(ភ្នំពេញ)៖ លោក ជា ធីរិទ្ធ អ្នកនាំពាក្យគណបក្សប្រជាជនកម្ពុជា បានថ្លែងបញ្ជាក់ថា បក្សនយោបាយក្នុងសម្ព័ន្ធភាព មានសិទ្ធសេរីភាពពេញលេញក្នុងការធ្វើនយោបាយ និងអនុវត្តទៅតាមតួនាទីរបស់ខ្លួនជាគណបក្សនយោបាយធម្មតា និងមានឯករាជ្យពេញលេញក្នុងសកម្មភាពបោះឆ្នោត ទាំងការបោះឆ្នោតឆ្នាំ២០២៧ និងការបោះឆ្នោតនៅឆ្នាំ២០២៨។

លើកឡើងក្នុងសន្និសីទសារព័ត៌មានស្តីពី «លទ្ធផលនៃកិច្ចប្រជុំប្រធានគណបក្សនយោបាយក្នុងសម្ព័ន្ធភាព» នាថ្ងៃទី២០ ខែឧសភា ឆ្នាំ២០២៦នេះ លោក ជា ធីរិទ្ធ បានថ្លែងបញ្ជាក់ថា កិច្ចព្រមព្រៀងរបស់គណបក្សក្នុងសម្ព័ន្ធភាព គឺសហប្រតិបត្តិការជាមួយគ្នាដោយស្មើភាពគ្នា ស្មើសិទ្ធិ គោរពនូវឯករាជ្យ និងស្វ័យភាពរបស់គណបក្សនីមួយៗ ដើម្បីផលប្រយោជន៍ជាតិ និងប្រជាជនកម្ពុជា។

ជាមួយនឹងការបោះឆ្នោតដែលនឹងខិតជិតចូលមកដល់ លោក ជា ធីរិទ្ធ បានបញ្ជាក់ឱ្យថា «ថ្វីដ្បិតគណបក្សសម្ព័ន្ធទាំង២៨ នៅជាមួយនឹងគណបក្សប្រជាជនក៏ពិតមែន ប៉ុន្តែពួកគាត់មានសិទ្ធសេរីភាពក្នុងការធ្វើនយោបាយ និងអនុវត្តទៅតាមតួនាទីរបស់ខ្លួនជាគណបក្សនយោបាយធម្មតា ហើយគាត់អាចចូលរួមក្នុងការបោះឆ្នោត ទាំងការបោះឆ្នោតឆ្នាំ២០២៧ និងការបោះឆ្នោតនៅឆ្នាំ២០២៨ គឺពួកគាត់អាចចូលរួមបានធម្មតានៃទំនៀមនៃគណបក្សនយោបាយ ដែលមានចែងក្នុងរដ្ឋធម្មនុញ្ញអំពីសេីពហុបក្ស»។

បើតាមលោក ជា ធីរិទ្ធ សម្ព័ន្ធភាពគណបក្សនយោបាយនេះមិនបានប៉ះពាល់ដល់សិទ្ធរបស់គណបក្សនីមួយៗក្នុងការចូលរួមបោះឆ្នោតនោះឡើយ ហើយបើទោះបីគណបក្សប្រជាជនកម្ពុជា មានសំលេងធំជាងគេក៏ដោយ តែគណបក្សទាំងអស់គឺមានសិទ្ធស្មើៗគ្នា៕