(ព្រៃវែង)៖ លោក សួន សុម៉ាលីន អភិបាលខេត្តព្រៃវែង នៅរសៀលថ្ងៃទី២១ ខែឧសភា ឆ្នាំ២០២៦ បានដឹកនាំក្នុងកិច្ចប្រជុំត្រៀមរៀបចំ «យុទ្ធនាការ ១មុឺនរៀល ១មុឺននាក់» ឆ្នាំ២០២៦ សម្រាប់ខេត្តព្រៃវែង ដើម្បីជួយទ្រទ្រង់មូលនិធិគន្ធបុប្ផាកម្ពុជា ដែលប្រព្រឹត្តទៅ នៅសាលាខេត្តព្រៃវែង។

លោក សួន សុម៉ាលីន បានថ្លែងថា យុទ្ធនាការ «១ម៉ឺនរៀល ១ម៉ឺននាក់» គឺជាចលនាមនុស្សធម៌ដ៏មានសារៈសំខាន់ ដែលរៀបចំឡើងក្នុងគោលបំណងលើកកម្ពស់វប្បធម៌នៃការចែករំលែក និងការជួយគ្នាទៅវិញទៅមកក្នុងសង្គម។

លោកបានគូសបញ្ជាក់ថា យុទ្ធនាការនេះមិនត្រឹមតែជាការប្រមូលថវិកាប៉ុណ្ណោះទេ ប៉ុន្តែវាជាការបង្ហាញពីបេះដូង និងសាមគ្គីភាពរបស់ប្រជាពលរដ្ឋខេត្តព្រៃវែងយើងទាំងមូល។ ដូច្នេះ គ្រប់ផ្នែកពាក់ព័ន្ធត្រូវផ្សព្វផ្សាយឱ្យបានទូលំទូលាយ និងមានតម្លាភាពបំផុត។»

ជាមួយគ្នានេះ ​រដ្ឋបាលខេត្តព្រៃវែង ក៏បានអំពាវនាវដល់មន្ត្រីរាជការ កងកម្លាំងប្រដាប់អាវុធ វិស័យឯកជន មេត្តាចូលរួមគាំទ្រយុទ្ធនាការ «១ម៉ឺនរៀល ១ម៉ឺននាក់» ឆ្នាំ២០២៦ ឲ្យបានគ្រប់ៗគ្នា៕