(ភ្នំពេញ)៖ លោក ញឹក ប៊ុនឆៃ ប្រធានគណបក្សខ្មែររួបរួមជាតិ ដែលជាគណបក្សនយោបាយក្នុងសម្ព័ន្ធភាព ជាមួយគណបក្សប្រជាជនកម្ពុជា បានលើកឡើងថា គណបក្សសម្ព័ន្ធភាពទាំង២៩ បង្ហាញនូវការគាំទ្រយ៉ាងពេញទំហឹង ចំពោះជំហររបស់រាជរដ្ឋាភិបាលកម្ពុជា ក្នុងការដោះស្រាយបញ្ហាព្រំដែនជាមួយភាគីថៃ ដោយសន្ដិភាព ដោយសន្ដិវិធី និងបញ្ចៀសការប្រើប្រាស់កម្លាំង។

លោក ញឹក ប៊ុនឆៃ បានបញ្ជាក់បែបនេះក្នុងសន្និសីទសារព័ត៌មាន នៅថ្ងៃទី២០ ខែឧសភា ឆ្នាំ២០២៦នេះ ដើម្បីបង្ហាញអំពី «លទ្ធផល នៃកិច្ចប្រជុំប្រធានគណបក្សនយោបាយក្នុងសម្ព័ន្ធភាព» កាលពីព្រឹកមិញ ដែលដឹកនាំដោយសម្ដេចតេជោ ហ៊ុន សែន ប្រធានគណបក្សប្រជាជនកម្ពុជា និងមានការចូលរួមពីគណបក្សសម្ព័ន្ធភាពទាំង២៩ នៅវិមាន៧មករា ដែលជាទីស្នាក់ការកណ្ដាលរបស់គណបក្សប្រជាជនកម្ពុជា។

អតីតមេទ័ពជាយដែនរូបនេះ បានអះអាងថា ផ្អែកតាមបទពិសោធន៍របស់បណ្ដាប្រទេសជាច្រើននៅលើពិភពលោក ការដោះស្រាយបញ្ហាជម្លោះ គឺមិនអាចបញ្ចប់ទៅបានដោយការប្រើប្រាស់កម្លាំងប្រដាប់អាវុធនោះឡើយ ពោលចុងបញ្ចប់ គឺសុទ្ធតែបញ្ចប់ដោយការចរចា ដោះស្រាយគ្នាដោយសន្ដិវិធី។ សម្រាប់កម្ពុជា លោកក៏ជឿជាក់លើការដោះស្រាយបែបនេះដែរ។

លោក ញឹក ប៊ុនឆៃ បានថ្លែងយ៉ាងដូូច្នេះថា «ខ្ញុំនៅតែជឿជាក់ថា ការដោះស្រាយជម្លោះនេះបើយើងមើលទៅលើបទពិសោធន៍កន្លងមកនៅលើសកលលោក ច្រើនតែបញ្ចប់ទៅដោយកម្លាំងយោធាទេ គឺបញ្ចប់ដោយការចរចា ការដោះស្រាយគ្នាដោយសន្ដិវិធីគ្រប់កន្លែង។ យើងពេលនេះគាំទ្រដល់ជំហររបស់រាជរដ្ឋាភិបាល គណបក្សក្នុងសម្ព័ន្ធភាពគាំទ្រគោលនយោបាយរបស់រាជរដ្ឋាភិបាល ដែលមានការចង្អុលបង្ហាញពី សម្ដេចតេជោ ហ៊ុន សែន យើងគាំទ្រឲ្យមានការដោះស្រាយជាមួយភាគីថៃ ដោយសន្ដិវិធី»។

បើតាមលោក ញឹក ប៊ុនឆៃ, រាជរដ្ឋាភិបាលកម្ពុជាបច្ចុប្បន្ន បានកំពុងខិតខំប្រឹងប្រែងដោះស្រាយបញ្ហាព្រំដែនដោយសន្ដិវិធី តាមសន្ដិភាព ព្រោះការដោះស្រាយគ្នាដោយកម្លាំងយោធា ពិតណាស់មិនអាចដោះស្រាយចប់បានទេ។

លោកមានជំនឿថា បើទោះបីយោធាថៃ វាយដណ្ដើមកាន់កាប់ទឹកដីរបស់កម្ពុជា តាមបណ្ដោយព្រំដែនជាច្រើនកន្លែង រហូតឈានទៅដាក់របងលួស កុងទឺន័រជាដើមនោះ គឺមិនអាចគ្រប់គ្រងទឹកដីកម្ពុជាបានរហូតនោះទេ ព្រោះនៅពេលដោះស្រាយបញ្ចប់ ការគ្រប់គ្រងនោះក៏នឹងត្រូវបញ្ចប់ដូចគ្នាដែរ។ លោកសន្និដ្ឋានបែបនេះ ដោយផ្អែកតាមបទពិសោធន៍របស់លោក ដែលធ្លាប់ធ្វើជាកងទ័ពនៅជាយដែន៕