(មណ្ឌលគិរី)៖​ លោកបណ្ឌិត កៅ ថាច សមាជិកគណៈកម្មាធិការកណ្តាល និងជាសមាជិកយុវជន គណបក្សថ្នាក់កណ្តាល និងលោក ថង សាវុន អភិបាលខេត្តមណ្ឌលគិរី និងជាប្រធានគណៈកម្មាធិការគណបក្ស ខេត្តនៅព្រឹកថ្ងៃទី២១ ខែឧសភា ឆ្នាំ២០២៦នេះ បានអញ្ជើញថ្លែងសន្ទរកថាបើកកម្មវិធីស្តីពីកាលានុវត្តភាព និងទិសដៅវិនិយោគសម្រាប់អនាគត ដែលរៀបចំឡើងដោយផ្នែកសហគ្រិនវ័យក្មេង នៃយុវជនគណបក្សថ្នាក់កណ្តាល និងគណៈកម្មាធិការគណបក្សខេត្តមណ្ឌលគិរី។

សិក្ខាសិលាដែលរៀបចំឡើងនៅខេត្តមណ្ឌលគិរីក៏មានការចូលរួមពីវាគ្មិនសំខាន់ៗ ដូចជា ឧកញ៉ា ប៉ិច បូឡែន ប្រធានសមាគមសហគ្រិនវ័យក្មេងកម្ពុជា និងលោក លឹម សៀកផេង អនុប្រធាននាយកដ្ឋានសម្របសម្រួលកិច្ចការបរិស្ថានគម្រោងវិនិយោគនៃក្រុមប្រឹក្សាអភិវឌ្ឍន៍កម្ពុជា ព្រមទាំងយុវជនមកពីផែនសហគ្រិនវ័យក្មេងនៃយុវជនគណបក្សខេត្តមណ្ឌលគិរីដែលមានអ្នកចូលរួមសរុបប្រមាណ ១០០នាក់។

នាឱកាសនោះលោក ថង សាវុន បានថ្លែងកោតសរសើរដល់យុវជនគណបក្សថ្នាក់កណ្តាលផ្នែកផែនសហគ្រិនវ័យក្មេង និងសមាគមសហគ្រិនវ័យក្មេងកម្ពុជា ដែលបានរៀបចំកម្មវិធីនេះឡើង ផ្តល់ជាចំណេះដឹងថ្មី ជាពិសេស យុវជនគណបក្សយើងត្រូវតែចាប់យកឱកាសនិងចំណេះដឹងបន្ថែមទៀតពីវាគ្មិនខាងលើដែលមានបទពិសោធន៍ ក្នុងការចែករំលែកជាគន្លឹះសម្រាប់ត្រៀមខ្លួនវិនិយោគនឹងអភិវឌ្ឍនៅខេត្តកណ្ឌលគិរី កាន់តែរីកចម្រើនបន្ថែមទៀត ស្របតាមគោលនយោបាយអភិវឌ្ឍន៍ក្នុងខេត្តទាំងបួននៅភូមិភាគឦសានផងដែរ។

នៅក្នុងឱកាសនោះដែរ លោកបណ្ឌិត កៅ ថាច បានចែករំលែកដល់យុវជនថា ក្នុងស្ថានភាដែលសេដ្ឋកិច្ចពិភពលោកកំពុងតែមានភាពមិនច្បាស់លាស់ហើយ ចំពោះអនាគតប្រព័ន្ធសេដ្ឋកិច្ចកម្ពុជា និងអាជីវកម្មក្នុងប្រទេសយើងមិនស្ថិតនៅដដែលទៀតទេ​ ពេលនេះគឺអាចនឹងធ្វេីបរិវត្តកម្មទៅជាសេដ្ឋកិច្ចមូលធនចំណេះដឹងនិងសេដ្ឋកិច្ចបៃតង ក្នុងពេលអនាគត​ ដូច្នោះ ក្នុងនាមយើងជាយុវជនរបស់គណបក្សត្រូវត្រៀមខ្លួន តាមរយៈការបង្កើនសមត្ថភាព ចំណេះដឹងឲ្យខ្លាំង នោះគណបក្សយើងនឹងខ្លាំងដែរ ជាពិសេសត្រូវរួមគ្នាវិនិយោគក្នុងស្រុកលើវិស័យកសិកម្ម បង្កើតការងារ និងមុខរបរថ្មីៗ ដើម្បីប្រែក្លាយទឹកដីខេត្តមណ្ឌលគិរី ទៅជាសេដ្ឋកិច្ចនិងកសិកម្មបៃតងដែលមិនមានផលប៉ះពាល់ដល់បរិស្ថាននិងសង្គម។

