតាមគោលដៅ ដែលនឹងអាចមានការហើរចូលពីខាងក្រៅនូវមុខសញ្ញាសង្ស័យបានទាន់ពេលវេលា សមត្ថកិច្ច និងអាជ្ញាធរអនុវត្តការងារឈរលើគោលការណ៍ត្រឹមត្រូវ ស្អាតស្អំ និងមានការទទួលខុសត្រូវខ្ពស់ហើយប្ដេជ្ញាចិត្តធ្វើការរួមគ្នាដើម្បីផលប្រយោជន៏ការពារប្រជាពលរដ្ឋ មិនឲ្យទទួលរងនូវការរចាប់ជម្រិត រងគ្រោះដោយអំពើជួញដូរមនុស្ស និងការពារដល់សន្តិសុខសណ្តាប់ធ្នាប់សង្គមជាតិ។

ជាមួយគ្នានោះ រដ្ឋលេខាធិការក្រសួងមហាផ្ទៃ លោក ប៊ុន ហុន បានឲ្យដឹងថា បទល្មើសឆរបោកតាមប្រព័ន្ធបច្ចេកវិទ្យា ជាបទល្មើសសកល ជាបទល្មើសក្នុងសម័យទំនើប ដែលពិបាកនៅក្នុងការបង្ក្រាបទប់ស្កាត់។ លោកបានកោតសរសើរ និងវាយតម្លៃខ្ពស់ ចំពោះរដ្ឋបាលខេត្តកំពង់ចាម ដែលបានអនុវត្តវិធានការដែលរាជរដ្ឋាភិបាលបានចេញ បានយ៉ាងម៉ឺងម៉ាត់ និងអនុវត្តដោយភាពច្នៃប្រឌិតខ្ពស់ ហើយបានពិនិត្យចាត់ចែងយ៉ាងល្អិតល្អន់ រហូតទប់ស្កាត់បានមិនឲ្យមានបទល្មើសឆរបោកតាមប្រព័ន្ធបច្ចេកវិទ្យានេះ កើតមាននៅក្នុងខេត្តរបស់ខ្លួន។

លោករដ្ឋលេខាធិការ បានលើកទឹកចិត្តឲ្យរដ្ឋបាលខេត្ត និងអាជ្ញាធរពាក់ព័ន្ធទាំងអស់ ត្រូវអនុវត្តកិច្ចការនេះបន្តទៀត ពីព្រោះថា ប្រសិនបើយើងមិនអនុវត្តឲ្យបានតឹងរឹងទេ បទល្មើសមួយនេះវាអាចរាតត្បាតនៅក្នុងប្រទេស ធ្វើឲ្យអន្តរាយប្រទេសរបស់យើង ដោយមានការប៉ះពាល់ដល់ការវិនិយោគ ឬវិស័យទេសចរណ៍ជាដើម។ ដូច្នេះសូមឲ្យរដ្ឋបាលខេត្ត និងអាជ្ញាធរពាក់ព័ន្ធទាំងអស់ អនុវត្តនូវវិធានការ និងលិខិតបទដ្ឋានគតិយុត្តដែលរាជរដ្ឋាភិបាលបានដាក់ចេញជាបន្តបន្ទាប់ផងដែរ៕