(បន្ទាយមានជ័យ)៖ ពលករចំនួន៥៧នាក់ ត្រូវបានអាជ្ញាធរថៃ បញ្ជូនមកកម្ពុជាវិញ តាមច្រកទ្វារព្រំដែនអន្តរជាតិប៉ោយប៉ែត នៅរសៀលថ្ងៃទី២២ ខែឧសភា ឆ្នាំ២០២៦នេះ។ ក្នុងនោះ លោក ប៉ាន់ខែម ប៊ុនថន ប្រធានក្រុមការងារចុះមូលដ្ឋានក្រុងប៉ោយប៉ែត និងលោកឧត្តមសេនីយ៍ត្រី អ៉ី ចំរើន​ នាយប៉ុស្តិ៍នគរបាលអន្តោប្រវេសច្រកទ្វារអន្តរជាតិប៉ោយប៉ែត និងលោក គាត ហ៊ុល អភិបាលក្រុងប៉ោយប៉ែត ដឹកនាំសម្របសម្រួលការងារនេះផងដែរ។

លោកឧត្តមសេនីយ៍ត្រី អ៉ី ចំរើន បានបញ្ជាក់ថា នៅពេលដែលភាគីអាជ្ញាធរថៃ បានបញ្ជូនពលករខ្មែរចំនួន៥៧នាក់ (ស្រី២១នាក់ និងកុមារ៥នាក់) ក៏បានបញ្ជូនព័ត៌មានឲ្យអាជ្ញាធរកម្ពុជាដឹងមុន ហើយបានរៀបចំអាហារសម្រន់ នំប៉័ង ទឹកបរិសុទ្ធ និងភេជ្ជៈសម្រាប់ជូនពលករខ្មែរ ដែលត្រូវបានភាគីថៃប្រគល់ជូន តាមច្រកទ្វារព្រំដែនអន្តរជាតិប៉ោយប៉ែត ដែលឈមច្រកខ្លងលឹក ប្រទេសថៃ។

លោកបានបញ្ជាក់ថា អំឡុងខែឧសភា ឆ្នាំ២០២៦ អាជ្ញាធរថៃបានបញ្ជូនពលករខ្មែរចំនួន២លើក កាលពីលើកទី១ នៅកាលពីថ្ងៃទី៧ ខែឧសភា ឆ្នាំ​២០២៦ បានបញ្ជូនចំនួន៦៧នាក់ និងលើកទី២ ថ្ងៃទី២២ ខែឧសភា ឆ្នាំ២០២៦ បានបញ្ជូនចំនួន៥៧នាក់ ដែលអាជ្ញាធរកម្ពុជា បានទទួលកម្លាំងជំនាញរៀបចំនីតីវិធីដឹកបញ្ជូនទៅមណ្ឌលសំចត ហើយរៀបចំដឹកតាមរថយន្តជូនដល់លំនៅដ្ឋាន។

ក្រោយកម្លាំងជំនាញសាកសួរពលករខ្មែរ ដែលត្រូវបានអាជ្ញាធរថៃចាប់បញ្ជូនឲ្យអាជ្ញាធរកម្ពុជាទទួល មានពលករខ្លះបានចាញ់បោកមេខ្យល់ឆ្លងដែនដោយខុសច្បាប់ ទៅរការងារធ្វើនៅប្រទេសថៃ និងមានពលករខ្មែរមួយចំនួនធ្វើការងារនៅប្រទេសថៃ ត្រូវបានអាជ្ញាធរថៃចាប់បញ្ជូន ដែលឃាត់រយៈពេល១២ទៅ១៥ថ្ងៃ ទើបបញ្ជូនឲ្យអាជ្ញាធរកម្ពុជាទទួលនៅច្រកទ្វារព្រំដែនអន្តរជាតិប៉ោយប៉ែត៕