រដ្ឋមន្ត្រីក្រសួងឧស្សាហកម្ម អញ្ជើញសម្ពោធដាក់ឲ្យដំណើរការជាផ្លូវការ ប្រព័ន្ធផ្គត់ផ្គង់ទឹកស្អាតខេត្តកំពង់ចាម ដែលមានតម្លៃជិត១៣លានដុល្លារ
20-05-2026 15:53
(កំពង់ចាម)៖ លោក ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ តំណាងសម្ដេចអធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នៅថ្ងៃទី២០ ខែឧសភា ឆ្នាំ២០២៦ បានអញ្ជើញសម្ពោធ ដាក់ឲ្យដំណើរការជាផ្លូវការ នូវប្រព័ន្ធផ្គត់ផ្គង់ទឹកស្អាតខេត្តកំពង់ចាម ដែលមានទីតាំងស្ថិតនៅ ភូមិតាណេង សង្កាត់សំបួរមាស ក្រុងកំពង់ចាម។
ស្ថិតក្នុងឱកាសនោះ អភិបាលខេត្តកំពង់ចាមលោក អ៊ុន ចាន់ដា បានថ្លែងអំណរគុណយ៉ាងជ្រាលជ្រៅបំផុតចំពោះសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា ដែលបានយកចិត្តទុកដាក់ពីសុខមាលភាព បងប្អូនប្រជាពលរដ្ឋខេត្តកំពង់ចាម និងថ្លែងអំណរគុណដល់លោករដ្ឋមន្រ្តី ហែម វណ្ណឌី ជាម្ចាស់គម្រោងដែលបានផ្តល់នូវសមិទ្ធផល និងគាំទ្របច្ចេកទេសដ៏មានតម្លៃថ្លៃថ្លា មកដល់រដ្ឋបាលខេត្តកំពង់ចាម ដែលតាមរយៈសមិទ្ធផលថ្មី នេះ ពិតជាបានចូលរួមលើកកម្ពស់សុខមាលភាព របស់បងប្អូនប្រជាពលរដ្ឋនៅក្រុងកំពង់ចាម និងតាមបណ្ដាលស្រុកជុំវិញក្រុងកំពង់ចាមផងដែរ។
រដ្ឋមន្ត្រីក្រសួងឧស្សាហកម្មលោក ហែម វណ្ណឌី បានមានប្រសាសន៍ថា ប្រព័ន្ធផ្គត់ផ្គង់ទឹកស្អាតខេត្តកំពង់ចាម ដែលកំពុងត្រូវបានសម្ភោធដាក់ឱ្យដំណើរការជាផ្លូវការនាពេលនេះ គឺជាសមិទ្ឋផលដ៏សុវត្ថិភាព និរន្តរភាព និងថ្លៃសមរម្យជូនប្រជាពលរដ្ឋនៅទូទាំងប្រទេស។
លោកថា សមិទ្ធផលនេះឆ្លុះបញ្ចាំងពីការប្ដេជ្ញាចិត្តដ៏មុតមាំរបស់រាជរដ្ឋាភិបាលក្នុងការអភិវឌ្ឍហេដ្ឋារចនាសម្ព័ន្ធសាធារណ: លើកកម្ពស់ជីវភាពរស់នៅ និងគាំទ្រដល់ការអភិវឌ្ឍសេដ្ឋកិច្ច និងសង្គមប្រកបដោយបរិយាបន្ន ស្របតាមយុទ្ធសាស្ត្របញ្ចកោណតំណាក់កាលទី១។
លោករដ្ឋមន្ត្រីបានបន្តថា គម្រោងនេះត្រូវបានអនុវត្តក្រោមសហហិរញ្ញប្បទានពីធនាគារអភិវឌ្ឍន៍អាស៊ី (ADB) ទីភ្នាក់ងារបារាំងសម្រាប់ការអភិវឌ្ឍអភិវឌ្ឍន៍ (AFD) និងថវិកាបដិភាគរបស់រាជរដ្ឋាភិបាលកម្ពុជាដែលបង្ហាញ ពីគំរូនៃកិច្ចសហប្រតិបត្តិការដ៏ជោគជ័យរវាងកម្ពុជា និងដៃគូអភិវឌ្ឍន៍ ក្នុងការជំរុញការអភិវឌ្ឍវិស័យទឹកស្អាត។ គម្រោងដែលមានទំហំហិរញ្ញប្បទានសរុបប្រមាណ ១២,៩៨លានដុល្លារ ត្រូវបានចាប់ផ្ដើមសាងសង់នៅខែកញ្ញា ឆ្នាំ២០២២ និងបញ្ចប់ដោយជោគជ័យនៅខែធ្នូ ឆ្នាំ២០២៥។
លោក ហែម វណ្ណឌី បានបញ្ជាក់ថា ប្រព័ន្ធផ្គត់ផ្គង់ទឹកស្អាតថ្មីនេះ នឹងជួយបង្កើនសមត្ថភាពផលិតទឹកស្អាតរបស់រដ្ឋាករទឹកកំពង់ចាម ចំនួន ១១.៦០០ ម៉ែត្រគូបបន្ថែមទៀតក្នុងមួយថ្ងៃ និងពង្រីកវិសាលភាព នៃសេវាទឹកស្អាតសម្រាប់ ក្រុងកំពង់ចាម និងតំបន់ជុំវិញដែលនឹងផ្តល់អត្ថប្រយោជន៍យ៉ាងច្រើនដល់ប្រជាពលរដ្ឋ អាជីវកម្ម សាលារៀន មណ្ឌលសុខភាព និងសហគមន៏មូលដ្ឋានក្នុងខេត្តកំពង់ចាម។
ការទទួលបានសេវាទឹកស្អាតមិនត្រឹមតែរួមចំណែកលើកកម្ពស់អនាម័យ និងសុខភាពសាធារណៈប៉ុណ្ណោះទេ ប៉ុន្តែថែមទាំងគាំទ្រដល់ផលិតភាពសេដ្ឋកិច្ច ការវិនិយោគ និងការអភិវឌ្ឍទីក្រុង និងឧស្សាហកម្មប្រកបដោយ ចីរភាពផងដែ៕
