(ភ្នំពេញ)៖ លោក ម៉ម សូណង់ដូ ប្រធានគណបក្សសំបុកឃ្មុំសង្គមប្រជាធិបតេយ្យ បានលើកឡើងថា ស្ថានភាពកម្ពុជាពេលនេះ មានការប្រែប្រួលច្រើនបើធៀបនឹងកំណាព្យ «តើខ្ញុំរស់ដល់ពេលណា?» ដែលលោកបានសូត្រកាលពីជាង៣ទសវត្សមុន។ តាមការវាយតម្លៃរបស់លោក ការប្រែប្រួលនោះ អាចស្ថិតនៅក្នុងរង្វង់៦០ភាគរយ។

លោក ម៉ម សូណង់ដូ បានលើកឡើងបែបនេះ នៅក្នុងសន្និសីទសារព័ត៌មានស្តីពី «លទ្ធផលនៃកិច្ចប្រជុំប្រធានគណបក្សនយោបាយក្នុងសម្ព័ន្ធភាព» នាថ្ងៃទី២០ ខែឧសភា ឆ្នាំ២០២៦។

លោក ម៉ម សូណង់ដូ បានបញ្ជាក់ថា «ខ្ញុំនៅតែដដែល ប៉ុន្ដែបញ្ហាដែលខ្ញុំជួបពីមុន និងឥឡូវ គឺខុសគ្នាច្រើនណាស់ មិនមែនតែខ្ញុំទេ ក្នុងពិភពលោក ដូចគេមើលស្រុកខ្មែរសព្វថ្ងៃនេះ គេមិនស្គាល់ គេមិនដឹងថា មានជីវិតស្រស់បោះដូចសព្វថ្ងៃ រហូតស្ងើចសរសើរទៅដល់សម្ដេចតេជោ និងសម្ដេចធិបតី ហ៊ុន ម៉ាណែតដែរ»។

លោក ម៉ម សូណង់ដូ បានបន្តបញ្ជាក់យ៉ាងដូច្នេះថា៖ «បច្ចុប្បន្ននេះ មានការប្រែប្រួលច្រើនណាស់ ប្រសិនបើយើងនិយាយអំពីកំណាព្យ តើខ្ញុំរស់បានដល់ពេលណា? អ្វីដែលខ្ញុំបាននិយាយជាច្រើន ដែលទាក់ទងនឹងបញ្ហាសង្គម គឺឥឡូវនេះ បានប្រែប្រួលច្រើនណាស់ ខ្ញុំនិយាយថា បានជាង៦០% ហើយជាង៦០% គឺជាតម្រុយដែលធ្វើឱ្យប្រជាពលរដ្ឋខ្មែរ មានសេចក្ដីសង្ឃឹម»។

លោកបានកោតសរសើរសម្ដេចតេជោថា ជាអ្នកដឹកនាំគំរូ មានការពិសោធន៍ តាំងពីជំនាន់មុនរហូតមកដល់សព្វថ្ងៃ ដោយខ្មែរមានភ័ព្វវាសនា បានសម្ដេចធិបតី បន្ដវេន ហើយអ្វីដែលនិយាយ គឺមិនភរភូត ហើយមិនរត់ចោលគ្នា មិនទំលាក់ដៃចុះ៕

សូមស្តាប់ការលើកឡើងរបស់ លោក ម៉ម សូណង់ដូ៖