(កណ្ដាល)៖ លោក ឈឿន ប៊ុណ្ណារ័ត្ន រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់, លោក នូ សាខន ប្រធានក្រុមប្រឹក្សាខេត្តកណ្តាល និងលោក គួច ចំរើ​ន អភិបាលខេត្ត បានអញ្ជើញចែកវិញ្ញាបនបត្រ សម្គាល់ម្ចាស់អចលនវត្ថុ ជូនប្រជាពលរដ្ឋ ចំនួន១៣ភូមិ ស្ថិតឃុំគគី ស្រុកកៀនស្វាយ សរុប១២,៧៥២បណ្ណ នៅថ្ងៃទី២០ ខែឧសភា ឆ្នាំ២០២៦ នៅបរវេណសាលាស្រុកកៀនស្វាយ។

អភិបាលខេត្តកណ្តាល បានក្រើនរំលឹកដាច់ខាតដល់អាជ្ញាធរ និងមន្រ្តីជំនាញ មិនត្រូវចុះហត្ថលេខាបញ្ជាក់ឯកសារផ្សេងៗពាក់ព័ន្ធនឹងរឿងដីធ្លីជូនប្រជាពលរដ្ឋ ក្រៅពីបណ្ណកម្មសិទ្ធិដីធ្លីដែលបានចុះបញ្ជីរួចហើយនោះទេ។
លោកថា អាជ្ញាធរត្រូវទទួលស្គាល់តែបណ្ណកម្មសិទ្ធតែមួយគត់ប៉ុណ្ណោះ ចៀសវាងបង្កភាពស្មុគស្មាញ និងបង្កើតបញ្ហាផ្សេងៗ ពាក់ព័ន្ធនឹងរឿងដីធ្លីតទៅទៀត បើមន្ត្រីណានៅតែបន្តចុះហត្ថលេខាទៀត ត្រូវទទួលខុសត្រូវចំពោះមុខច្បាប់។

លោក គួច ចំរើន អភិបាលខេត្តកណ្តាល បានអំពាវនាវប្រជាពលរដ្ឋ សូមបន្តការគាំទ្រជឿជាក់ឱ្យបាន ខ្លាំងក្លាលើរាជរដ្ឋាភិបាលកម្ពុជា និងកងកម្លាំងប្រដាប់អាវុធ នៅចំពោះមុខនៃស្ថានភាពឈ្លានពានទឹកដីពីសំណាក់ប្រទេសថៃ។
លោកអភិបាលខេត្ត បានថ្លែងអំណរគុណ និងកោតសរសើរកងទ័ពជួរមុខ រួមជាមួយក្រុមគ្រួសារនៅជួរក្រោយ ដែលបានលះបង់សេចក្តីសុខផ្ទាល់ខ្លួនជាមួយក្រុមគ្រួសារ ដើម្បីបុព្វហេតុ ការពារបូរណភាពទឹកដីកម្ពុជា៕