(ភ្នំពេញ)៖ ដោយទទួលបានការអនុញ្ញាតដ៏ខ្ពង់ខ្ពស់ពីនាយឧត្តមសេនីយ៍ ស ថេត អគ្គស្នងការនគរបាលជាតិ នៅព្រឹកថ្ងៃទី២២ ខែឧសភា ឆ្នាំ២០២៦ លោកឧត្តមសេនីយ៍ឯក វូ ហាក់ ប្រធាននាយកដ្ឋាននគរបាលបច្ចេកទេសព្រំដែន បានដឹកនាំកងកម្លាំងនគរបាល នៃនាយកដ្ឋាននគរបាលបច្ចេកទេសព្រំដែន ចូលរួមគោរពវិញ្ញាណក្ខន្ធ នាំយកសាររំលែកមរណទុក្ខ និងថវិកាជូនចំពោះលោកស្រី យូ វណ្ណារី ព្រមទាំក្រុមគ្រួសារលោកវរសេនីយ៍ឯក ប៊ុនធា សុវណ្ណដារ៉េត។

លោកវរសេនីយ៍ឯក ប៊ុនធា សុវណ្ណដារ៉េត នាយរងការិយាល័យភស្តុភា នៃនាយកដ្ឋាននគរបាលការពារព្រំដែនគោក បានទទួលទទួលមរណភាពក្នុងពេលចុះបំពេញបេសកកម្ម ត្រួតពិនិត្យវឌ្ឍនភាពការងារនគរបាលការពារព្រំដែន តាមបណ្តាវរសេនាតូចនគរបាលការពារព្រំដែនគោក ក្នុងទិសភូមិភាគទី១ (ខេត្តស្ទឹងត្រែង រតនគិរី និងមណ្ឌលគិរី)។

ពិធីបុណ្យសពមន្រ្តីនគរបាលរូបនេះ បានរៀបចំធ្វើនៅវត្តព្រះពុទ្ធឃោសាចារ្យ ហៅវត្តចិនដំដែក រាជធានីភ្នំពេញ។

ជុំវិញមរណភាពនេះ នាយឧត្តមសេនីយ៍ ស ថេត អគ្គស្នងការនគរបាលជាតិ បានចាត់ទុកមរណភាពរបស់លោកវរសេនីយ៍ទោ ប៊ុនធា សុវណ្ណដារ៉េត គឺជាការបាត់បង់នៅនាយនគរបាលជាតិដ៏សកម្មចំពោះការងារ ដោយសារលោកវរសេនីយ៍ទោ ជានិច្ចកាលបានលះបង់ កម្លាំងកាយ កម្លាំងចិត្ត ពេលវេលា និងសេចក្ដីសុខផ្ទាល់ខ្លួន ចូលរួមបុព្វហេតុថែរក្សាសន្តិសុខ សណ្ដាប់ធ្នាប់ និងសុវត្ថិភាពសង្គម ជាពិសេសបានចូលរួមយ៉ាងសកម្មក្នុងការការពារអធិបតេយ្យភាពជាតិ អំឡុងពេលប្រទេសកម្ពុជាទទួលរងការវាយប្រហារពីយោធាថៃ ។

នាយឧត្តមសេនីយ៍ ស ថេត បានបន្ថែមថា អំឡុងពេលកម្ពុជារងការវាយប្រហារពីភាគីថៃ លោកវរសេនីយ៍ទោ ជាមន្ត្រីដែលមានភាពអង់អាចក្លាហាន ដែលនៅតែបន្តឈរជើងបំពេញការងាររបស់ខ្លួនតាមព្រំដែន ដោយមិនបារម្ភពីអាយុជីវិតរបស់ខ្លួនឡើយ ។

ស្ថិតក្នុងពេលវេលាដ៏សែនក្រៀមក្រំសោកសង្រេងនេះ ក្នុងនាមកងកម្លាំងនគរបាលជាតិ និងប្រជាពលរដ្ឋកម្ពុជាទូទាំងប្រទេស សូមចូលរួមសម្ដែងសមានទុក្ខដោយក្ដីសោកស្ដាយអាឡោះអាល័យ និងសូមបួងសួងឧទ្ទិសដល់គុណបុណ្យព្រះរតនត្រ័យ ជួយយិតយោងដួងវិញ្ញាណក្ខន្ធរបស់លោកវរសេនីយ៍ទោ សូមឆាប់បានយោនយកកំណើត ចាប់បដិសន្ធិក្នុងសុគតិភពកុំបីឃ្លៀងឃ្លាតឡើយ ។

ជាមួយគ្នានោះដែរ លោកឧត្តមសេនីយ៍ទោ ស៊ឹម សំអាត ប្រធាននាយកដ្ឋាននគរបាលព្រំដែនគោក រួមទាំងកងកម្លាំងនគរបាលព្រំដែនគោក ក៏បានផ្ញើរសារចូលរួមរំលែកទុក្ខ ដោយក្តីសោកសង្រែងជាអនេកផងដែរ៕