(កំពង់ធំ)៖ លោក សាយ គឹមឡម ប្រធានអនុសាខាកាកបាទក្រហមកម្ពុជាស្រុកស្ទោង បានអំពាវនាវដល់មន្ត្រីរាជការ អាជ្ញាធរមូលដ្ឋាន សប្បុរសជន និងស្ថាប័នពាក់ព័ន្ធទាំងអស់ ចូលរួមបរិច្ចាគថវិកា និងសម្ភារ តាមសទ្ធាជ្រះថ្លា ដើម្បីគាំទ្រមូលនិធិមនុស្សធម៌ សម្រាប់អបអរសាទរខួបលើកទី១៦៣ នៃទិវាកាកបាទក្រហម និងអឌ្ឍចន្ទក្រហម ៨ ឧសភា ឆ្នាំ២០២៦ ក្រោមមូលបទ «បន្តរួមកម្លាំងគ្នា ដើម្បីមនុស្សធម៌»។

ការអំពាវនាវនេះធ្វើឡើងក្នុងឱកាសដែលលោក សាយ គឹមឡម បានដឹកនាំកិច្ចប្រជុំស្ដីពីការកៀរគរមូលនិធិ ថវិកា និងសម្ភារ សម្រាប់ចូលរួមអបអរសាទរទិវាដ៏មានសារៈសំខាន់ខាងលើ នៅអគាររដ្ឋបាលស្រុកស្ទោង ខេត្តកំពង់ធំ នាព្រឹកថ្ងៃទី២០ ខែឧសភា ឆ្នាំ២០២៦។

ក្នុងឱកាសនោះ លោក សាយ គឹមឡម បានលើកឡើងថា ការចូលរួមបរិច្ចាគថវិកា និងសម្ភារពីសំណាក់មន្ត្រីរាជការ សប្បុរសជន និងវិស័យឯកជន គឺជាកម្លាំងដ៏សំខាន់ក្នុងការគាំទ្រដល់សកម្មភាពមនុស្សធម៌របស់កាកបាទ ក្រហមកម្ពុជា ជាពិសេសការជួយសង្គ្រោះប្រជាពលរដ្ឋដែលជួបការលំបាក ជនងាយរងគ្រោះ និងអ្នករងគ្រោះដោយគ្រោះមហន្តរាយនានា។

លោកបានបញ្ជាក់ថា ក្រោមការណែនាំ និងចង្អុលបង្ហាញដ៏ខ្ពង់ខ្ពស់របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងក្រោមការដឹកនាំរបស់លោក នួន ផារ័ត្ន ប្រធានសាខាកាកបាទក្រហមកម្ពុជា ខេត្តកំពង់ធំ អនុសាខាកាកបាទក្រហមកម្ពុជាស្រុកស្ទោង បានបន្តជំរុញការងារមនុស្សធម៌ឱ្យកាន់តែមានប្រសិទ្ធភាព និងទូលំទូលាយ។

លោកប្រធានអនុសាខា បានអំពាវនាវព្រះមន្ត្រីសង្ឃគ្រប់អង្គ ឯកឧត្តម លោកជំទាវ លោកអ្នកឧកញ៉ា អ្នកឧកញ៉ា ឧកញ៉ា លោក លោកស្រី អ្នកនាង កញ្ញា ព្រមទាំងសប្បុរសជនគ្រប់មជ្ឈដ្ឋាន ទាំងក្នុងវិស័យរដ្ឋ និងវិស័យឯកជន ចូលរួមបរិច្ចាគតាមលទ្ធភាព និងតាមការស្ម័គ្រចិត្ត ដើម្បីចូលរួមគាំទ្រការងារមនុស្សធម៌ ដែលមានគុណតម្លៃខ្ពស់ មិនប្រកាន់និន្នាការនយោបាយ ពូជសាសន៍ ពណ៌សម្បុរ ឬសាសនាឡើយ។

ជាមួយគ្នានេះ លោក សាយ គឹមឡម បានក្រើនរំលឹកដល់អាជ្ញាធរភូមិ ឃុំ ការិយាល័យ និងអង្គភាពពាក់ព័ន្ធ ត្រូវបន្តបង្កើនគុណភាព និងប្រសិទ្ធភាពការងារបម្រើប្រជាពលរដ្ឋនៅមូលដ្ឋានឱ្យបានល្អប្រសើរថែមទៀត។ លោកក៏បានជំរុញឱ្យយកចិត្តទុកដាក់លើការកសាងហេដ្ឋារចនាសម្ព័ន្ធដែលឆ្លើយតបទៅនឹងតម្រូវការអាទិភាពរបស់ប្រជាពលរដ្ឋ។

លើសពីនេះ លោកបានណែនាំឱ្យអាជ្ញាធរមូលដ្ឋាន និងសមត្ថកិច្ចពាក់ព័ន្ធ ត្រូវបង្កើនការប្រុងប្រយ័ត្នខ្ពស់ចំពោះបាតុភូតធម្មជាតិ ក្នុងរដូវវស្សា ដូចជា ភ្លៀង ផ្គរ រន្ទះ និងខ្យល់កន្ត្រាក់ ព្រមទាំងត្រូវរៀបចំរបាយការណ៍ និងសំណើជួយសង្គ្រោះឱ្យបានទាន់ពេលវេលា ប្រកបដោយប្រសិទ្ធភាពខ្ពស់ ដើម្បីជួយប្រជាពលរដ្ឋដែលរងផលប៉ះពាល់ឱ្យបានឆាប់រហ័ស៕