(ភ្នំពេញ)៖ លោក ប៉ាល់ ចន្ទតារា រដ្ឋលេខាធិការក្រសួងសាធារណការ និងដឹកជញ្ជូន និងជានាយកគម្រោង តំណាងលោក ប៉េង ពោធិ៍នា រដ្ឋមន្ដ្រីក្រសួងសាធារណការ និងដឹកជញ្ជូន នាថ្ងៃទី១៩ ខែឧសភា ឆ្នាំ២០២៦នេះ បានអញ្ជើញជាអធិបតីក្នុងពិធីចុះហត្ថលេខាលើកិច្ចព្រមព្រៀងអនុវត្តគម្រោងធ្វើឱ្យប្រសើរឡើងវិញកំណាត់ផ្លូវជាតិ៧ ប៉ែកខាងជើង (ចាប់ពីខេត្ដក្រចេះទៅ ត្រពាំងក្រៀល ខេត្ដស្ទឹងត្រែង) ជាមួយលោកស្រី ចុង ជៀ ទីប្រឹក្សាសេដ្ឋកិច្ច និងពាណិជ្ជកម្ម អមស្ថានទូតសាធារណរដ្ឋប្រជាមានិតចិនប្រចាំកម្ពុជា ដោយមានការចូលរួមពីសំណាក់មន្ដ្រីនៃស្ថានទូតចិនប្រចាំកម្ពុជា លោក លោកស្រីសមាជិកអង្គភាពគ្រប់គ្រងគម្រោង។

គម្រោងធ្វើឱ្យប្រសើរឡើងវិញកំណាត់ផ្លូវជាតិលេខ៧ ប៉ែកខាងជើងនេះ មានប្រវែងសរុប ៩៦,៦៣គីឡូម៉ែត្រ ដែលនឹងត្រូវលើកកម្រិតឡើងវិញ ដោយក្រាលបេតុងកៅស៊ូ AC និងបំពាក់បរិក្ខារសុវត្ថិភាពចរាចរណ៍នានា។

កំណាត់ផ្លូវជាតិលេខ៧ នេះជាខ្សែផ្លូវមានសក្ដានុពល បម្រើដល់វិស័យឡូជីស្ទីក ដែលជួយដល់កំណើនសេដ្ឋកិច្ច និងការតភ្ជាប់នៅក្នុងតំបន់ភូមិភាគឦសាន ជាពិសេសតភ្ជាប់ទៅកាន់ព្រំដែនអន្ដរជាតិកម្ពុជា-ឡាវ (ត្រពាំងក្រៀល-ណងណុកខៀន)៕