(សៀមរាប)៖ ព្រះគ្រូវិចិត្រវង្សា ហែម គឹមសាន ញាតិធម្មោ ព្រះគ្រូចៅអធិការវត្តប្រាសាទគោកចក និងជាទីប្រឹក្សាពុទ្ធិកសមាគមកម្ពុជរដ្ឋ និងលោកស្រី ម៉ក់ វិបុល ក្រុមការងារសាលាខេត្តចុះមូលដ្ឋាន សង្កាត់គោកចក ក្រុងសៀមរាប នៅរសៀលថ្ងៃទី២០ ខែឧសភា ឆ្នាំ២០២៦នេះ បាននិមន្ត និងអញ្ជើញចុះសួរសុខទុក្ខ និងចែកនូវស្បៀងអាហារដល់ប្រជាពលរដ្ឋមានជីវភាពខ្វះខាត ចំនួន២៥២គ្រួសារ មកពីភូមិវាល សង្កាត់គោក ក្រុងសៀមរាប។

ក្នុងឱកាសនោះ លោកស្រី ម៉ក់ វិបុល បានពាំនាំនូវការផ្តាំផ្ញើរបស់ឧបនាយករដ្ឋមន្ត្រី ទៀ សីហា រដ្ឋមន្ត្រីក្រសួងការពារជាតិ និងជាប្រធានក្រុមការងាររាជរដ្ឋាភិបាល ចុះមូលដ្ឋានខេត្តសៀមរាប និងលោក ប្រាក់ សោភ័ណ អភិបាលខេត្ត ដែលលោកតែងតែយកចិត្តទុកដាក់ពីសុខទុក្ខរបស់បងប្អូនក្នុងខេត្តសៀមរាប។ ពិសេសនោះ គឺសុខទុក្ខបងប្អូនដែលបានស្ម័ត្រចិត្តផ្លាស់ប្តូរទីតាំង ទៅនៅទីតាំងថ្មី ក្រុងរុនតាឯកតេជោសែន។

លោកស្រីក៏បានធ្វើការណែនាំដល់បងប្អូនដែលមានសមាជិកគ្រួសារខ្លួន ដែលមានអត្តសញ្ញាណប័ណ្ណជិតផុតសុពលភាព និងអ្នកគ្រប់អាយុ សូមមកធ្វើអត្តសញ្ញាណ ប័ណ្ណសញ្ជាតិខ្មែរ ដើមី្បយកទៅបម្រើការងារផ្ទាល់ខ្លួន និងត្រៀមលក្ខណៈចូលរួមការបោះឆ្នោតជ្រើសរើសក្រុមប្រឹក្សាឃុំ សង្កាត់នៅឆ្នាំ២០២៧ខាងមុខ។

ព្រះគ្រូវិចិត្រវង្សា ហែម គឹមសាន មានថេរដីកាថា នៅក្នុងពុទ្ធសាសនាគោលការណ៍គ្រឹះគឺ «មេត្តា» (ការប្រាថ្នាឲ្យអ្នកដទៃមានសេចក្តីសុខ) និង «ករុណា» (ការជួយសង្គ្រោះអ្នកដទៃឲ្យរួចផុតពីទុក្ខ) នេះគឺជាការផ្សារភ្ជាប់ធម៌វិន័យទៅនឹងការដោះស្រាយបញ្ហាសង្គម។ ហើយព្រះសង្ឃ ដើរតួជាអ្នកដឹកនាំស្មារតីផង និងជាអ្នកសម្របសម្រួលជីវភាពផង ដើម្បីបង្ហាញពីភាពម្ចាស់ការលើការផ្គត់ផ្គង់ស្បៀង ដោយធានាថាបងប្អូនញាតិញោម ដែលមានជីវភាពខ្វះខាត មិនត្រូវដាច់ពោះស្លាប់នោះឡើយ។

ព្រះគ្រូវិចិត្រវង្សា មានថេរដីកាបន្តថា នាពេលកន្លងមកព្រះអង្គក៏បានផ្គត់ផ្គង់ជាស្បៀងអាហារ ដល់បងប្អូនញាតិញោមដែលជួបការ ខ្វះខាតក្នុងជីវភាពគ្រួសារ ព្រមទាំងបងប្អូនជនភៀសសឹក ដែលមកស្នាក់អាស្រ័យនៅក្នុងទីវត្ត ព្រមទាំងបានបង្កើតសួនបន្លែ សម្រាប់ធ្វើការផ្គត់ផ្គង់ទៀតផង។

ព្រះគ្រូវិចិត្រវង្សា ហែម គឹមសាន មានថេរដីកាបញ្ជាក់ថា ការចែកទាននេះ គឺជាការបង្រៀនតាមរយៈសកម្មភាពផ្ទាល់ ដែលបង្ហាញឲ្យឃើញថា ការលះបង់នូវអ្វីដែលខ្លួនមាន ដើម្បីអ្នកដទៃ គឺជាការកសាងសន្តិភាព និងកុសលធម៌ដ៏ឧត្តុង្គឧត្តម ដែលនាំឲ្យសង្គមមានសុខដុមរមនាហើយសកម្មភាពនេះគឺជា «ការចែករំលែកដោយគ្មានការរើសអើង» មិនថា ជនភៀសសឹកមានជំនឿសាសនាអ្វីឡើយ ព្រះសង្ឃតែងតែផ្ដល់នូវក្ដីស្រឡាញ់ និងការគាំទ្រក្នុងនាមជាមនុស្សជាតិដូចគ្នា៕