(ភ្នំពេញ)៖ លោកវរសេនីយ៍ទោ ប៊ុនធា សុវណ្ណដារ៉េត នាយរងការិយាល័យភ័ស្តុភារនៃនាយកដ្ឋាននគរបាលការពារព្រំដែនគោក អគ្គស្នងការនគរបាលជាតិ ក្រសួងមហាផ្ទៃ អត្តលេខ : ៧៧៧៥៣ បានទទួលមរណភាព ក្នុងអំឡុងពេលចុះបំពេញបេសកកម្មត្រួតពិនិត្យវឌ្ឍនភាពការងារនគរបាលការពារព្រំដែន តាមបណ្ដោវរសេនាតូចនគរបាលការពារព្រំដែនគោកក្នុងទិសភូមិភាគទី១ នាខេត្តស្ទឹងត្រែង រតនគីរីនិងមណ្ឌលគិរី កាលពីថ្ងៃទី២០ ខែឧសភា ឆ្នាំ២០២៦ វេលាម៉ោង៣:៣០នាទី ទៀបភ្លឺ ក្នុងជន្មាយុ ៣៣ឆ្នាំ ដោយសារ រោគាពាធ (គាំងបេះដូង)។

ជុំវិញមរណភាពនេះនាយឧត្តមសេនីយ៍ ស ថេត អគ្គស្នងការនគរបាលជាតិ បានចាត់ទុកមរណភាពរបស់លោកវរសេនីយ៍ទោ ប៊ុនធា សុវណ្ណដារ៉េត គឺជាការបាត់បង់នៅនាយនគរបាលជាតិដ៏សកម្មចំពោះការងារ ដោយសារលោកវរសេនីយ៍ទោ ជានិច្ចកាលបានលះបង់ កម្លាំងកាយ កម្លាំងចិត្ត ពេលវេលា និងសេចក្ដីសុខផ្ទាល់ខ្លួន ចូលរួមបុព្វហេតុថែរក្សាសន្តិសុខ សណ្ដាប់ធ្នាប់ និងសុវត្ថិភាពសង្គម ជាពិសេសបានចូលរួមយ៉ាងសកម្មក្នុងការការពារអធិបតេយ្យភាពជាតិ អំឡុងពេលប្រទេសកម្ពុជាទទួលរងការវាយប្រហារពីយោធាថៃ ។

នាយឧត្តមសេនីយ៍ ស ថេត បានបន្ថែមថា អំឡុងពេលកម្ពុជារងការវាយប្រហារពីភាគីថៃ លោកវរសេនីយ៍ទោ ជាមន្ត្រីដែលមានភាពអង់អាចក្លាហាន ដែលនៅតែបន្តឈរជើងបំពេញការងាររបស់ខ្លួនតាមព្រំដែន ដោយមិនបារម្ភពីអាយុជីវិតរបស់ខ្លួនឡើយ ។

ស្ថិតក្នុងពេលវេលាដ៏សែនក្រៀមក្រំសោកសង្រេងនេះ ក្នុងនាមកងកម្លាំងនគរបាលជាតិ និងប្រជាពលរដ្ឋកម្ពុជាទូទាំងប្រទេស សូមចូលរួមសម្ដែងសមានទុក្ខដោយក្ដីសោកស្ដាយអាឡោះអាល័យ និងសូមបួងសួងឧទ្ទិសដល់គុណបុណ្យព្រះរតនត្រ័យ ជួយយិតយោងដួងវិញ្ញាណក្ខន្ធរបស់លោកវរសេនីយ៍ទោ សូមឆាប់បានយោនយកកំណើត ចាប់បដិសន្ធិក្នុងសុគតិភពកុំបីឃ្លៀងឃ្លាតឡើយ ។

ជាមួយគ្នានោះដែរ លោកឧត្តមសេនីយ៍ទោ ស៊ឹម សំអាត ប្រធាននាយកដ្ឋាននគរបាលព្រំដែនគោក រួមទាំងកងកម្លាំងនគរបាលព្រំដែនគោក ក៏បានផ្ញើរសារចូលរួមរំលែកទុក្ខ ដោយក្តីសោកសង្រែងជាអនេកផងដែរ៕