លោកបណ្ឌិត កៅ ថាច ក៏បានមានប្រសាសន៍ផ្តល់នូវទស្សនទានសំខាន់ៗមួយចំនួនទៀត ដល់សហគ្រិនវ័យក្មេងនៃយុវជនរបស់គណបក្សខេត្តមណ្ឌលគិរី អំពីការវិវត្តម៉ូឌែលអាជីវកម្មតាំងពីសម័យអាណាចក្រអង្គរ ដ៏រុងរឿងនិងបច្ចុប្បន្នដែលសម័យនោះ ខ្មែរយើងបានឡើងដល់ចំណុចកំពូលនិងអស្ចារ្យ ក្លាយជាអាណាចក្រទាំងសេដ្ឋកិច្ច វិទ្យាសាស្រ្ត ធនធានមនុស្ស និងជីវភាពរស់នៅប្រជាជន ដែលធ្វើឲ្យខ្មែរយើងខ្លាំងលើវិស័យកសិកម្មហេតុដូច្នោះហើយក្នុងនាមយុវជន ត្រូវតែខំឲ្យដូចសម័យដើម តាមរយៈការពង្រឹងវិស័យវិស័យសហគ្រិនភាពយើងឲ្យខ្លាំង ដើម្បីកុំឲ្យសត្រូវគេមើលងាយជាតិយើង ។

ជុំវិញបញ្ហាប្រភពទុនវិនិយោគវិញលោកបណ្ឌិត កៅ ថាច បានបញ្ចាក់ថា ធនាគារ ARDB ចាំតែជួយបងប្អូនជាសហគ្រិនវ័យក្មេងយើងទេឲ្យតែមានផែនការអាជីវកម្មច្បាស់លាស់ ជាពិសេសមុនរកស៊ីនិងធ្វើកសិកម្មត្រូវចេះរកឲ្យឃើញថ្លៃដើមផលិតក្នុង១ឯកតាជាមុនសិន ទើបរកស៊ីមិនខាត ព្រោះថាកន្លងទៅប្រជាពលរដ្ឋបើគិតអំពីរឿងរកស៊ីនិងវិនិយោគ គឺផ្តោតតែលើវិស័យធនាគារមួយមុខ ដែលមិនបានគិតដល់ប្រភពទុនផ្សេងៗទៀតដូចជា ផ្សារភាគហ៊ុន និងវិស័យធានារ៉ាប់រង ដែលអាចជួយបងប្អូនបានយ៉ាងច្រើន តាមរយៈការបោះលក់សញ្ញាបណ្ណជាដើម។

លោកបណ្ឌិត ក៏បានផ្ញើសារថា ការវិនិយោគ គឺជាការបង្កើតការងារក្នុងស្រុក ហើយកុំមើលឃើញតែទីផ្សារក្នុងស្រុក ប៉ុន្តែត្រូវធ្វើពិពិធកម្មទីផ្សារនៅតំបន់អាស៊ាន។ ដូច្នោះសហគ្រិនយើងមិនត្រឹមតែជាអ្នកកសាង និងអភិវឌ្ឍធុរកិច្ចជាតិប៉ុណ្ណោះទេ ប៉ុន្តែថែមទាំងបានចូលរួម ក្នុងការកសាងសេដ្ឋកិច្ចជាតិនិងសង្គមឲ្យមានការរីកចម្រើន៕