(ព្រះវិហារ)៖ លោក ម៉ៅ សុផាន់ សមាជិកគណៈអចិន្ត្រៃយ៍គណៈកម្មាធិការកណ្តាល និងជាប្រធានក្រុមការងារថ្នាក់កណ្តាលចុះមូលដ្ឋានខេត្តព្រះវិហារ នៅថ្ងៃទី២១ ខែឧសភា ឆ្នាំ២០២៦ បានអញ្ជើញចុះពិនិត្យមើលវឌ្ឍនភាពការសាងសង់អគារស្នាក់ការថ្មីរបស់គណបក្សប្រជាជនកម្ពុជាស្រុកឆែប និងអគារស្នាក់ការថ្មីគណបក្សប្រជាជនកម្ពុជាឃុំឆែបពីរ។

អញ្ជើញអមដំណើរលោក ម៉ៅ សុផាន់ នាឱកាសនេះមានលោក ប្រាក់ សុវណ្ណ ប្រធានគណៈកម្មាធិការគណបក្សប្រជាជនកម្ពុជាខេត្តព្រះវិហារ និងលោក សំ លាងទ្រី សមាជិកគណៈអចិន្ត្រៃយ៍គណៈកម្មាធិការគណបក្សប្រជាជនកម្ពុជាខេត្តព្រះវិហារ និងជាប្រធានក្រុមការងារគណបក្សខេត្តចុះមូលដ្ឋានស្រុកឆែប លោក មិន សុីថា អនុប្រធានក្រុមការងារចុះមូលដ្ឋានស្រុកឆែប លោក ឃិត សុធារ៉ា ប្រធានគណបក្សស្រុកឆែប ព្រមទាំងថ្នាក់ដឹកនាំ និងមន្ត្រីគណបក្សជាច្រើនរូបទៀត។

ការចុះពិនិត្យនេះ គឺដើម្បីតាមដាន និងវាយតម្លៃអំពីដំណើរការសាងសង់អគារស្នាក់ការថ្មី ឱ្យប្រព្រឹត្តទៅតាមផែនការដែលបានគ្រោងទុក ប្រកបដោយគុណភាព សោភ័ណភាព និងប្រសិទ្ធភាព ដើម្បីបម្រើដល់ការបំពេញការងាររបស់គណបក្សនៅមូលដ្ឋានឱ្យកាន់តែល្អប្រសើរ។

ក្នុងឱកាសនោះលោក ម៉ៅ សុផាន់ ក៏បានថ្លែងណែនាំដល់ក្រុមការងារ និងភាគីពាក់ព័ន្ធ ត្រូវបន្តយកចិត្តទុកដាក់ពន្លឿនការសាងសង់ ដោយត្រូវធានាគុណភាពបច្ចេកទេស និងសុវត្ថិភាពការងារ ដើម្បីឱ្យអគារស្នាក់ការថ្មីនេះអាចដាក់ឱ្យប្រើប្រាស់បានតាមពេលវេលាកំណត់ និងក្លាយជាទីកន្លែងបំពេញការងារប្រកបដោយប្រសិទ្ធភាព សមស្របទៅនឹងការរីកចម្រើនរបស់មូលដ្ឋានស្រុកឆែប។

ក្រោមការណែនាំពីលោក ម៉ៅ សុផាន់ និងការដឹកនាំរបស់លោក សំ លាងទ្រី ប្រធានក្រុមការងារគណបក្សខេត្ត ចុះមូលដ្ឋានស្រុកឆែប អគារស្នាក់ការគណបក្សស្រុក និងអគារស្នាក់ការគណបក្សតាមឃុំ ត្រូវបានរៀបចំសាងសង់ថ្មីធ្វើអំពីបេតុងទាំងអស់ ដើម្បីបង្ហាញពីកម្លាំងសាមគ្គី បង្ហាញពីភាពខ្លាំងរឹងមាំរបស់គណបក្សប្រជាជនកម្ពុជា ក៏ដូចជាសម្រួលដល់ការធ្វើការងាររបស់មន្ត្រីគណបក្សផងដែរ។ អគារស្នាក់គណបក្សឃុំទាំង៨​ នៃស្រុកឆែប​ គ្រោងនឹងសាងសង់ឱ្យរួចរាល់ក្នុងឆ្នាំ២០២៨​ ផងដែរ។

សូមបញ្ជាក់ថា អគារស្នាក់ការថ្មីគណបក្សប្រជាជនកម្ពុជាស្រុកឆែប ដែលកំពុងដំណើរការសាងសង់នេះ មានទំហំ ៩ម៉ែត្រ គុណ ១៧.៥ម៉ែត្រ កម្ពស់ ២ជាន់ មានតម្លៃ ១៣មុឺនដុល្លា ដោយចាប់ផ្តើមសាងសង់នៅថ្ងៃទី០៥ ខែមីនា ឆ្នាំ២០២៦ គ្រោងនឹងបញ្ចប់ការសាងសង់នាពេលខាងមុខនេះ និងអគារស្នាក់គណបក្សឃុំឆែបពី មានតម្លៃ ២៥ ០០០ដុល្លារ ដែលជាអំណោយ លោក ម៉ៅ សុផាន់៕