(ភ្នំពេញ)៖ ក្រសួងទេសចរណ៍ ចេញសេចក្តីជូនដំណឹង ស្តីពីការចូលរួមព្រឹត្តិការណ៍ «ទិវាផ្លាស់ប្តូរវប្បធម៌ និងទេសចរណ៍រវាងកម្ពុជា-ទីក្រុងហៃគូ ឆ្នាំ២០២៦ លើកទី៣» និងកម្មវិធីពាក់ព័ន្ធ ចាប់ពីថ្ងៃទី២០ ដល់ថ្ងៃទី២៤ ខែឧសភា ឆ្នាំ២០២៦ នៅទីក្រុងហៃគូ ខេត្តហៃណាន សាធារណរដ្ឋប្រជាមានិតចិន។

តាមរយៈសេចក្ដីជូនដំណឹងរបស់ក្រសួងទេសចរណ៍ដែលបណ្ដាញព័ត៌មាន Fresh News ទទួលបាននៅថ្ងៃទី១៩ ខែឧសភា ឆ្នាំ២០២៦នេះ​ បានឲ្យដឹងថា ការចូលរួមព្រឹត្តិការណ៍ «ទិវាផ្លាស់ប្តូរវប្បធម៌ និងទេសចរណ៍រវាងកម្ពុជា-ទីក្រុងហៃគូ ឆ្នាំ២០២៦ លើកទី៣» និងកម្មវិធីពាក់ព័ន្ធ ចាប់ពីថ្ងៃទី២០ ដល់ថ្ងៃទី២៤ ខែឧសភា ឆ្នាំ២០២៦ ទីក្រុងហៃគូ ខេត្តហៃណាន សាធារណរដ្ឋប្រជាមានិតចិន។

ដោយទទួលបានការអនុញ្ញាតពីរាជរដ្ឋាភិបាល លោក ហួត ហាក់ រដ្ឋមន្ត្រីក្រសួង ទេសចរណ៍ នឹងដឹកនាំគណៈប្រតិភូក្រសួងទេសចរណ៍កម្ពុជា និងផ្នែកឯកជនវិស័យទេសចរណ៍កម្ពុជា ចូលរួមព្រឹត្តិការណ៍ «ទិវាផ្លាស់ប្តូរវប្បធម៌ និងទេសចរណ៍រវាងកម្ពុជា-ទីក្រុងហៃគូ ឆ្នាំ២០២៦ លើកទី៣» និងកម្មវិធីពាក់ព័ន្ធ ចាប់ពីថ្ងៃទី២០ ដល់ថ្ងៃទី២៤ ខែឧសភា ឆ្នាំ២០២៦ នៅទីក្រុងហៃគូ ខេត្តហៃណាន សាធារណរដ្ឋប្រជាមានិតចិន។

ព្រឹត្តិការណ៍ «ទិវាផ្លាស់ប្តូរវប្បធម៌ និងទេសចរណ៍រវាងកម្ពុជា-ទីក្រុងហៃគូ ឆ្នាំ២០២៦ លើកទី៣» រៀបចំឡើងក្នុងគោលបំណងផ្សព្វផ្សាយទេសចរណ៍ និងវប្បធម៌ដ៏ផូរផង់របស់កម្ពុជាដល់ប្រជាជនចិន។ ព្រឹត្តិការណ៍នេះនឹងរៀបចំឡើងលើវិថីដើរ Qilou ដ៏ល្បីជាប្រវត្តិសាស្ត្ររបស់ទីក្រុងហៃគូ ដែលមានទេសចរ រាប់ម៉ឺននាក់ដើរកម្សាន្តជារៀងរាល់ថ្ងៃ ដោយមានការសម្តែងសិល្បៈបុរាណ និងសហសម័យកម្ពុជា-ចិន និង ការដាក់តាំងបង្ហាញនូវផលិតផលរបស់កម្ពុជាផងដែរ។

បន្ថែមលើនេះ រដ្ឋមន្ត្រី ហួត ហាក់ ក៏នឹងអញ្ជើញចូលរួមកម្មវិធីផ្សព្វផ្សាយទេសចរណ៍កម្ពុជា (Cambodia Tourism Roadshow) និងការផ្សព្វផ្សាយគោលនយោបាយលើកលែងទិដ្ឋាការសម្រាប់ ប្រជាជនចិន ដែលរៀបចំឡើងក្នុងការផ្សព្វផ្សាយអំពីសក្តានុពលទេសចរណ៍របស់កម្ពុជា និងការអនុវត្តសាក ល្បងការលើកលែងទិដ្ឋាការសម្រាប់ទេសចរចិនមកទស្សនាកម្ពុជា ដែលនឹងត្រូវចាប់ផ្តើមអនុវត្តក្នុងខែមិថុនា ឆ្នាំ២០២៦ ខាងមុខ ដល់ប្រតិបត្តិករទេសចរណ៍ចិននៅក្នុងខេត្តហៃណាន ដើម្បីឱ្យបានជ្រួតជ្រាប និងអាច រៀបចំកញ្ចប់ទេសចរណ៍មកកម្ពុជាបានទាន់ពេលវេលា ក៏ដូចជាអាចភ្ជាប់ទំនាក់ទំនងធុរកិច្ចជាមួយផ្នែកឯកជន វិស័យទេសចរណ៍កម្ពុជា ដែលនឹងចូលរួមកម្មវិធីនេះផងដែរ។

កម្មវិធីនេះ រំពឹងថានឹងមានអ្នកចូលរួមមកពី ក្រុមហ៊ុនទេសចរណ៍ធំៗក្នុងខេត្តហៃណាន និងប្រតិបត្តិករទេសចរណ៍ចិន សរុបប្រមាណជាង ២០០រូប។ ឆ្លៀតក្នុងឱកាសចូលរួមព្រឹត្តិការណ៍ខាងលើ លោករដ្ឋមន្ត្រី នឹងជួបពិភាក្សាការងារទ្វេភាគី ជាមួយអភិបាលខេត្តហៃណាន អភិបាលក្រុងហៃគូ អភិបាលក្រុងសានយ៉ា សមាគមទេសចរណ៍ និងក្រុមហ៊ុន ទេសចរណ៍ធំៗ ក្នុងខេត្តហៃណាន ដើម្បីពង្រឹងកិច្ចសហប្រតិបត្តិការ និងជំរុញលំហូរភ្ញៀវទេសចរចិនមកកាន់ កម្ពុជាបន្ថែមទៀត៕