អភិបាលស្រុកព្រៃកប្បាស ចុះពិនិត្យស្ថានភាពផ្លូវ ដែលលំបាកប៉ះពាល់ការធ្វើដំណើរ របស់ប្រជាពលរដ្ឋក្នុងឃុំតាំងយ៉ាប
22-05-2026 15:15
(តាកែវ)៖ អភិបាលស្រុកព្រៃកប្បាស លោក គិន ភក្ដី នៅព្រឹកថ្ងៃសុក្រ ទី២២ ខែឧសភា ឆ្នាំ២០២៦ បានដឹកនាំមន្រ្តីពាក់ព័ន្ធ ចុះពិនិត្យស្ថានភាពផ្លូវពីចំណុចខ្លោងទ្វាវត្តភ្នំចចក ចូលទៅឃុំតាំងយ៉ាប ដែលកំពុងជួបការលំបាក ក្នុងការធ្វើដំណើររបស់បងប្អូនប្រជាពលរដ្ឋ និងការធ្វើដំណើរទៅសាលារៀនរបស់សិស្សានុសិស្ស។
លោក គិន ភក្ដី អភិបាលស្រុកព្រៃកប្បាស់ បានថ្លែងប្រាប់ Fresh News ឲ្យដឹងថា ផ្លូវនេះកំពុងស្ថិតក្នុងការស្ថាបនារបស់នាយកដ្ឋានផ្លូវលំជនបទ នៃក្រសួងអភិវឌ្ឍន៍ជនបទ ក៍ប៉ុន្តែដោយសារតម្លៃប្រេងសាំងមានការកើនឡើងថ្លៃក៍ផ្អាកការជួសជុលមួយរយៈ។
បើតាមលោកអភិបាលស្រុកព្រៃកប្បាស បន្ទាប់ពីមានការអន្តរាគមន៍ ពីលោកអភិបាលខេត្តតាកែវ វ៉ី សំណាង ក្រុមការងារធ្វើផ្លូវនេះ គេនឹងដាក់គ្រឿងចក្របន្តការស្ថាបនាឡើងវិញ ចាប់ពីថ្ងៃស្អែកនេះទៅ។
ដោយឡែកលោក លីវ សំណាង ប្រធានមន្ទីរអភិវឌ្ឍន៍ជនបទខេត្តតាកែវ បានថ្លែងយ៉ាងខ្លីថា «ស្អែកឫខានស្អែកក្រុមហ៊ុនគេចូលអនុវត្តហើយ។ ហើយផ្លូវនេះ មិនមែនជាដែនសមត្ថកិច្ច មន្ទីរអភិវឌ្ឍន៍ជនបទខេត្តតាកែវទេ»៕
