(បន្ទាយមានជ័យ)៖ កម្លាំងគណៈបញ្ជាការឯកភាពខេត្តបន្ទាយមានជ័យ បានបន្តចុះត្រួតពិនិត្យ និងឆែកឆេរជាក់ស្ដែង ចំនួន៥ទីតាំង ស្ថិតនៅភូមិព្រៃព្រិច សង្កាត់អូរជ្រៅ ក្រុងប៉ោយប៉ែត ដោយរកឃើញជនបរទេសចំនួន ៣៣នាក់ និងរកឃើញបន្ទប់ក្រោមដីចំនួន១ មានផ្ទុកសម្ភារសង្ស័យ ដែលជាសញ្ញាណនៃការប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា (Online Scams)។

ប្រតិបត្តិការនេះបានធ្វើឡើងក្រោមការបញ្ជាផ្ទាល់របស់លោក អ៊ុំ រាត្រី អភិបាលខេត្តបន្ទាយមានជ័យ និងជាប្រធានគណៈបញ្ជាការឯកភាពខេត្ត ដោយមានការសម្របសម្រួលនីតិវិធីពីលោក កើត វណ្ណារ៉េត ព្រះរាជអាជ្ញាអមសាលាដំបូងខេត្តបន្ទាយមានជ័យ។

តាមរបាយការណ៍ស្តីពីវឌ្ឍនភាពការងារបង្ក្រាបបទល្មើសឆបោកតាមប្រព័ន្ធបច្ចេកវិទ្យា (Online Scams) ប្រចាំថ្ងៃទី១៩ ខែឧសភា ឆ្នាំ២០២៦ បានឱ្យដឹងថា គណៈបញ្ជាការឯកភាពរដ្ឋបាលខេត្ត ដឹកនាំដោយលោក ប្រាក់ ប៉ូលី អភិបាលរងខេត្ត តំណាងលោក អ៊ុំ រាត្រី អភិបាលខេត្ត ដោយមានការចូលរួមពីកម្លាំងជំនាញស្នងការដ្ឋាននគរបាលខេត្ត, កម្លាំងបញ្ជាការដ្ឋានកងរាជអាវុធហត្ថខេត្ត គណៈបញ្ជាការឯកភាពរដ្ឋបាលក្រុង អធិការដ្ឋាននគរបាលក្រុង បញ្ជាការមូលដ្ឋានកងរាជអាវុធហត្ថក្រុង ចៅសង្កាត់ បានចុះត្រួតពិនិត្យនិងឆែកឆេរជាក់ស្ដែង ចំនួន៥ទីតាំង ស្ថិតនៅភូមិព្រៃព្រិច សង្កាត់អូរជ្រៅ ក្រុងប៉ោយប៉ែត។

ជាលទ្ធផល បង្ក្រាប និងបិទទីតាំងជាបណ្ដោះអាសន្នចំនួន ២ទីតាំង ក្នុងនោះទីតាំងទី១ ជាផ្ទះវីឡា មានកម្ពស់៣ជាន់ ១៩បន្ទប់ និងរកឃើញបន្ទប់ក្រោមដីចំនួន១ មានផ្ទុកសម្ភារៈសង្ស័យ ដែលជាសញ្ញាណនៃការប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា ទីតាំងពុំមានជនបរទេសស្នាក់នៅ ទីតាំងទី២ អគារកម្ពស់៦ជាន់ ១៦បន្ទប់ ២ហល រកឃើញសម្ភារៈសង្ស័យពាក់ព័ន្ធបទល្មើសឆបោកតាមប្រព័ន្ធបច្ចេកវិទ្យា ទីតាំងពុំមានជនបរទេសស្នាក់នៅ។

កម្លាំងគណៈបញ្ជាការឯកភាពខេត្ត បានត្រួតពិនិត្យរដ្ឋបាល៣ទីតាំង រកឃើញជនបរទេសចំនួន ៣៣នាក់ ស្រី២នាក់ (ចិន២៩នាក់ ស្រី១នាក់ និងថៃ៤នាក់ ស្រី១នាក់) ក្នុងនោះរកឃើញជនជាតិចិន១៧នាក់ប្រុស ស្នាក់នៅខុសច្បាប់ បញ្ជូនទៅមណ្ឌលកងវ៉ាខេត្ត ដើម្បីបន្ដនីតិវិធីបណ្ដេញចេញ៕