(កណ្ដាល)៖ កម្លាំងនគរបាលក្រុងអរិយក្សត្រ ខេត្តកណ្តាល បានតាមឃាត់ខ្លួនក្រុមក្មេងស្ទាវចំនួន៣នាក់ ដែលបានបង្កហិង្សាដោយបើកម៉ូតូទៅធាក់ជនរងគ្រោះបណ្តាលឲ្យដួលកាលពីថ្ងៃទី១៨ ខែឧសភា ឆ្នាំ២០២៦ នៅចំណុចតាមបណ្តោយផ្លូវកៅស៊ូលេខ70B ស្ថិតក្នុងភូមិព្រែកបង្កង សង្កាត់ព្រែកតាកូវ។

ពួកគេត្រូវបានសមត្ថកិច្ចស្រាវជ្រាវរហូតកំណត់មុខសញ្ញាឈានទៅដល់ការឃាត់ខ្លួនបាន នៅវេលាម៉ោង ១១យប់ថ្ងៃទី២០ ខែឧសភា ឆ្នាំ២០២៦។

លោកវរសេនីយ៏ទោ រស់ បាលីន អធិការនគរបាលក្រុងអរិយក្សត្រ បានប្រាប់ថា មុនពេលកើតហេតុ ជនរងគ្រោះបានជិះម៉ូតូម្នាក់ឯងម៉ាក​ NEX ចេញពីផ្ទះមកដល់ចំណុចកើតហេតុ ក៏ប្រទះឃើញជនសង្ស័យ៣នាក់ មិនស្គាល់ឈ្មោះ កំពុងធ្វើដំណើរជិះម៉ូតូមួយគ្រឿងម៉ាក ហុងដាឌ្រីម ពណ៌ខ្មៅ ជិះបញ្ច្រស់គ្នាទិសដៅពីខាងត្បូងមកជើង ពេលជិះហួសគ្នាបានបន្តិច ស្រាប់តែជនសង្ស័យទាំង៣នាក់ បានបត់ម៉ូតូត្រឡប់ក្រោយ រួចធ្វើសកម្មភាពធាក់ជនរងគ្រោះផ្តួល រួចជិះម៉ូតូគេចខ្លួនបាត់តែម្តង។ បន្ទាប់មកជនរងគ្រោះបានមកដាក់ពាក្យបណ្តឹងនៅប៉ុស្តិ៍នគរបាលព្រែកតាកូវ។

លោកថា ក្រោយទទួលបានពាក្យបណ្តឹងភ្លាម លោកបានបញ្ជាកម្លាំងជំនាញព្រហ្មទណ្ឌ អធិការដ្ឋានក្រុងសហការជាមួយកម្លាំងប៉ុស្តិ៍នគរបាលព្រែកតាកូវ បើកការស៊ើបអង្កេតស្រាវជ្រាវ និងពិនិត្យតាមកាមេរ៉ាសុវត្ថិភាពតាមដងផ្លូវ ក៏កំណត់មុខសញ្ញាបានច្បាស់ និងឈានទៅឃាត់ខ្លួនបានជនសង្ស័យទាំង៣នាក់ នៅវេលាម៉ោង ១១ថ្ងៃទី២០ ខែឧសភា ឆ្នាំ២០២៦ យកមកធ្វើការសាកសួរតែម្តង។

តាមរបាយការណ៍ ជនរងគ្រោះឈ្មោះ ច័ន្ទ វីដារ៉ា អាយុ១៥ឆ្នាំ មុខរបរលក់ដូរ មានទីលំនៅក្នុងភូមិព្រែកក្របៅ សង្កាត់ព្រែកអំពិល ក្រុងអរិយក្សត្រ ខេត្តកណ្តាល។ ជនរងគ្រោះរងរបួសក្រោមកែងដៃឆ្វេង និងរបួសក្រោមបាតជើង។

ចំណែកបក្ខពួកជនសង្ស័យទាំង៣នាក់ រួមមាន៖

*ទី១៖ ឈ្មោះ លី លាភហេង អាយុ១៤ឆ្នាំ ជាសិស្សថ្នាក់ទី៨ មានទីលំនៅបក្នុងភូមិព្រែកតាកូវ សង្កាត់ព្រែកតាកូវ ក្រុងអរិយក្សត្រ (ជាជនដៃដល់ធាក់ផ្តួលជនរងគ្រោះ)
*ទី២៖ ឈ្មោះ ណុល សុខលាភ អាយុ១៤ឆ្នាំ ជាសិស្សថ្នាក់ទី៦ មានទីលំនៅក្នុងសង្កាត់កើតហេតុ
*ទី៣៖ ឈ្មោះ សូរិយា ដាណា អាយុ១៦ឆ្នាំ ជាសិស្សថ្នាក់ទី៨ មានទីលំនៅក្នុងសង្កាត់កើតហេតុ។ វត្ថុតាងចាប់យក ទូរស័ព្ទដៃ ម៉ាក IPHONចំនួន ០១គ្រឿង។

នៅចំពោះមុខសមត្ថកិច្ចជនសង្ស័យបានឆ្លើយសារភាពថា ពួកខ្លួនទាំង៣នាក់ ពិតជាបានធ្វើសកម្មភាពធាក់ម៉ូតូជនរងគ្រោះផ្តួលពិតប្រាកដមែន ព្រោះដោយសារកន្លងមកបក្ខពួករបស់ក្រុមជនរងគ្រោះ ដែលរស់នៅក្នុងភូមិព្រែកក្របៅ សង្កាត់ព្រែកអំពិល ធ្លាប់មានទំនាស់ជាមួយនឹងក្រុមពួកខ្លួន។

បច្ចុប្បន្នជនសង្ស័យ រួមទាំងវត្ថុតាង​ បាននាំមកកាន់អធិការដ្ឋាននគរបាលក្រុងអរិយក្សត្រ ដើម្បីអនុវត្តតាមនីតិវិធី៕