(តាកែវ)៖ ក្នុងកិច្ចប្រជុំបូកសរុបការងារប្រចាំខែឧសភា និងលើកទិសដៅអនុវត្តការងារបន្ត នាព្រឹកថ្ងៃទី២២ ខែឧសភា ឆ្នាំ២០២៦នេះ លោក ពៅ សុខន ប្រធានមន្ទីរព័ត៌មានខេត្តតាកែវ បានធ្វើការណែនាំ និងជំរុញមន្ត្រីទាំងអស់ឲ្យបង្កើនសកម្មភាពផ្សព្វផ្សាយ និងត្រៀមផលិតកម្មវិធី ដែលរំលេចពីសក្កានុពលរបស់ខេត្ត ដើម្បីជំរុញការផ្សព្វផ្សាយឲ្យបានកាន់តែទូលំទូលាយថែមទៀតដល់ប្រជាពលរដ្ឋ។

លោកប្រធានមន្ទីរ បានបន្ថែមថា ការិយាល័យជំនាញទាំងអស់ត្រូវរៀបចំផលិតកម្មវិធីថ្មីៗ ពិសេសផលិតកម្មវិធី សក្កានុលពលខេត្ត ដោយផ្តោតសំខាន់លើតំបន់ទេសចរណ៍ វប្បធម៌ តំបន់រមណីយដ្ឋានប្រវត្តិសាស្ត្រ និងបេតិកភណ្ឌដូនតាដ៏អស្ចារ្យ ក៏ដូចជាវិស័យកសិកម្មលើម្ហូបសក្កានុពល គឺបង្កង និងពងទាកូន និងការផ្សព្វផ្សាយអំពីសមិទ្ធផលរដែលថ្នាក់ដឹកនាំដ្ឋបាលខេត្ត ដែលបានខិតខំប្រឹងប្រែងធ្វើការអភិវឌ្ឍខេត្តតាកែវ ឲ្យមានការរីកចម្រើនពីមួយថ្ងៃទៅមួយថ្ងៃឥតឈប់ឈរ ជាពិសេសផ្សព្វផ្សាយពីសា្នដៃ នៃការដឹកនាំរបស់រាជរដ្ឋាភិបាល ដែលបានប្រឹងប្រែងអភិវឌ្ឍន៍ប្រទេស និងការពារបូរណៈភាពទឹកដី ពីការឈ្លានពានពានរបស់បរទេស។

លោក ពៅ សុខន ជំរុញឲ្យមន្ត្រីព័ត៌មានទាំងអស់ ត្រូវបង្កើនល្បឿននៃការផ្ដល់ព័ត៌មានឲ្យបាន «ច្រើន សម្បូរបែប និងរហ័សទាន់ហេតុការណ៍» ហើយមន្ត្រីម្នាក់ៗ ត្រូវយល់ច្បាស់ពីតួនាទីខ្លួនជាមន្ដ្រីព័ត៌មាន ដែលមានតួនាទីជា «ស្ពានចម្លងព័ត៌មាន» រវាងរដ្ឋបាលខេត្ត និងប្រជាពលរដ្ឋ ដែលទាមទារឲ្យមានវិជ្ជាជីវៈ និងការទទួលខុសត្រូវខ្ពស់ សំដៅធ្វើយ៉ាងណាទទួលបានការជឿទុកចិត្តខ្ពស់ពីប្រជាពលរដ្ឋ នៅក្នុងខេត្តតាកែវ៕