កម្លាំងនគរបាល នៃអគ្គស្នងការដ្ឋាននគរបាលជាតិ ចុះបង្រ្កាបទីតាំងសង្ស័យលួចលាក់ប្រព្រឹត្តបទល្មើស Online Scams នៅចំណុចមជ្ឈមណ្ឌលបាវិតផ្លាហ្សា ក្រុងបាវិត
20-05-2026 17:29
(ស្វាយរៀង)៖ អនុវត្តតាមបទបញ្ជារបស់នាយឧត្តមសេនីយ៍ ស ថេត អគ្គស្នងការនគរបាលជាតិ និងលោកឧត្តមសេនីយ៍ឯក ឌី វិជ្ជា អគ្គស្នងការរងនគរបាលជាតិ, កម្លាំងអគ្គស្នងការដ្ឋាននគរបាលជាតិ កាលថ្ងៃទី១៧ ខែឧសភា ឆ្នាំ២០២៦ ដោយមានការចូលរួមពីកម្លាំងនគរបាលខេត្តស្វាយរៀង កម្លាំងគណៈបញ្ជាការឯកភាពរដ្ឋបាលក្រុងបាវិត ក្រោមការសម្របសម្រួលពីលោកស្រី ពៅ ទេវី ព្រះរាជអាជ្ញារងនៃអយ្យការអមសាលាដំបូងខេត្ត បានចុះស្រាវជ្រាវ និងបង្រ្កាបទីតាំងសង្ស័យលួចលាក់ប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា (Online Scams) នៅចំណុចមជ្ឈមណ្ឌលបាវិតផ្លាហ្សា ស្ថិតក្នុងភូមិបាវិតកណ្តាល សង្កាត់បាវិត ក្រុងបាវិត។
នៅក្នុងប្រតិបត្តិការនេះ កម្លាំងនគរបាល បានឃាត់ខ្លួនមនុស្សក្នុងរង្វង់ប្រតិបត្តិការចំនួន១២៩នាក់ (ស្រី៧នាក់) ក្នុងនោះរួមមាន៖ វៀតណាម ១១នាក់ (ស្រី២នាក់) ចិន ១០៣នាក់ (ស្រី០៥នាក់) ប៉ាគីស្ថាន ១០នាក់ បង់ក្លាដេស ០៤នាក់ និងមីយ៉ាន់ម៉ាម្នាក់។
នៅក្នុងប្រតិបត្តិការនេះ កម្លាំងនគរបាល បានដកហូតសម្ភារពាក់ព័ន្ធនឹងបទល្មើសរួមមាន៖ កំព្យូទ័រលើតុ All-In-One, ទូរស័ព្ទដៃ និងសម្ភារប្រើប្រាស់មួយចំនួនទៀត។
បច្ចុប្បន្ន ជនសង្ស័យរួមទាំងវត្ថុតាង ត្រូវបានសមត្ថកិច្ចជំនាញ កំពុងកសាងសំណុំរឿងបញ្ជូនទៅសាលាដំបូងខេត្ត ដើម្បីចាត់ការតាមនីតិវិធីច្បាប់ រីឯទីតាំងប្រព្រឹត្តិបទល្មើសបានក្រុមការងារបិទស៊ីលបិទទីតាំងបណ្ដោះអាសន្ន៕
