(ភ្នំពេញ)៖ ក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃទី២០ ខែឧសភា ឆ្នាំ២០២៦នេះ បានសេចក្តីប្រកាសព័ត៌មានស្ដីពី ដំណោះស្រាយលើការទាមទាររបស់បងប្អូនអ្នកដឹកជញ្ជូនតាមថ្នាលបច្ចេកវិទ្យា។ នេះបើយោងតាមសេចក្តីជូនដំណឹងដែលបណ្ដាញសារព័ត៌មាន Fresh News ទទួលបាន

បន្ទាប់ពីទទួលសំណើរបស់បងប្អូនអ្នកដឹកជញ្ជូនតាមថ្នាលបច្ចេកវិទ្យា ក្រសួងបានបើកកិច្ចប្រជុំ និងបានសម្របសម្រួលដោះស្រាយដោយយកចិត្តទុកដាក់ ដោយសម្រេច បាននូវលទ្ធផលដូចខាងក្រោម៖

១៖ តំណាងក្រុមហ៊ុនផ្តល់សេវាដឹកជញ្ជូនអ្នកដំណើរ និងតំណាងអ្នកដឹកជញ្ជូនតាមថ្នាលបច្ចេកវិទ្យា បានឯកភាពគ្នាលើការដំឡើងតម្លៃដឹកជញ្ជូនចំនួន ៥០០រៀល ក្នុងមួយជើងដំណើរ ទៅលើតម្លៃអនុវត្ត បច្ចុប្បន្នជាបណ្តោះអាសន្នក្នុងរយៈពេល ៣ខែ ចាប់ពីថ្ងៃទី១ ខែមិថុនា ដល់ថ្ងៃទី៣១ ខែសីហា ឆ្នាំ២០២៦ ដោយតម្លៃបន្ថែមនេះគឺផ្តល់ជូនអ្នកបើកបរដោយមិនរាប់បញ្ចូលការកាត់កម្រៃជើងសារ ឡើយ។
២៖ ចំពោះការបិទគណនី ឬការប្រព្រឹត្តិកំហុសរបស់អ្នកដឹកជញ្ជូនតាមថ្នាលបច្ចេកវិទ្យាដែលជាដៃគូសហការ ក្រុមហ៊ុនត្រូវមាននីតិវិធីអនុវត្តជាក់លាក់ ដោយត្រូវផ្ទៀងផ្ទាត់ឱ្យបានច្បាស់លាស់ និងជូនដំណឹងមុន ជាចាំបាច់។
៣៖ តំណាងក្រុមហ៊ុនផ្តល់សេវាដឹកជញ្ជូនអ្នកដំណើរបានឯកភាពកាត់កម្រៃជើងសារមិនឱ្យលើសពី ១៥ភាគរយ ក្នុងមួយជើងដំណើរ។

ជាថ្មីម្ដងទៀត ក្រសួងបានបញ្ជាក់ថា តំណាងក្រុមហ៊ុនផ្តល់សេវាដឹកជញ្ជូនអ្នកដំណើរ និងតំណាងអ្នកដឹកជញ្ជូនតាមថ្នាលបច្ចេកវិទ្យាបាន ឯកភាពចូលរួមបញ្ចៀសរាល់បញ្ហាប្រឈមដែលអាចកើតមានឡើងនាពេលខាងមុខ និងសហការចូលរួមដោះស្រាយ នៅគ្រប់យន្តការរបស់ក្រសួងដោយសន្តិវិធី៕

ខាងក្រោមនេះជាសេចក្តីប្រកាសព័ត៌មានរបស់ក្រសួងការងារ៖