(ព្រះវិហារ)៖ ប្រជាពលរដ្ឋភៀសសឹកជាច្រើនគ្រួសារ នៅព្រឹកថ្ងៃទី២២ ខែឧសភា ឆ្នាំ២០២៦ បានចូលរួមចាប់ឆ្នោតយកផ្ទះស្នាក់នៅបណ្តោះអាសន្នជំហានទី២ នៅភូមិតាកឹងបៃតង ឃុំថ្មី ស្រុកគូលែន ខេត្តព្រះវិហារ ក្រោមវត្តមានលោក មិន ស៊ីថា អភិបាលរងខេត្តព្រះវិហារ តំណាងលោក គីម រិទ្ធី អភិបាលខេត្ត។

នៅក្នុងឱកាសនោះ លោក មិន ស៊ីថា បានថ្លែងពាំនាំនូវការផ្ដាំផ្ញើសាកសួរសុខទុក្ខ និងការយកចិត្តទុកដាក់ពីលោក គីម រិទ្ធី អភិបាលខេត្តព្រះវិហារ ជូនចំពោះបងប្អូនប្រជាពលរដ្ឋភៀសសឹកទាំងអស់ ដែលកំពុងរស់នៅក្នុងស្ថានភាពលំបាក និងត្រូវការការគាំទ្រពីអាជ្ញាធរ និងស្ថាប័នពាក់ព័ន្ធ។

លោកអភិបាលរងខេត្តព្រះវិហារ បានថ្លែងថា «ការរៀបចំផ្ទះស្នាក់នៅបណ្ដោះអាសន្នជូនបងប្អូននាពេលនេះ គឺជាការបង្ហាញពីការយកចិត្តទុកដាក់របស់រាជរដ្ឋាភិបាល សមាគមអតីតយុទ្ធជន និងនិវត្តន៍ជន និងរដ្ឋបាលខេត្តព្រះវិហារ ក្នុងការជួយសម្រាលការលំបាក និងធានាឱ្យបងប្អូនមានទីជម្រកសមរម្យ សុវត្ថិភាព និងអាចរស់នៅបានដោយសេចក្ដីសុខក្នុងអំឡុងពេលប្រឈមការលំបាក»។

លោក មិន ស៊ីថា បានថ្លែបន្តទៀតថា «អាជ្ញាធរខេត្ត និងមន្ទីរជំនាញពាក់ព័ន្ធ នឹងបន្តយកចិត្តទុកដាក់ ជួយគាំទ្រ និងសម្របសម្រួលដល់បងប្អូនប្រជាពលរដ្ឋភៀសសឹក ទាំងការស្នាក់នៅ ជីវភាពរស់នៅ និងសេវាសាធារណៈចាំបាច់ផ្សេងៗ ដើម្បីឱ្យបងប្អូនអាចរស់នៅបានប្រកបដោយសុវត្ថិភាព និងមានទំនុកចិត្ត»។

លោកអភិបាលរងខេត្តព្រះវិហារ មិន ស៊ីថា បានថ្លែងអំពាវនាវប្រជាពលរដ្ឋទាំងអស់ ឱ្យបន្តសហការជាមួយអាជ្ញាធរ រក្សាសណ្ដាប់ធ្នាប់ អនាម័យ និងសាមគ្គីភាពនៅក្នុងសហគមន៍ ដើម្បីធានាបរិយាកាសរស់នៅប្រកបដោយសុវត្ថិភាព និងការយោគយល់គ្នាទៅវិញទៅមក៕