(ព្រះវិហារ)៖ រដ្ឋបាលខេត្តព្រះវិហារ នាព្រឹកថ្ងៃទី២០ ខែឧសភា ឆ្នាំ២០២៦ បានរៀបចំពិធីមីទ្ទីង «ទិវាជាតិនៃការចងចាំ ២០ ឧសភា» ដើម្បីរំលឹកដល់វិញ្ញាណក្ខន្ធជនរងគ្រោះ និងការឈឺចាប់ពីឧក្រិដ្ឋកម្មដែលបានកើតឡើង ក្នុងរបបកម្ពុជាប្រជាធិបតេយ្យ (ខ្មែរក្រហម) ចាប់ពីថ្ងៃទី១៧ ខែមេសា ឆ្នាំ១៩៧៥ ដល់ថ្ងៃទី០៦ ខែមករា ឆ្នាំ១៩៧៩។

ពិធីនេះ ប្រព្រឹត្តទៅក្រោមអធិបតីភាពលោក ប្រាក់ សុវណ្ណ ប្រធានក្រុមប្រឹក្សាខេត្ត និងលោក គីម រិទ្ធី អភិបាលខេត្តព្រះវិហារ នៅបរិវេណតំបន់ឧក្រិដ្ឋកម្ម១០៣ ស្ថិតក្នុងស្រុករវៀង ខេត្តព្រះវិហារ ដោយមានការចូលរួមពីថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធ ព្រះសង្ឃ យុវជន និងប្រជាពលរដ្ឋយ៉ាងច្រើនកុះករ។

ក្នុងឱកាសនោះ គណៈអធិបតី និងអង្គពិធីទាំងមូល បាននាំគ្នាគោរពវិញ្ញាណក្ខន្ធ ប្រគេនស្លាដក បច្ច័យបង្សុកូល និងឧទ្ទិសកុសលផលបុណ្យ ជូនដល់វិញ្ញាណក្ខន្ធបុព្វបុរស យុទ្ធជន យុទ្ធនារី និងប្រជាពលរដ្ឋស្លូតត្រង់ជាង ៣លាននាក់ ដែលបានបាត់បង់ជីវិតយ៉ាងអយុត្តិធម៌ក្រោមរបបអាវខ្មៅដ៏ឃោរឃៅនោះ។

លោក គីម រិទ្ធី អភិបាលខេត្តព្រះវិហារ បានថ្លែងថា៖ទិវាជាតិនៃការចងចាំនេះ មិនត្រឹមតែជាការរំលឹកដល់ការឈឺចាប់ និងការបាត់បង់ដ៏ធំធេងរបស់ប្រជាជាតិកម្ពុជាប៉ុណ្ណោះទេ ប៉ុន្តែថែមទាំងជាការដាស់តឿនក្រើនរំលឹកដល់ ប្រជាពលរដ្ឋគ្រប់រូប ជាពិសេសយុវជនជំនាន់ក្រោយ ឱ្យយល់ដឹងពីតម្លៃនៃសន្តិភាព សេរីភាព និងស្ថិរភាពសង្គម ដែលកម្ពុជាកំពុងទទួលបាននាពេលបច្ចុប្បន្ន។

អភិបាលខេត្តព្រះវិហារ ក៏បានថ្លែងអំពាវនាវឱ្យប្រជាពលរដ្ឋទាំងអស់ រួមគ្នាថែរក្សា និងការពារ «សន្តិភាព» ឱ្យបានគង់វង្សជានិច្ច ដើម្បីទប់ស្កាត់មិនឱ្យរបបប្រល័យពូជសាសន៍ដ៏ឃោរឃៅបែបនេះ វិលត្រឡប់មកកើតឡើងជាថ្មីលើទឹកដីកម្ពុជាឡើយ៕