(ភ្នំពេញ)៖ មន្ទីរពេទ្យព្រះអង្គឌួង នៅថ្ងៃទី២០ ខែឧសភា ឆ្នាំ១០២៦ បានរៀបចំកម្មវិធីដាក់ឱ្យប្រើប្រាស់ជាផ្លូវការ នូវម៉ាស៊ីន Endoscope សម្រាប់ធ្វើ ERCP ដែលមានតួនាទីសម្រាប់ពិនិត្យ និងព្យាបាល បញ្ហាក្នុងបំពង់ទឺកប្រមាត់ និងលំពែង។

ពិធីដាក់ឲ្យប្រើប្រាស់ជាផ្លូវការនូវឧបករណ៍ដ៏មានសារៈសំខាន់ខាងលើនេះ បានធ្វើឡើងក្រោមអធិបតីភាព លោកសាស្ត្រាចារ្យរង លូ លីឃាង នាយកមន្ទីរពេទ្យព្រះអង្គឌួង។

លោកសាស្ត្រាចារ្យបានថ្លែងថា ម៉ាស៊ីន Endoscope សម្រាប់ធ្វើ ERCP គឺសម្រាប់ចាប់ក្រួសក្នុងបំពង់បង្ហូរទឹកប្រមាត់ ពិនិត្យការស្ទះ ឬការរលាក អាចដាក់បំពង់តូច (stent) ដើម្បីបើកការស្ទះ សម្រាប់យកគំរូកោសិកា (biopsy) ពិនិត្យរកជំងឺមហារីក រាល់ការព្យាបាលដោយមិនចាំបាច់វះកាត់ធំ ហើយអ្នកជំងឺសម្រាកពេទ្យរយៈពេលខ្លី។

ជុំវិញនឹងឧបករណ៍ដ៏ទំនើបនេះ លោកនាយកមន្ទីរពេទ្យព្រះអង្គឌួង បានណែនាំឲ្យលោកសាស្ត្រាចារ្យ វេជ្ជបណ្ឌិត ក្រុមគ្រូពេទ្យឯកទេស ត្រូវពង្រឹង និងបណ្តុះបណ្តាលធនធានជំនាន់ក្រោយៗបន្ថែមទៀត ដើម្បីបម្រើសេវាលើឯកទេសទាំងនេះកាន់តែប្រសើរជូនប្រជាពលរដ្ឋ។

លើសពីនោះលោកសាស្ត្រាចារ្យបានលើកទឹកចិត្តឲ្យក្រុមគ្រូពេទ្យទាំងអស់ បន្តសាមគ្គីគ្នា និងរួមគ្នាថែរក្សាសម្ភារៈបរិក្ខារពេទ្យខាងលើនេះឲ្យបានគង់វង្យ៕