(ភ្នំពេញ)៖ រាជរដ្ឋាភិបាលកម្ពុជា បានឯកភាពជាគោលការណ៍កំណត់ឋានន្តរសក្តិមន្ដ្រីនគរបាលជាតិបន្តវេន ស្របតាមមុខតំណែងនីមួយៗ ក្នុងរចនាសម្ព័ន្ធអគ្គស្នងការដ្ឋាននគរបាលជាតិ និងអង្គភាពនគរបាលថ្នាក់ប្រហាក់ប្រហែល។ នេះបើយោងតាមលិខិតរបស់ទីស្តីការគណៈរដ្ឋមន្ត្រី ដែលបានជម្រាបជូនទៅលោកអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ កាលពីថ្ងៃទី២១ ខែឧសភា ឆ្នាំ២០២៦។

ក្រោយលិខិតនេះត្រូវបានចែកចាយ និងផ្សព្វផ្សាយជាសាធារណៈ នៅថ្ងៃទី២២ ខែឧសភា ឆ្នាំ២០២៦នេះ លោកបណ្ឌិត ទូច សុឃៈ អ្នកនាំពាក្យរងក្រសួងមហាផ្ទៃ បានចេញមកពន្យល់បន្ថែមអំពីការកំណត់នេះ ដោយអះអាងថា ការកំណត់ថ្មីនេះ គឺធ្វើឡើងសម្រាប់មន្ដ្រីនគរបាលជាតិបន្ដវេន ពោលមិនបានប៉ះពាល់ ឬតម្រូវឲ្យមានការកែសម្រួល រុះរើស នគរបាលដែលកំពុងកាន់មុខតំណែង ហើយឋានន្ដរស័ក្ដិខុសពីការកំណត់ថ្មីនេះឡើយ។

បើតាមលោកបណ្ឌិត ទូច សុឃៈ, ការកំណត់ឋានន្ដរស័ក្ដិថ្មីនេះ គឺថ្នាក់ដឹកនាំក្រសួងមហាផ្ទៃ បានសិក្សាតាំងពីដើមអាណត្តិ ជាបន្ដបន្ទាប់មក ដោយផ្អែកទៅលើទិដ្ឋភាពសង្គម ទិដ្ឋភាពជំនាញ ផ្អែកទៅលើគោលការណ៍រដ្ឋបាល និងមូលដ្ឋានច្បាប់ជាធរមាន បូករួមជាមួយបរិបថអន្ដរជាតិផងដែរ ទើបបានសម្រេចគោរពស្នើគោលការណ៍ដ៏ខ្ពង់ខ្ពស់ពីសម្ដេចមហាបវរធិបតី នាយករដ្ឋមន្ដ្រី រហូតសម្ដេចឯកភាពតាមការស្នើសុំ។

លោកបណ្ឌិត ទូច សុឃៈ បានធ្វើការរៀបរាប់យ៉ាងដូច្នេះថា៖

«ការកំណត់ថ្មីអំពីឋានន្ដរស័ក្ដិឲ្យស្របទៅតាមមុខតំណែង ទៅតាមអង្គការចាត់តាំង នៃអង្គភាពចំណុះក្រសួងមហាផ្ទៃ ក្របខ័ណ្ឌនគរបាលជាតិនៅពេលនេះ គឺថ្នាក់ដឹកនាំក្រសួងមហាផ្ទៃ បានសិក្សាតាំងពីដើមអាណត្តិ ជាបន្ដបន្ទាប់មក ដោយផ្អែកទៅលើទិដ្ឋភាពសង្គម ទិដ្ឋភាពជំនាញ ផ្អែកទៅលើគោលការណ៍រដ្ឋបាល និងមូលដ្ឋានច្បាប់ជាធរមាន បូករួមជាមួយបរិបថអន្ដរជាតិផងដែរ ទើបបានសម្រេចគោរពស្នើគោលការណ៍ដ៏ខ្ពង់ខ្ពស់ពីសម្ដេចមហាបវរធិបតី នាយករដ្ឋមន្ដ្រី រហូតដល់សម្ដេចឯកភាពតាមការស្នើសុំដើម្បីរៀបចំកំណត់នូវឋានន្ដរស័ក្ដិនាពេលនេះ។

ការកំណត់ឋានន្ដរស័ក្ដិឲ្យស៉ីទៅតាមមុខតំណែង ឲ្យស្របទៅតាមរចនាសម្ព័ន្ធចាត់តាំងនៃអង្គភាពចំណុះក្រសួងមហាផ្ទៃ នៅពេលនេះ គឺមិនប៉ះពាល់ដល់បងប្អូនដែលកំពុងតែបំពេញការងារ ដែលកំពុងតែពាក់ឋានន្ដរស័ក្ដិ ដែលកំពុងតែកាន់មុខតំណែងដូចការកំណត់ថ្មីនោះទេ គឺនៅរក្សាភាពដើមដដែល ពុំមានការរុះរើរៀបរយជាថ្មី ឬសម្រួលបន្ថយទៅតាមការកំណត់ថ្មីនោះឡើយ។

