(ភ្នំពេញ)៖ លោក ហួត ហាក់ រដ្ឋមន្ត្រីក្រសួងទេសចរណ៍ អញ្ជើញដឹកនាំកិច្ចប្រជុំពិភាក្សាលើសូចនាករសមិទ្ធកម្មគន្លឹះទី២៨ ស្តីពី «អត្រាតម្លៃបន្ថែមសុទ្ធនៃវិស័យទេសចរណ៍ដែលកម្ពុជាទទួលបាន» ដោយមានការអញ្ជើញចូលរួមពីតំណាងក្រសួងកសិកម្ម រុក្ខាប្រមាញ់ និង នេសាទ, ក្រសួងពាណិជ្ជកម្ម, ក្រសួងផែន ការ, ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និង នវានុវត្តន៍, ធនាគារជាតិ នៃ កម្ពុជា, វិទ្យាស្ថាន ជាតិ ស្ថិតិ និងថ្នាក់ដឹកនាំក្រសួងទេសចរណ៍ ព្រមទាំងមន្ត្រីជំនាញ និងភាគីពាក់ព័ន្ធ សរុបប្រមាណ ៣០រូប។

កិច្ចប្រជុំនេះ ផ្តោតលើការវាយតម្លៃបន្ថែមសុទ្ធដែលវិស័យទេសចរណ៍អាចផ្តល់ជូនដល់សេដ្ឋកិច្ចជាតិ តាមរយៈការលើកកម្ពស់ការចំណាយក្នុងស្រុក ការកាត់បន្ថយអត្រាលេចធ្លាយសេដ្ឋកិច្ច ការបង្កើនការប្រើប្រាស់ផលិតផល និងសេវាកម្មក្នុងស្រុក ព្រមទាំងការជំរុញការចូលរួមរបស់សហគមន៍ និងវិស័យឯកជនក្នុងខ្សែច្រវាក់តម្លៃទេសចរណ៍។

ថ្លែងក្នុងកិច្ចប្រជុំ រដ្ឋមន្ត្រី ហួត ហាក់ បានគូសបញ្ជាក់ថា ការបង្កើនតម្លៃបន្ថែមសុទ្ធនៃវិស័យទេសចរណ៍ មិនត្រឹមតែជួយពង្រឹងសេដ្ឋកិច្ចជាតិប៉ុណ្ណោះទេ ប៉ុន្តែថែមទាំងជំរុញការបង្កើតការងារ បង្កើនប្រាក់ចំណូលប្រជាពលរដ្ឋ និងលើកកម្ពស់ជីវភាពសហគមន៍មូលដ្ឋាន ស្របតាមគោលនយោបាយអភិវឌ្ឍន៍ទេសចរណ៍ប្រកបដោយចីរភាព និងបរិយាបន្នរបស់រាជរដ្ឋាភិបាលកម្ពុជា។

ជាមួយគ្នានេះ ក្រសួងទេសចរណ៍ នឹងបន្តសហការយ៉ាងជិតស្និទ្ធជាមួយក្រសួង-ស្ថាប័នពាក់ព័ន្ធ និងដៃគូអភិវឌ្ឍ ដើម្បីជំរុញការអនុវត្តគោលនយោបាយ និងវិធានការចាំបាច់នានា ក្នុងគោលបំណងបង្កើនប្រសិទ្ធភាពសេដ្ឋកិច្ចនៃវិស័យទេសចរណ៍ និងធានាថាផលប្រយោជន៍ពីវិស័យនេះអាចហូរចូលដល់ប្រជាពលរដ្ឋកម្ពុជាបានកាន់តែច្រើន៕