(ឧត្តរមានជ័យ)៖ លោក មាន ចាន់យ៉ាដា អភិបាលខេត្តឧត្តរមានជ័យ បានលើកឡើងថា មន្ត្រីរាជការស៊ីវិលមិនត្រឹមតែជាអ្នកអនុវត្តការងារបច្ចេកទេសប៉ុណ្ណោះទេ ប៉ុន្តែថែមទាំងជាអ្នកបម្រើសេវាសាធារណៈ រក្សាសន្តិសុខជាតិ សណ្ដាប់ធ្នាប់សាធារណៈ និងសុវត្ថិភាពសង្គម ជូនប្រជាពលរដ្ឋ និងប្រទេសជាតិផងដែរ។

ការថ្លែងលើកឡើងរបស់លោកអភិបាលខេត្តឧត្តរមានជ័យ ធ្វើឡើងក្នុងឱកាសដែលលោកអញ្ជើញចូលរួមក្នុងពិធី «ប្រកាសតួនាទីមន្ត្រីនៅក្នុងរចនាសម្ព័ន្ធរដ្ឋបាលខេត្តឧត្តរមានជ័យ មន្ទីរ អង្គភាព និងការពង្រឹងវិន័យ ដើម្បីលើកកម្ពស់ប្រសិទ្ធភាពការងាររបស់មន្ត្រីរាជការស៊ីវិល» នៅសាលប្រជុំរដ្ឋបាលខេត្ត នាព្រឹកថ្ងៃទី២០ ខែឧសភា ឆ្នាំ២០២៦។

លោក មាន ចាន់យ៉ាដា បានបញ្ជាក់ថា ការដំឡើងតួនាទី និងមុខតំណែងជូនមន្ត្រីរាជការនាពេលនេះ ត្រូវបានអនុវត្តដោយប្រកាន់ខ្ជាប់យ៉ាងម៉ឺងម៉ាត់នូវគោលការណ៍ច្បាប់ នីតិវិធី និងសេចក្ដីណែនាំជាធរមាន ដោយមានការវាយ តម្លៃយ៉ាងល្អិតល្អន់លើសមត្ថភាព ស្នាដៃ និងការខិតខំប្រឹងប្រែងរបស់មន្ត្រីម្នាក់ៗ។

លោកបានគូសបញ្ជាក់ថា រដ្ឋបាលខេត្តបានធានានូវតម្លាភាព យុត្តិធម៌ និងគ្មានការលម្អៀង មិនបក្សពួកនិយម និងមិនក្បត់មនសិការវិជ្ជាជីវៈ គុណធម៌ និងព្រហ្មវិហារធម៌ឡើយ។

ជាមួយគ្នានេះលោក មាន ចាន់យ៉ាដា ក៏បានថ្លែងរំលឹកមន្ត្រីរាជការថា ជាតួអង្គស្នូលដ៏សំខាន់ និងជាកម្លាំងចលករចម្បង ក្នុងការអនុវត្តច្បាប់ គោលនយោបាយ និងគោលការណ៍ណែនាំនានារបស់ក្រសួងមហាផ្ទៃ និងរាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា។

លោកអភិបាលខេត្ត បានថ្លែងអំពាវនាវថ្នាក់ដឹកនាំមន្ទីរ អង្គភាព និងមន្ត្រីរាជការទាំងអស់ ត្រូវបន្តយកចិត្តទុកដាក់លើកកម្ពស់សមត្ថភាពវិជ្ជាជីវៈរបស់ខ្លួនជាប្រចាំ ដើម្បីបង្កើនប្រសិទ្ធភាពការងារ និងឆ្លើយតបទៅនឹងតម្រូវការរបស់ ប្រជាពលរដ្ឋឱ្យបានទាន់ពេលវេលា និងមានប្រសិទ្ធភាពខ្ពស់។

លោក យឿន វិបុល នាយករងរដ្ឋបាលសាលាខេត្តឧត្តរមានជ័យ និងជាតំណាងមន្ត្រីដែលទទួលបានការតែងតាំងមុខតំណែងថ្មី បានឡើងធ្វើការប្ដេជ្ញាចិត្តថា នឹងបន្តស្មោះត្រង់ចំពោះជាតិ សាសនា ព្រះមហាក្សត្រ ការពារសុខសន្តិភាព និងស្ថិរភាពនយោបាយ ព្រមទាំងគោរព និងអនុវត្តតាមរដ្ឋធម្មនុញ្ញ ច្បាប់ និងបទបញ្ជានានារបស់រាជរដ្ឋាភិបាល។

លោកបានប្ដេជ្ញាថា នឹងខិតខំបំពេញភារកិច្ចបម្រើសេវាសាធារណៈជូនប្រជាពលរដ្ឋដោយស្មោះត្រង់ ពង្រឹងសាមគ្គីភាពផ្ទៃក្នុង និងសហការល្អជាមួយមន្ទីរ អង្គភាពជុំវិញខេត្ត ដើម្បីរួមចំណែកកសាង និងអភិវឌ្ឍខេត្តឧត្តរមានជ័យឱ្យកាន់តែរីកចម្រើនបន្ថែមទៀត៕