(ភ្នំពេញ)៖ លោក ញឹក ប៊ុនឆៃ ប្រធានគណបក្សខ្មែររួបរួមជាតិ បានមើលឃើញថា ការដឹកនាំប្រទេសរបស់ សម្ដេចតេជោ ហ៊ុន សែន អតីតនាយករដ្ឋមន្ដ្រីនៃកម្ពុជា និងជាប្រធានគណបក្សប្រជាជនកម្ពុជា គឺផ្ដោតលើការកសាងសន្ដិភាព និងជំរុញការអភិវឌ្ឍប្រទេស ដោយមិនរំពឹងថា កម្ពុជាមានសង្គ្រាមជាមួយប្រទេសជិតខាងនោះឡើយ។

ក្នុងសន្និសីទសារព័ត៌មាន នៅថ្ងៃទី២០ ខែឧសភា ឆ្នាំ២០២៦នេះ ដើម្បីបង្ហាញអំពី «លទ្ធផលនៃកិច្ចប្រជុំប្រធានគណបក្សនយោបាយក្នុងសម្ព័ន្ធភាព» លោក ញឹក ប៊ុនឆៃ ដែលជាប្រធានគណបក្សនយោបាយមួយក្នុងសម្ព័ន្ធភាព ជាមួយគណបក្សប្រជាជនកម្ពុជា បានគូសបញ្ជាក់ថា កន្លងទៅសម្ដេចតេជោ ហ៊ុន សែន មានកំហុសបន្ដិចបន្ទួចលើការដឹកនាំ ដោយមិនបានពង្រឹងវិស័យការពារជាតិ។

បើតាមលោក ញឹក ប៊ុនឆៃ, ប៉ុន្ដែអ្វីដែលសម្ដេចតេជោ ហ៊ុន សែន មិនផ្ដោតខ្លាំងលើវិស័យការពារជាតិ ព្រោះសម្ដេចបានខិតខំប្រឹងប្រែងកសាងនូវសន្ដិភាពយ៉ាងរឹងមាំ និងជំរុញការអភិវឌ្ឍប្រទេសលើគ្រប់វិស័យ ដោយមិនរំពឹងថា អាចនឹងមានបញ្ហាជាមួយប្រទេសជិតខាងដូចពេលនេះនោះទេ។

លោក ញឹក ប៊ុនឆៃ បានថ្លែងយ៉ាងដូច្នេះថា «សម្ដេចលោកបានមានប្រសាសន៍ដោយទទួលស្គាល់ថា ដោយសារយើងមានសន្ដិភាព យើងមិនអាចមានសង្គ្រាមជាមួយអ្នកជិតខាង ដូច្នេះរាជរដ្ឋាភិបាលបានយកចិត្តទុកដាក់ខ្លាំងលើការអភិវឌ្ឍប្រទេស ដោយមិនសូវដាក់ទម្ងន់ពង្រឹងទៅលើកងយោធពលខេមរភូមិន្ទ ដែលជាហេតុធ្វើឲ្យមានចំណុចខ្វះខាត។ តែចាប់ពីម៉ោងនេះទៅគឺត្រូវយកចិត្តទុកដាក់ហើយ»។

ប្រធានគណបក្សនយោបាយសម្ព័ន្ធភាពរូបនេះ បានបង្ហាញនូវការគាំទ្រយ៉ាងពេញទំហឹង ចំពោះរាជរដ្ឋាភិបាលកម្ពុជា ក្នុងការធ្វើកំណែទម្រង់កងយោធពលខេមរភូមិន្ទ ដែលធ្វើយ៉ាងណាឲ្យកងទ័ពកម្ពុជា កាន់តែមានសមត្ថភាព ហើយអាចឆ្លើយតបបានគ្រប់ស្ថានការណ៍ដែលកើតមានឡើង។

អតីតមេទ័ពជាយដែនរូបនេះ ក៏បានមើលឃើញថា ត្បិតប្រព័ន្ធការពារជាតិកម្ពុជា មិនអាចប្រៀបធៀបជាមួយប្រទេសថៃក៏ពិតមែន ប៉ុន្ដែផ្អែកតាមបទពិសោធន៍នៃការប្រយុទ្ធគ្នា២លើកកន្លងមក គឺកងទ័ពកម្ពុជាអាចទប់ទល់បាន ដែលបង្ហាញអំពីសមត្ថភាពខ្ពស់នៃការដឹកនាំបញ្ជារបស់រាជរដ្ឋាភិបាល ពិសេស សម្ដេចតេជោ ហ៊ុន សែន៕