(ភ្នំពេញ)៖ លោក ស៊ិន ចាន់​សេរី​វុត្ថា រដ្ឋលេខាធិការ និងជាអ្នកនាំពាក្យ​រដ្ឋលេខាធិកា​រដ្ឋា​ន​អាកាសចរ​ស៊ីវិល​ បានឱ្យដឹងថា ក្នុងខណៈដែលពិភពលោកកំពុងជួបវិបត្តិប្រេងឡើងថ្លៃ ដោយសារសង្រ្គាមនៅមជ្ឈឹមបូព៌ាក៏ដោយ តែវិស័យអាកាសចរណ៍កម្ពុជា នៅតែបង្ហាញសញ្ញាវិជ្ជមាន តាមរយៈការកើនឡើងនៃចំនួនអ្នកដំណើរ ការតភ្ជាប់ជើងហោះហើរអន្តរជាតិ និងការចូលមករបស់ក្រុមហ៊ុនអាកាសចរណ៍ថ្មីៗ។

លោកគូសបញ្ជាក់បែបនេះ ស្របពេលដែលប្រទេសមួយចំនួនជាពិសេសចិន បានសម្រេចកាត់បន្ថយជើងហោះហើរមួយចំនួន ​មកអាស៊ីអាគ្នេយ៍ ដែលបណ្តាលមកពីការកើនឡើងយ៉ាងខ្លាំងនៃតម្លៃប្រេងឥន្ធនៈ ​ជាពិសេសបន្ទាប់ពីច្រកសមុទ្រហ័រមូស ដែលជាផ្លូវដឹកជញ្ជូនថាមពល​សកលដ៏សំខាន់មួយត្រូវបានរំខាន។

លោក ស៊ិន ចាន់​សេរី​វុត្ថា​ បានមានប្រសាសន៍ថា ​គិតមកដល់ពេលនេះ អាកាសយានដ្ឋានអន្តរជាតិនៅកម្ពុជា រួមទាំងអាកាសយានដ្ឋានអន្តរជាតិតេជោ ​និង អាកាសយានដ្ឋានអន្តរជាតិសៀមរាបអង្គរ ក៏ដូចជាបណ្តាញអាកាសចរណ៍ទូទៅ នៅតែបន្តប្រតិបត្តិការធម្មតា។ ក្រុមហ៊ុនអាកាសចរណ៍ដែលហោះហើរមកកម្ពុជា ក៏កំពុងបន្តតាមដានស្ថានការណ៍ថ្លៃប្រេង ស្ថានភាពទីផ្សារ និងតម្រូវការអ្នកដំណើរយ៉ាងជិតស្និទ្ធផងដែរ។

លោកបន្តថា «​ក្នុងបរិបទវិស័យអាកាសចរណ៍អន្តរជាតិ តម្លៃប្រេងអាកាសចរណ៍ គឺជាចំណាយធំបំផុតមួយ សម្រាប់ក្រុមហ៊ុនអាកាសចរណ៍ ដែលអាចមានចន្លោះប្រមាណ ២៥% - ៤០% នៃចំណាយប្រតិបត្តិការ។ ដូច្នេះនៅពេលតម្លៃប្រេងកើនឡើងខ្លាំង វាអាចប៉ះពាល់ដល់ថ្លៃសំបុត្រ ចំនួនជើងហោះហើរ និងផែនការប្រតិបត្តិការរបស់ក្រុមហ៊ុនមួយចំនួន។ ទោះយ៉ាងណា សម្រាប់កម្ពុជា វិស័យអាកាសចរណ៍នៅតែបង្ហាញសញ្ញាវិជ្ជមាន តាមរយៈការកើនឡើងនៃចំនួនអ្នកដំណើរ ការតភ្ជាប់ជើងហោះហើរអន្តរជាតិ និងការចូលមករបស់ក្រុមហ៊ុនអាកាសចរណ៍ថ្មីៗ។ រាជរដ្ឋាភិបាល និងអាជ្ញាធរអាកាសចរស៊ីវិល ក៏កំពុងតាមដានយ៉ាងយកចិត្តទុកដាក់លើការវិវត្តនៃទីផ្សារប្រេង និងស្ថានភាពអាកាសចរណ៍សកល ដើម្បីធានានូវស្ថិរភាព និងនិរន្តរភាពនៃវិស័យនេះ»។

លោកបានបញ្ជាក់ទៀតថា កម្ពុជាមិនទាន់មានការលុបចោលជើងហោះហើរទ្រង់ទ្រាយធំ ដោយសារតម្លៃប្រេងដូចករណីខ្លះនៅតំបន់ផ្សេងទេ ប៉ុន្តែអាជ្ញាធរ និងក្រុមហ៊ុនអាកាសចរណ៍កំពុងតាមដានស្ថានការណ៍សកលយ៉ាងជិតស្និទ្ធ ដើម្បីគ្រប់គ្រងផលប៉ះពាល់ ដែលអាចកើតមានជាយថាហេតុនាពេលខាងមុខ។

សូមបញ្ជាក់​ថា រយៈពេល៤ខែ ដើមឆ្នាំ២០២៦ ដោយគិតពីខែមករា ដល់មេសា អាកាសយានដ្ឋានអន្តរជាតិទាំង៣ (តេជោ-សៀមរាបអង្គរ-ព្រះសីហនុ) ទទួលជើងហោះហើរចេញ-ចូល (ទ្វេទិស) មានចំនួនជាង២ម៉ឺនជើង (២៣,២០៤ ជើង) មានការកើនឡើងប្រមាណ២%។

សម្រាប់អ្នកដំណើរចេញ-ចូល (ទ្វេទិស) មានចំនួនជាង២លាននាក់ (២,៤២៨,០០៩ នាក់) មានការថយចុះប្រមាណ៤%។ ដោយឡែកទំនិញតាមផ្លូវអាកាសចេញ-ចូល (ទ្វេទិស) មានចំនួនជាង៣០ពាន់តោន (៣០,៤៤៨ តោន) មានការកើនឡើងប្រមាណ៣៦%៕