(រតនគិរី)៖​ បណ្ឌិត កៅ ថាច សមាជិកគណៈកម្មាធិការកណ្តាល និងជាសមាជិកយុវជន គណបក្សថ្នាក់កណ្តាល, លោក សាយ សាមាន អនុប្រធានគណបក្សខេត្ត និងជាអនុប្រធានប្រចាំការយុវជនគណបក្សខេត្តរតគិរី ជាតំណាងលោក ញ៉ែម សំអឿន អភិបាលនៃគណៈអភិបាលខេត្ត នៅព្រឹកថ្ងៃទី២០ ខែឧសភា ឆ្នាំ២០២៦នេះ បានអញ្ជើញចូលរួមនៅក្នុងសិក្ខាសិលា ស្តីអំពីកាលានុវត្តភាព និងទិសដៅវិនិយោគសម្រាប់អនាគត ដែលរៀបចំឡើងដោយ ផ្នែកសហគ្រិនវ័យក្មេងនៃយុវជនគណបក្សថ្នាក់កណ្តាល និងគណៈកម្មាធិការគណបក្សខេត្តរតនគិរី។

នៅក្នុងសិក្ខាសិលាដែលរៀបចំឡើងនៅក្រុងបានលុង ខេត្តរតនគិរីនេះ ក៏មានការអញ្ជើញចូលរួមពីវាគ្មិនសំខាន់ៗដូចជា ឧកញ៉ា ប៉ិច បូឡែន ប្រធានសមាគមសហគ្រិនវ័យក្មេងកម្ពុជា និងលោក លឹម សៀកផេង អនុប្រធាននាយកដ្ឋានសម្របសម្រួល កិច្ចការបរិស្ថានគម្រោងវិនិយោគនៃក្រុមប្រឹក្សាអភិវឌ្ឍន៍កម្ពុជា ព្រមទាំងយុវជនមកពីផែនសហគ្រិនវ័យក្មេងនៃយុវជន គណបក្សខេត្តរតនគិរី ដែលមានអ្នកចូលរួមសរុបប្រមាណ ១០០នាក់។

បណ្ឌិត កៅ ថាច បានជម្រាបជូនវេទិកានោះថា ក្នុងស្ថានភាពមួយដែលពិភពលោក កំពុងតែប្រឈមមុខនឹងភាពតានតឹងនៃសង្រ្គាមរុស្សីនិងអ៊ុយក្រែន ព្រមទាំងសង្រ្គាមនៅមជ្ឈឹមបូព៌ា កម្ពុជាយើងក៏ទទួលរងសម្ភាធផងដែរ ដូច្នោះហើយកម្មវិធីថ្ងៃនេះក៏ជាឱកាស ដែលយុវជនយើងគួរបង្កើនសមត្ថភាព ចំណេះដឹង ជំនាញឲ្យខ្លាំង និងការចាប់យកឱកាសថ្មីៗលើវិស័យសហគ្រិនភាព ព្រមទាំងការវិនិយោគផងដែរ។

ក្នុងឱកាសនោះ បណ្ឌិត កៅ ថាច ក្នុងនាមជាសមាជិកយុវជនគណបក្សថ្នាក់កណ្តាលបានរំលឹកជូនថា ភាពខុសគ្នារវាងអាជីវកម្មពីសម័យអង្គរ និងបច្ចុប្បន្នដែលក្នុងនាមយើងជាយុវជនរបស់គណបក្ស ត្រូវតែស្វែងយល់ឲ្យច្បាស់ពីដំណាក់កាលមួយ ទៅដំណាក់កាលមួយ ជាពិសេស ការអភិវឌ្ឍន៍សេដ្ឋកិច្ចបែបថ្មី។ ជាក់ស្តែងសម័យអង្គរខ្មែរយើងធ្វើកសិកម្មជាជន្ទុល នៃសេដ្ឋកិច្ចគឺមិនទៅណាឆ្ងាយទេ រួមមាន តឹកតាងស្រាប់ បារ៉ាយទឹកនៅតំបន់អង្គរជាប្រភពទឹកសម្រាប់ធ្វើកសិកម្ម ដែលខ្មែរយើងក្លាយជាអាណាចក្រមួយដ៏រុងរឿង ដល់ចំណុចកំពូលដោយសារតែវិស័យកសិកម្មនាសម័យនោះ។

សម្រាប់បណ្ឌិត កៅ ថាច បានផ្ញើសារចុងក្រោយ ជូនយុវជនគណបក្សនៅខេត្តរតនគិរីថា «យើងជាយុវជនរបស់ណបក្សទាំងអស់គ្នាត្រូវខិតខំ កសាងសមត្ថភាពឲ្យខ្លាំង ទើបជាតិយើងខ្លាំងដែរ ក្នុងនោះមានទាំងចំណេះ និងជំនាញច្បាស់លាស់ ទើបអាចជួយប្រទេសជាតិយើងខ្លាំងដែរ ។ បើយើងម្នាក់ៗខ្សោយហើយ​ ជាតិយើងនឹងខ្សោយដែរ ដូច្នោះចំណុចនេះ ជាចំណុចសំខាន់ដែលយុវជនយើងគ្រប់គ្នាត្រូវចងចាំថា យើងទាំអស់គ្នាជាចំណែកមួយនៃការកសាងជាតិ​ ដូច្នេះយើងត្រូវតម្រង់ទិសខ្លួនឯងដើម្បីឆ្ពោះទៅរកការធ្វើអាជីវកម្មថ្មីៗ និងអាជីវកម្មពាក់ព័ន្ធនិងបរិបទថ្មី គឺ សេដ្ឋកិច្ចមូលធនចំណេះដឹង និងសេដ្ឋកិច្ចបៃតង»៕