(ភ្នំពេញ)៖ លោក ម៉ម សូណង់ដូ ប្រធានគណបក្សសំបុកឃ្មុំសង្គមប្រជាធិបតេយ្យ បានបង្ហាញនូវមោទនភាព ដែលលោកបានដឹកនាំគណបក្សរបស់លោក ក្លាយជាគណបក្សសម្ព័ន្ធភាពជាមួយគណបក្សប្រជាជនកម្ពុជា។ លោកបញ្ជាក់ថា លោកបង្កើតបក្សនយោបាយ មិនមែនដើម្បីស្វែងរកអំណាចផ្ទាល់ខ្លួន ប៉ុន្ដែបានចូលរួមចំណែកបង្រួបបង្រួមជាតិ។

ការលើកឡើងរបស់ ប្រធានគណបក្សសំបុកឃ្មុំសង្គមប្រជាធិបតេយ្យបែបនេះ ធ្វើឡើងក្នុងសន្និសីទសារព័ត៌មាន ស្តីពី «លទ្ធផលនៃកិច្ចប្រជុំប្រធានគណបក្សនយោបាយក្នុងសម្ព័ន្ធភាព» នាថ្ងៃទី២០ ខែឧសភា ឆ្នាំ២០២៦ នៅវិមាន៧មករា។

លោក ម៉ម សូណង់ដូ បានថ្លែងយ៉ាងដូច្នេះថា «ឥឡូវហ្នឹងខ្ញុំមានមោទនភាព ក្លាយជាសមាជិករបស់គណបក្សនយោបាយសម្ព័ន្ធភាពហើយសប្បាយ ដោយសារតែខ្ញុំធ្វើគណបក្សហ្នឹង គឺទិសដៅដើម្បីបង្រួបបង្រួមជាតិ ​មិនមែនសំដៅអំណាចទេ»។

ក្នុងន័យនេះ លោកបញ្ជាក់ថា លោកមានមោទនភាពដែលបានក្លាយជាសមាជិក នៃសម្ព័ន្ធភាពគណបក្សនយោបាយ ដោយចាត់ទុកថា ការធ្វើនយោបាយរបស់លោក គឺដើម្បីបង្រួបបង្រួមជាតិ និងជំរុញឱ្យខ្មែរទាំងអស់មានសាមគ្គីភាព មិនមែនផ្តោតតែលើអំណាចនយោបាយនោះឡើយ។

លោកបន្ថែមថា អ្នកនយោបាយ និងប្រធានគណបក្សនយោបាយទាំងអស់ សុទ្ធសឹងមានឆន្ទៈស្នេហាជាតិ និងគោលការណ៍រៀងៗខ្លួន ប៉ុន្តែគោលដៅរួមគឺដើម្បីប្រទេសជាតិ។ ទោះមានវិធីសាស្ត្រខុសគ្នាក៏ដោយ ក៏គួរតែស្វែងរកការយោគយល់ និងសហការគ្នា។

លោក ម៉ម សូណង់ដូ ក៏បានលើកឡើងពីការបង្កើតឱកាសសន្ទនា និងសហការរវាងគណបក្សនយោបាយ តាមរយៈយន្តការពិគ្រោះ និងផ្ដល់យោបល់ ដែលធ្វើឱ្យបរិយាកាសនយោបាយមានភាពល្អប្រសើរឡើង។ ជាមួយគ្នានេះ លោកបានសម្តែងការពេញចិត្តចំពោះប្រសាសន៍របស់សម្តេចធិបតី ហ៊ុន ម៉ាណែត ដែលបានលើកឡើងថា ទោះមានកម្លាំងតិចតួចក៏ដោយ ក៏នៅតែបន្តខិតខំដើម្បីសន្តិភាព និងប្រជាពលរដ្ឋ។

ប្រធានគណបក្សសំបុកឃ្មុំសង្គមប្រជាធិបតេយ្យ បានបញ្ជាក់ថា ការចូលរួមរបស់គណបក្សនយោបាយច្រើន គឺជាកម្លាំងសំខាន់សម្រាប់ការរួមគ្នាកសាងសន្តិភាព និងអភិវឌ្ឍប្រទេសជាតិ បើមានការយោគយល់ និងការសហការគ្នាល្អ៕