(កំពត)៖ គណៈប្រតិភូអន្តរក្រសួង រួមមាន ក្រសួងអភិវឌ្ឍន៍ជនបទ និងក្រសួងសេដ្ឋកិច្ច និងហិរញ្ញវត្ថុ ដឹកនាំដោយ លោកបណ្ឌិត សៅ ជីវ័ន្ត រដ្ឋលេខាធិការ តំណាងលោក ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ នៅថ្ងៃទី២០ ខែឧសភា ឆ្នាំ២០២៦ បានចុះត្រួតពិនិត្យវាយតម្លៃប្រគល់-ទទួលបញ្ចប់ជាស្ថាពរ រយៈពេលធានាសុពលភាព ៦ខែ គុណភាពការងារថែទាំខួបផ្លូវដោយក្រាលល្បាយថ្មភ្នំ ចំនួន ២ខ្សែ ប្រវែងសរុប ៩៣៥០ម៉ែត្រ ទទឹង ៤ម៉ែត្រ និង៥ម៉ែត្រ កម្រាស់ ០,២ម៉ែត្រ ស្ថិតនៅឃុំប្រភ្នំ និងឃុំសំឡាញ ស្រុកអង្គរជ័យ ខេត្តកំពត ស្ថិតក្នុងគម្រោងលេខ DRR-PM-2025-No.014 ដែលជាផែនការឆ្នាំ២០២៥ របស់មន្ទីរអភិវឌ្ឍន៍ជនបទខេត្តកំពត។

ផ្លូវទាំងពីរខ្សែនេះរួមមាន ផ្លូវក្រាលល្បាយថ្មភ្នំ មានប្រវែងសរុប ៥៦០០ ម៉ែត្រ ដែលចាប់ពីក្លោងទ្វាវត្តយសមន្រី្ត ចំណុចផ្លូវជាតិលេខ៣១ ដល់ស្តុក និងផ្លូវក្រាលល្បាយថ្មភ្នំមួយខ្សែទៀត មានប្រវែងសរុប ៣៧៥០ ម៉ែត្រ ចំណុចផ្លូវជាតិលេខ៣១ ដែលផ្លូវទាំងពីរខ្សែនេះ ស្ថិតក្នុងឃុំប្រភ្នំ និងឃុំសំឡាញ ស្រុកអង្គរជ័យ ខេត្តកំពត។

លោក ហ៊ សូរិន ប្រធានមន្ទីរអភិវឌ្ឍន៍ជនបទ បានរាយការណ៍អំពីវឌ្ឍនភាពរបស់មន្ទីក្នុងការងាររថែទាំខួបខ្សែផ្លូវទាំង ២ខ្សែ សម្រេចលទ្ធផលបាន ១០០% ដែលមន្ទីអនុវត្តបានត្រឹមត្រូវ តាមបទដ្ឋានបច្ចេកទេស។ លោកប្រធានមន្ទីរ ក៏បានជម្រាបជូន អំពីសារៈប្រយោជន៍ដែលប្រជាពលរដ្ឋទទួលបានផ្លូវទាំង ២ខ្សែនេះ ដែលនឹងជួយសម្រួលដល់ការធ្វើចរាចរទៅមក ដឹកជញ្ជូនផលិតផលកសិកម្ម និងកសិឧស្សាហកម្ម ពិសេសការធ្វើដំណើររបស់សិស្សានុសិស្សទៅរៀន ការដឹកអ្នកជំងឺមកកាន់មណ្ឌលសុខភាព បានទាន់ពេលវេលា។

ក្នុងឱកាសនៃការចុះត្រួតពិនិត្យនេះ លោកបណ្ឌិត សៅ ជីវ័ន្ត រដ្ឋលេខាធិការ ក៍បានពាំនាំមកនូវការផ្ទាំផ្ញើសាកសួរសុខទុក្ខពីសំណាក់ លោក ឆាយ ឬទ្ធិសែន រដ្ឋមន្រ្តីក្រសួងអភិវឌ្ឍន៍ជនបទ និងបានធ្វើការកោតសសើរ និងវាយតម្លៃខ្ពស់ ចំពោះការខិតខំបំពេញការងាររបស់មន្ទីអភិវឌ្ឍន៍ជនបទខេត្ត ព្រមទាំងបានធ្វើការផ្តាំផ្ញើដល់មន្ទីអភិវឌ្ឍន៍ខេត្ត សូមធ្វើការត្រួតពិនិត្យលើការងារថែទាំផ្លូវខាងលើឱ្យបានល្អ ដើម្បីធានាគុណភាព សោភ័ណភាព និងសុវត្ថិភាព និងត្រូវធ្វើការសហការជាមួយអាជ្ញាធរមូលដ្ឋាន ក្នុងការណែនាំប្រជាពលរដ្ឋ ឱ្យចូលរួមថែរក្សាផ្លូវទាំងនេះ ពិសេសហាមឃាត់មិនឱ្យមានការដឹកទំងន់កំណត់ ដើម្បីរក្សាគុណភាពផ្លូវឱ្យនៅគង់វង្សយូរអង្វែង។

លោករដ្ឋលេខាធិការ ក៏បានណែនាំឱ្យមន្ទីរអភិវឌ្ឍន៍ជនបទ ដាក់ផ្លូវថែទាំខួបខាងលើនេះ ដែលមានការតភ្ជាប់ពីខេត្តកំពត ទៅខេត្តតាកែវ ចូលទៅក្នុងគម្រោងផ្លូវកៅស៊ូ ដើម្បីលើកកម្រិតគុណភាពផ្លូវអន្តរខេត្តងាយស្រួលដឹកជញ្ជូន និងធ្វើដំណើរពីខេត្តកំពត ផ្លូវជាតិលេខ៣ ទៅខេត្តតាកែវផ្លូវជាតិលេខ២ ក្នុងឆ្នាំក្រោយនេះ ដើម្បីឆ្លើយតបតម្រូវការរបស់ប្រជាពលរដ្ឋ៕