(ភ្នំពេញ)៖ សាកលវិទ្យាល័យ Polynésie française និងសាកលវិទ្យាល័យ Aix-Marseille បានរៀបចំពិធីការពារនិក្ខេបបទរបស់លោក ថង វង្សសុវិទ្យា ជាមន្ត្រីរាជការ នៃរដ្ឋបាលថ្នាក់ក្រោមជាតិ ក្រោមប្រធានបទ «ការវិភាគលើការគ្រប់គ្រងរដ្ឋបាលដែនដីនៅកម្ពុជា» ក្រោមការដឹកនាំរបស់លោក Jean-Paul Pastorel សាស្ត្រាចារ្យនីតិសាធារណៈ ដែលបានប្រព្រឹត្តទៅនៅរាជធានីភ្នំពេញ ដោយមានការអញ្ជើញចូលរួមពីសាស្ត្រាចារ្យវាយតម្លៃ ជនជាតិបារាំងចំនួន ០៥ រូប (០២ រូបអនឡាញ) និងសាស្ត្រាចារ្យវាយតម្លៃ ជនជាតិខ្មែរចំនួន ០១រូប។

នៅក្នុងពិធីនេះក៏មានការអញ្ជើញចូលរួមពីលោក កើត ឆែ អភិបាលរងខេត្តកំពត និងធ្លាប់ជាសាស្រ្តាចារ្យច្បាប់ម្នាក់ផងដែរ។

បន្ទាប់ពីរៀបចំពិធីការពារ និងការឆ្លើយសំណួរពីសំណាក់បេក្ខជនបណ្ឌិតរួចរាល់ ក្រុមសាស្ត្រាចារ្យបានសម្រេចផ្តល់ងារ «បណ្ឌិត» ឯកទេសនីតិសាធារណៈ របស់ក្រសួងអប់រំជាន់ខ្ពស់នៃសាធារណរដ្ឋបារាំង ដល់លោក ថង វង្សសុវិទ្យា ដែលបានសរសេរនិក្ខេបបទ និងបានការពារនៅចំពោះមុខសាស្ត្រាចារ្យវាយតម្លៃ ប្រកបដោយជោគជ័យ។

ការទទួលបានងារ «បណ្ឌិត» របស់លោក ថង វង្សសុវិទ្យា នាពេលនេះ គឺជាការចូលរួមចំណែកកសាង និងអភិវឌ្ឍមូលធនមនុស្ស ស្របតាមយុទ្ធសាស្ត្របញ្ចកោណ ដំណាក់កាលទី១ នៃរាជរដ្ឋាភិបាលកម្ពុជា អាណត្តិទី៧ ក្រោមការដឹកនាំប្រកបដោយគតិបណ្ឌិតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា។

ប្រវត្តិនៃការសិក្សាលោក ថង វង្សសុវិទ្យា៖

*ឆ្នាំ២០០៧ បាក់ឌុប និទ្ទេស B វិទ្យាល័យព្រះមុនីវង្ស ខេត្តបាត់ដំបង (សិស្សថ្នាក់ពីរភាសា, ភាសាបារាំង)
*ឆ្នាំ២០០៨ ដល់ ២០១១ បរិញ្ញាបត្រនីតិសាស្ត្រ បារាំង និងខ្មែរ នៃសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច និងសាកលវិទ្យាល័យ លុយមីញ៉ែ លីយ៉ុង ២ ប្រទេសបារាំង
*ឆ្នាំ២០១១ ដល់ ២០១៣ ទទួលអាហារូបករណ៍ពីសាធារណរដ្ឋបារាំង បន្តការសិក្សាថ្នាក់បរិញ្ញាបត្រជាន់ខ្ពស់ Master នៅសាកលវិទ្យល័យ លុយមីញែ លីយ៉ុង ២ (ទីក្រុងលីយ៉ុង ប្រទេសបារាំង)
*ឆ្នាំ២០១៤ ដល់បច្ចុប្បន្ន ត្រឡប់មកកម្ពុជា និងបានចូលរួមក្នុងវិស័យឧត្តមសិក្សា (ស្រាវជ្រាវ បង្រៀន និងចូលរួមក្នុងវេទិកាស្រាវជ្រាវជាតិ និងអន្តរជាតិនានា) និងធ្លាប់បម្រើការងារជាមន្ត្រីរាជការនៅរដ្ឋបាលរាជធានីភ្នំពេញ ហើយកំពុងបម្រើការងារនៅរដ្ឋបាលខេត្តកំពត បច្ចុប្បន្ននេះ
*ឆ្នាំ២០២២ ចុះឈ្មោះបន្តការសិក្សានៅថ្នាក់បណ្ឌិត សាកលវិទ្យាល័យ Polynésie française សាកលវិទ្យាល័យ Aix-Marseille នៃសាធារណរដ្ឋបារាំង
*ឆ្នាំ២០២៦ បញ្ចប់ការសរសេរនិក្ខេបបទ និងទទួលបានការវាយតម្លៃ និងអនុញ្ញាតអោយធ្វើការការពារនិក្ខេបបទ
*ថ្ងៃទី២១ ខែឧសភា ឆ្នាំ២០២៦ បានការពារដោយជោគជ័យនូវនិក្ខេបបទ និងទទួលបានងារបណ្ឌិត ពីក្រសួងអប់រំជាន់ខ្ពស់ សាធារណរដ្ឋបារាំង៕