(កំពង់ធំ)៖ អភិបាលស្រុកស្ទោង បានលើកឡើងថា ការបើកពង្រីកផ្លូវចូលវិទ្យាល័យរស្មីសោភ័ណ ជាការចូលរួមចំណែកលើកកម្ពស់វិស័យអប់រំ និងស្របតាមយុទ្ធសាស្ត្ររបស់រាជរដ្ឋាភិបាល។ លោក សាយ គឹមឡម បានលើកឡើងដូច្នេះ ក្នុងឱកាសដែលលោក និងសហការី បានអញ្ជើញចុះពិនិត្យមើលវឌ្ឍនភាព នៃការបើកពង្រីកផ្លូវចូលវិទ្យាល័យរស្មីសោភ័ណ ស្ថិតនៅក្នុងភូមិសាមក្អោក ឃុំទ្រា ស្រុកស្ទោង ខេត្តកំពង់ធំ កាលពីព្រឹកថ្ងៃទី២១ ខែឧសភា ឆ្នាំ២០២៦។

លោកបានសង្កត់ធ្ងន់ថា ផ្លូវថ្មីនេះលើសពីសោភ័ណភាព ការធ្វើដំណើរបានស្រួលនិងសុវត្ថិភាព វាក៏ជាប្រព័ន្ធរំដោះទឹកកុំឱ្យជនលិចទីរួមស្រុកស្ទោងក៏ដូចជាវិទ្យាល័យសោភ័ណ ព្រោះមានប្រព័ន្ធប្រឡាយរំដោះទឹកនៅ អមសងខាងផងដែរ ដែលកន្លងមកតែងតែរងគ្រោះពីគ្រោះធម្មជាតិទឹកជំនន់ជារឿយៗ និងបង្កការរំខានដល់ការសិក្សារៀនសូត្ររបស់សិស្សានុសិស្សថែមទៀត។

ទន្ទឹមនឹងនេះ លោកបានអំពាវនាវលោកនាយក លោកគ្រូ អ្នកគ្រូមសិស្សានុសិស្ស និងសាធារណៈជនសូមជួយថែរក្សាការពារនូវ សមិទ្ធផលដ៏ថ្មីស្រឡាងនេះដើម្បីទុកជាប្រយោជន៍រួមរបស់ស្រុកស្ទោង និងជាសម្បត្តិសាធារណៈរបស់រដ្ឋ ផងដែរ ហើយធានាបាននូវសោភ័ណភាពស្រស់បំពង់ បរិស្ថានល្អ និងគុណភាពយូរអង្វែងថែមទៀត។

ទន្ទឹមនឹងនេះលោកអភិបាលស្រុក បានអំពាវបន្ថែមថែមទៀតសាធារណៈជន ជាពិសេសអ្នកទីរួមស្រុកស្ទោង សូមអញ្ជើញទៅចូលរួមធ្វើលំហាត់ប្រាណដើម្បីថែរក្សាសុខភាពឱ្យបានមាំទាំ និងជាប់ជាប្រចាំ ព្រោះនៅទីនេះ មានបរិស្ថានល្អប្រកបដោយសុខសុវត្ថិភាព ជាមួយអនុស្សាវរីយ៍ចាស់ថ្មីថែមទៀត។

សូមបញ្ជាក់ថា ការបើកពង្រីកផ្លូវនេះ គឺលោកបានធ្វើតាមសន្យាដែលលោកបានសន្យាកាលពីពេលថ្មីៗនេះដែលជាថវិការបស់លោកផ្ទាល់ ដែលមានទទឹងម្ខាង ៥ម៉ែត្រ ប្រវែងជិត៣០០ម៉ែត្រ មានដាក់បំពាក់សូឡាអមសងខាង និងដាំដើមឈើលម្អ និងប្រណីតជាង ១០០ដើម ថែមទាំងដាក់ក្រាលថ្មមិច ហើយវិទ្យាល័យនេះមានគ្រូសរុប ៦២នាក់ ស្រី២៤នាក់ សិស្សសរុប ២៣៣០នាក់ ស្រី ១២៦៣នាក់៕