(ស្វាយរៀង)៖ លោកវរសេនីយ៍ឯក សោម សុភ័ណ្ឌ អធិការនគរបាលស្រុកស្វាយជ្រំ នៅថ្ងៃទី២០ ខែឧសភា ឆ្នាំ២០២៦ បានបញ្ជាឲ្យកម្លាំងអធិការដ្ឋាននគរបាលស្រុក សហការជាមួយកម្លាំងប៉ុស្តិ៍នគរបាលរដ្ឋបាលតាសួស និងកម្លាំងប៉ុស្តិ៍នគរបាលរដ្ឋបាលស្វាយជ្រំ បានហៅក្មេងទំនើង១០នាក់ ដែលបង្កអុកឡុក និងរករឿងវាយគ្នានៅក្នុងទីធ្លាសាលាវិទ្យាល័យ ហ៊ុន សែន ស្វាយជ្រំ មកអធិការដ្ឋាននគរបាលស្រុកស្វាយជ្រុំ ដើម្បីសួរនាំ។

លោក សោម សុភ័ណ្ឌ បានឲ្យដឹងថា នៅចំពោះមុខសមត្ថកិច្ច ក្មេងទំនើងទាំង១០នាក់ បានឆ្លើយសារភាពថា កាលពីថ្ងៃទី១៩ ខែឧសភា ឆ្នាំ២០២៦ ពេលពួកខ្លួនមករៀននៅវិទ្យាល័យ ហ៊ុន សែន ស្វាយជ្រំ ក៏បានទាស់សំដីគ្នាទៅវិញទៅមក ក៏បានបង្កអុកឡុករករឿងគ្នា វាយគ្នាទៅវិញទៅមកនៅក្នុងទីធ្លាវិទ្យាល័យ ហ៊ុន សែន ស្វាយជ្រុំ ពិតប្រាកដមែន។

លោកបានបញ្ជាក់ថា ដោយមានការឯកភាពពីលោកឧត្តមសេនីយ៍ទោស្នងការ និងលោក ខាំ សុផារី ព្រះរាជអាជ្ញាអមសាលាដំបូងខេត្តស្វាយរៀង នគរបាលយើងបានអនុញ្ញាតឲ្យធ្វើកិច្ចសន្យាអប់រំដល់ក្មេងទំនើងទាំង១០នាក់ និងឲ្យអាណាព្យាបាលធ្វើលិខិតធានាយកទៅផ្ទះវិញ ដើម្បីអប់រំបន្តកុំឲ្យធ្វើអ្វីខុសនិងផ្លូវច្បាប់បន្តទៀត។

ចំណែកម៉ូតូ ៣គ្រឿងរបស់ក្រុមក្មេងទំនើងរក្សាទុកនៅអធិការដ្ឋាននគរបាលស្រុកយរៈពេលចំនួន ៣ខែ៕