បងប្អូននគរបាលជាតិចំណុះក្រសួងមហាផ្ទៃ ដែលកំពុងតែកាន់មុខតំណែងនីមួយៗតាមការកំណត់ថ្មីនេះ ហើយមានឋានន្ដរស័ក្ដិស្របតាមការកំណត់ថ្មីនេះ គឺយើងអនុវត្តទៅតាមការកំណត់ថ្មីនេះតែម្ដង។ ចំពោះការកំណត់ថ្មីនេះ គឺសម្ដៅអនុវត្តទៅលើអ្នកបន្ដវេន ពោលមន្ដ្រីនគរបាលជាតិដែលនឹងឡើងមកកាន់តំណែងនាពេលខាងមុខ តាមប្រអប់នីមួយៗដែលបានកំណត់។ មន្ដ្រីនគរបាលជាតិដែលមកកាន់តំណែងនីមួយៗនោះ មិនត្រូវមានឋានន្ដរស័ក្ដិលើសពីការកំណត់ថ្មីនេះជាដាច់ខាត។

ការកំណត់ថ្មីនេះ មិនមានការប៉ះពាល់សតិអារម្មណ៍ណាមួយនោះទេ គឺមានតែឲ្យការរួមរស់សុខុដម្មនីយកម្មជាមួយគ្នាកាន់តែមានភាពល្អប្រសើរ និងការរៀនសូត្រពីគ្នាទៅវិញទៅមក ដើម្បីបន្ដវេនប៉ុណ្ណោះ ពោលគោរពទៅតាមគោលការណ៍ រក្សាចាស់ បង្កើនថ្មី ដើម្បីប្រសិទ្ធភាពនៃការដឹកនាំបម្រើសេវាជូនប្រជាពលរដ្ឋ ថែរក្សាសណ្ដាប់ធ្នាប់ និងសុវត្ថិភាពសង្គមរបស់យើង»។

នៅក្នុងលិខិតរបស់ទីស្តីការគណៈរដ្ឋមន្ត្រី ដែលបណ្តាញព័ត៌មាន Fresh News ទទួលបាននៅថ្ងៃទី២២ ខែឧសភា ឆ្នាំ២០២៦នេះ បានឲ្យដឹងទៀតថា រាជរដ្ឋាភិបាល យល់ព្រមជាគោលការណ៍កំណត់ឋានន្តរសក្តិមន្ត្រីនគរបាលជាតិ បន្តវេនស្របតាមមុខតំណែងនីមួយៗក្នុងរចនាសម្ព័ន្ធអគ្គស្នងការដ្ឋាននគរបាលជាតិ និងអង្គភាពនគរបាល ថ្នាក់ប្រហាក់ប្រហែល ដូចខាងក្រោម៖

* អគ្គស្នងការ នៃអគ្គស្នងការដ្ឋាននគរបាលជាតិ មានឋានន្តរសក្តិ នាយឧត្តមសេនីយ៍
* អគ្គនាយក នៃអគ្គនាយកដ្ឋាននានា និងថ្នាក់ប្រហាក់ប្រហែល មានឋានន្តរសក្តិ ឧត្តមសេនីយ៍ឯក
* អគ្គស្នងការរង នៃអគ្គស្នងការដ្ឋាននគរបាលជាតិ មានឋានន្តរសក្តិ ឧត្តមសេនីយ៍ឯក
* អគ្គនាយករង និងថ្នាក់ប្រហាក់ប្រហែល មានឋានន្តរសក្តិ ឧត្តមសេនីយ៍ទោ
* ប្រធានសេនាធិការដ្ឋាន និងប្រធាននាយកដ្ឋានកណ្តាល មានឋានន្តរសក្តិ ឧត្តមសេនីយ៍ទោ
* អនុប្រធានសេនាធិការដ្ឋាន និងអនុប្រធាននាយកដ្ឋានកណ្តាល មានឋានន្តរសក្តិ ឧត្តមសេនីយ៍ត្រី
* ប្រធាននាយកដ្ឋាន ស្នងការនៃស្នងការដ្ឋាននគរបាលរាជធានី ខេត្ត និងថ្នាក់ប្រហាក់ប្រហែល មានឋានន្តរសក្តិ ឧត្តមសេនីយ៍ត្រី
* អនុប្រធាននាយកដ្ឋាន ស្នងការរងនៃស្នងការដ្ឋាននគរបាលរាជធានី ខេត្ត និងថ្នាក់ប្រហាក់ប្រហែល មានឋានន្តរសក្តិ វរសេនីយ៍ឯក
* នាយការិយាល័យ អធិការនៃអធិការដ្ឋាននគរបាលក្រុង ស្រុក ខណ្ឌ និងថ្នាក់ប្រហាក់ប្រហែល មានឋានន្តរសក្តិ វរសេនីយ៍ទោ
* នាយរងការិយាល័យ អធិការរងនៃអធិការដ្ឋាននគរបាលក្រុង ស្រុក ខណ្ឌ និងថ្នាក់ប្រហាក់ប្រហែល មានឋានន្តរសក្តិ វរសេនីយ៍ត្រី
* នាយផ្នែក នាយប៉ុស្តិ៍នគរបាលរដ្ឋបាលឃុំ សង្កាត់ និងថ្នាក់ប្រហាក់ប្រហែល មានឋានន្តរសក្តិ អនុសេនីយ៍ឯក
* នាយរងផ្នែក នាយរងប៉ុស្តិ៍នគរបាលរដ្ឋបាលឃុំ សង្កាត់ និងថ្នាក់ប្រហាក់ប្រហែល មានឋានន្តរសក្តិ អនុសេនីយ៍ទោ៕