(កំពង់ធំ)៖ អាជ្ញាធរ និងសមត្ថកិច្ច ស្រុកតាំងគោក នារសៀលថ្ងៃទី ២០ ខែឧសភាឆ្នាំ ២០២៦នេះបានបំភ្លឺជុំវិញពីការចុះផ្សាយ ករណី ដីព្រៃលិចទឹកតំបន់២ ជាច្រើនហិចតា ត្រូវបានជនខិលខូចលួចដាក់ត្រាក់ទ័រភ្ជួរឈូសឆាយ​ ហើយអាជ្ញាធរនិងសមត្ថកិច្ច ជំនាញរក្សាភាពស្ងប់ស្ងាត់ ខណៈរដ្ឋបាលស្រុកតែងតែយកចិត្តទុកដាក់ក្នុងការចុះល្បាតតាមដានត្រួតពិនិត្យនៅការប្រើប្រាស់ដីតំបន់ពីរនេះ។

តាមសេចក្តីបំភ្លឺ រដ្ឋបាលស្រុកតាំងគោក បានបញ្ជាក់ថា​ កន្លងមកនេះរដ្ឋបាលស្រុកតែងតែយកចិត្តទុកដាក់ក្នុង ការចុះល្បាតតាមដានត្រួតពិនិត្យនៅការប្រើប្រាស់ដីតំបន់II ទប់ស្កាត់ការទន្ទ្រានប្រើប្រាស់ដីតំបន់III និងព្រៃលិចទឹក តាមរយៈអាជ្ញាធរ-ក្រុមទីបញ្ជាការស្រាល។

ព័ត៌មានដែលបានលើកនេះ ក្រុមការងារដែលដឹកនាំដោយ លោក មិន ទឹម អភិបាលរងស្រុក បានដឹកនាំក្រុមការងារដោយមាន ក្រុមប្រឹក្សាឃុំទ្រៀល ១នាក់ ក្រុមប្រឹក្សាឃុំស្រឡៅ ១នាក់ កម្លាំងកងពលតូច៧០ចំនួន ២នាក់ និងមន្ត្រីជលផលប្រចាំស្រុកតាំងគោកផងដែរ បានចុះទៅពិនិត្យមើលការ ភ្ជួរដីនោះជាច្រើនលើកជាច្រើនសារដើម្បីផ្ទៀងផ្ទាត់ចុងក្រោយ នៅថ្ងៃទី១៩ ខែឧសភា ឆ្នាំ២០២៦ ជាលទ្ធផល បង្ហាញថា ៖១. ដីដែលបងប្អូនប្រជាពលរដ្ឋភ្ជួរនោះគឺស្ថិតនៅតំបន់II ។ ដីមួយចំនួនបងប្អូនបានភ្ជួរជាច្រើនកន្លងមក គឺមិនភ្ជួរលើដីព្រៃលិចទឹកនោះទេ។
​​​
ថ្លែងប្រាប់ភ្នាក់ងារ Fresh News ប្រចាំខេត្តកំពង់ធំនារសៀលថ្ងៃទី២០ ខែឧសភា ឆ្នាំ២០២៦នេះ លោក គឹម ហេង ប្រធានសហគមន៍ជ្រោយកគោ បានបញ្ជាក់ថាសហគមន៍មានសមាជិក ១២៥គ្រួសារ និងផ្ទៃដីជាង៧០០ហិចតា។

ចំពោះការភ្ជួររាស់មិនធ្វើលើផ្ទៃដីព្រៃលិចទឹករាប់រយហិចតានោះទេ ដោយនៅឆ្នាំ២០២៤ការភ្ជួររាស់និងធ្វើស្រែគឺប្រើប្រាស់ទឹកមិនបានគ្រប់គ្រាន់ទើបប្រជាពលរដ្ឋទុកចោលបន្តទៀត ប៉ុន្តែដីទាំអស់នេះគឺជាដីដែលបានវាស់វែងចេញប័ណ្ណកាន់កាប់ត្រឹមត្រូវ។

លោកបន្តថា ទោះបីដីនោះមានប័ណ្ណកាន់កាប់មែន តែការភ្ជួរាស់គឺភ្ជួរាស់លើដីគ្មានព្រៃទេ បើសិនមានព្រៃគឺមិនហ៊ានភ្ជួរាស់ជាដាច់ខាតព្រោះមានទីបញ្ជាករស្រាលមកមើលជានិច្ច។

លោក ចាន់ ស៊ីណា សមាជិកក្រុមប្រឹក្សាឃុំទ្រៀល និងជាសមាជិកទីបញ្ជាការស្រាលស្រុកតាំងគោក បានឱ្យដឹងថា ដីនេះគឺជាដីដែលបានកាត់ឆ្វៀលរួចហើយ ហើយដីនេះគឺជាដីសមាជិកសហគមន៍ជ្រោយគោកពិតប្រាកដ មិនបានភ្ជួរលើដីមានព្រៃនោះទេ ។

លោក កែវ សុខឃឿន មន្រ្តីជលផល បានលើកឡើងថា ដីនេះជាដីស្ថិតនៅក្នុងតំបន់សហគមន៍ជ្រោយកគោដែលបានកាត់ឆ្វៀល ការពិនិត្យជាក់ស្តែងមិនមានព្រៃទេនោះទេអាចភ្ជួរាស់បានតែមិនអនុញ្ញាតិឲ្យភ្ជួរលើដីដែលមានព្រៃនោះទេបើទោះបីជាដីមានការកាត់ឆ្វៀលហើយក៏ដោយ ។

លោក ម៉ន ទីម អភិបាលរងស្រុក និងជាប្រធានទីបញ្ជាការស្រាលស្រុកតាំងគោក បានបញ្ជាក់ថា លោកមិនអនុញ្ញាតឱ្យមានការភ្ជូររាល់ទេ ទោះបីដីវាស្រឡះក៏ដោយប្រសិនជាដីមិនបានកាត់ឆ្វៀល។

លោកបញ្ជាក់ថាជំនាញបញ្ចាក់ថាដីនេះបានកាត់ឆ្វៀលរួចហើយ ពីមាត់ស្ទឹងជាង១០០ ម៉ែត្រ ហើយការភ្ជួរាស់មិនបានភ្ជួរាស់លើដីព្រៃលិចទឹកទេ៕