(ភ្នំពេញ)៖ ស្របពេលដែលមេរោគអេដស៍ និងជំងឺកាមរោគកំពុងមានសន្ទុះកើនឡើងវិញនៅកម្ពុជា ដែលជាមុខសញ្ញាមួយគួរឱ្យព្រួយបារម្ភរបស់រាជរដ្ឋាភិបាល ក្នុងការទប់ស្កាត់នូវជំងឺរីករាលដាលមួយនេះ វត្តមានអង្គការអន្តរជាតិមួយអង្គការ គឺមូលនិធិថែទាំសុខភាពអ្នកជំងឺអេដស៍ ដែលកំពុងមានសកម្មភាពជាង ៥០​ប្រទេសជុំវិញពិភពលោក ដែលធ្វើការលើសេវាថែទាំសុខភាពអ្នកជំងឺអេដស៍ មិនស្វែងរកប្រាក់ចំណេញ ក៏កំពុងមានវត្តមាននៅកម្ពុជា និងកំពុងតែធ្វើការងារ​ផ្តល់សេវាថែទាំ​ និងព្យាបាល​ដោយឱសថប្រឆាំងមេរោគអេដស៍ ការអប់រំបង្ការ ការធ្វើតេស្ត ការចែកស្រោមអនាម័យ ដើម្បីរួមចំណែកជាមួយរដ្ឋាភិបាលកម្ពុជា ដើម្បីទប់ស្កាត់ការរីករាលដាលមេរោគអេដស៍ ​។

បើតាមមន្ត្រីជាន់ខ្ពស់អង្គការថែទាំសុខភាពអ្នកជំងឺអេដស៍ (AHF) កម្ពុជា បានបញ្ជាក់ឱ្យដឹងនៅថ្ងៃទី២២ ខែឧសភា ឆ្នាំ២០២៦នេះថា អង្គការមូលនិធិថែទាំសុខភាពអ្នកជំងឺអេដស៍​ ជាអង្គការសកល​​មិនស្វែងរកប្រាក់ចំណេញ ​ដែលផ្តល់ថ្នាំមិនគិតពីលទ្ធភាពនៃការបង់ប្រាក់ និងការតស៊ូមតិដល់មនុស្សជាង ៣លាននាក់ នៅក្នុងប្រទេសចំនួន ៥០ទូទាំងពិភពលោកនៅអាហ្វ្រិក អាមេរិក តំបន់អាស៊ី/ប៉ាស៊ីហ្វិក និងអឺរ៉ុប បច្ចុប្បន្នក៏ជាអ្នកផ្តល់សេវាថែទាំសុខភាពអេដស៍/អេដស៍ មិនស្វែងរកប្រាក់ចំណេញធំជាងគេបំផុតនៅលើពិភពលោក ក្នុងនោះអង្គការមួយនេះក៏កំពុងចូលរួមចំណែកយ៉ាងសំខាន់ក្នុងការផ្សព្វផ្សាយពីមេរោគអេដស៍ ជំងឺអេដស៍ និងចែកស្រោមអនាម័យដោយឥតគិតថ្លៃ ដើម្បីទប់ស្កាត់ការចំលងមេរោគអេដស៍នៅកម្ពុជាយ៉ាងមានប្រសិទ្ធភាព។

គិតមកដល់ពេលនេះអង្គការមូលនិធិថែទាំសុខភាពអ្នកជំងឺអេដស៍ (AHF) កម្ពុជា បានធ្វើប្រតិបត្តិការនៅកម្ពុជាចំនួន ២០ឆ្នាំរួចមកហើយ និងបានធ្វើការយ៉ាងជិតស្និទជាមួយក្រសួងសុខាភិបាល មជ្ឈមណ្ឌលជាតិប្រយុទ្ធនឹងជំងឺអេដស៍ សើស្បែក និងកាមរោគ អាជ្ញាធរជាតិប្រយុទ្ធនឹងជំងឺអេដស៍ (NAA) ក្រសួងអប់រំយុវជន និងកីឡា និងដៃគូអង្គការមិនមែនរដ្ឋាភិបាល ដើម្បីពង្រីកការទទួលបានសេវាថែទាំ និងព្យាបាលអ្នករស់នៅជាមួយមេរោគអេដស៍ ការធ្វើតេស្ត និងការបង្ការមេរោគអេដស៍ទូទាំងប្រទេស។

នៅកម្ពុជា អង្គការមូលនិធិថែទាំសុខភាពអ្នកជំងឺអេដស៍កម្ពុជា មកដល់បច្ចុប្បន្នបានធ្វើសកម្មភាពបង្ការមេរោគអេដស៍ ការព្យាបាល និងថែទាំ កម្មវិធីអាហារសុខភាព ផ្តល់ការគាំទ្រក្មេងស្រី និងផ្សេងៗ រួមមានការចូលរួមដើម្បីការសង្គ្រោះជីវិតមនុស្សជាង ប្រមាណ ៥២ ១៦២នាក់ នៅក្នុង ៤២ទីតាំង ក្នុង ១៩រាជធានីខេត្តនៃព្រះរាជាណាចក្រកម្ពុជា រួមទាំងមានគ្លីនិកចំនួន២ ធ្វើការលើការថែទាំ និងព្យាបាលជំងឺកាមរោគ ផងដែរ។

បើតាមការបញ្ជាក់ពីលោកវេជ្ជបណ្ឌិត ឈឹម សារ៉ាត់ នាយកប្រចាំតំបន់អាស៊ី បានឱ្យដឹងថា ជាផ្នែកមួយនៃកិច្ចខិតខំប្រឹងប្រែងក្នុងតំបន់ដ៏ទូលំទូលាយមួយ AHF កម្ពុជា រួមជាមួយប្រទេសផ្សេងទៀត នៃការិយាល័យ AHF អាស៊ី និងសហការជាមួយក្រសួងសុខាភិបាល កំពុងពង្រឹងការឆ្លើយតបទៅនឹងមេរោគអេដស៍ដោយជំរុញការព្យាបាលជាការបង្ការ និងផ្សព្វផ្សាយការប្រើប្រាសស្រោមអនាម័យ ជាមធ្យោបាយមានប្រសិទ្ធភាពបំផុតសម្រាប់ការបង្ការមេរោគអេដស៍ និងជំងឺកាមរោគ និងការការពារការមានផ្ទែពោះដោយមិនចង់បាន ។

ការរក្សាភាពជោគជ័យរបស់ប្រទេសកម្ពុជា តម្រូវឱ្យមានការគាំទ្រជាបន្តបន្ទាប់សម្រាប់អតិថិជនក្នុងការថែទាំ ការចូលរួមឡើងវិញចំពោះអ្នកដែលបាត់បង់ការតាមដាន និងការពង្រីកសេវាកម្មនៅទូទាំងខេត្ត និងតំបន់ដាច់ស្រយាល ធានាការទទួលបានសេវាដោយផ្តោតការយកចិត្តទុកដាក់កាន់តែខ្លាំងឡើងលើប្រជាជនដែលមានប្រឈមមុខខ្ពស់ផងដែរ៕