(កូរ៉េខាងត្បូង)៖ លោក ឃួន ផុនរតនៈ ឯកអគ្គរាជទូតកម្ពុជាប្រចាំសាធារណរដ្ឋកូរ៉េ រួ​មជាមួយឯកអគ្គរាជទូត/រដ្ឋទូត នៃបណ្តាប្រទេសអាស៊ាន​ បានអញ្ជើញចូលរួ​មកិច្ចប្រជុំជាមួយលោក Yeo Han-Koo រដ្ឋមន្ត្រីក្រសួងពាណិជ្ជកម្ម នៃសាធារណរដ្ឋកូរ៉េ នៅសភាពាណិជ្ជកម្ម និងឧស្សាហកម្ម (Chamber of Commerce and Industry – KCCI) នៅថ្ងៃទី១៨ ខែឧសភា ឆ្នាំ២០២៦ ក្នុងទីក្រុងសេអ៊ូល។

ក្នុងជំនួបនោះ បានពិភាក្សាអំពីការពង្រឹងកិច្ចសហប្រតិបត្តិការរវាងសាធារណរដ្ឋកូរ៉េ​ និងអាស៊ាន និងបានផ្លាស់ប្តូរយោបល់លើយន្តការចាំបាច់មួយចំនួន ដើម្បីជួយជំរុញដល់កំណើនពាណិជ្ជកម្មរវាងសាធារណរដ្ឋកូរ៉េ​ និងអាស៊ាន។ លោក Yeo Han-Koo បានបង្ហាញពីការប្តេជ្ញាចិត្តរបស់កូរ៉េក្នុងការជំរុញកិច្ចចរចាពាណិជ្ជកម្មសេរីកូរ៉េ-អាស៊ាន (Korea-ASEAN Free Trade Agreement) ឱ្យបានឆាប់ខាងមុខនេះ។

លោក ឃួន ផុនរតនៈ បានសម្តែងការស្វាគមន៍ចំពោះការប្តេជ្ញាចិត្តរបស់កូរ៉េ ក្នុងការពន្លឿនកិច្ចចចារពាណិជ្ជកម្មសេរីសាធារណរដ្ឋកូរ៉េ-អាស៊ាន។ លោកទូតបានជម្រាបលោករដ្ឋមន្ត្រីថា កម្ពុជា និងសាធារណរដ្ឋកូរ៉េ​ មានកិច្ចព្រមព្រៀងពាណិជ្ជកម្មសេរីកម្ពុជា-កូរ៉េ ដែលបានចូលជាធរមានតាំងពីឆ្នាំ ២០២២ ហើយវាជាយន្តការដ៏សំខាន់សម្រាប់ជំរុញពាណិជ្ជកម្ម និងវិនិយោគទ្វេភាគី។ លោកក៏បានស្នើឲ្យជំរុញការអនុវត្តកិច្ចព្រមព្រៀងពាណិជ្ជកម្មសេរីកម្ពុជា-កូរ៉េនេះ​ ដើម្បីសម្រួលដល់ការនាំចេញ-នាំចូលទំនិញនៃប្រទេសទាំងពីរ៕