(ព្រះវិហារ)៖ ក្រុមហ៊ុន ទ្រី ភាព អ៊ីមផត អិចផត សាខាស្រុករវៀង មានទីតាំងស្ថិតនៅស្របបណ្តោយផ្លូវជាតិលេខ ៦២ មានចម្ងាយ២៣០គីឡូម៉ែត្រ ពីរាជធានីភ្នំពេញ ស្ថិតនៅភូមិអូរពោធិ៍ ឃុំរមណី ស្រុករវៀង ខេត្តព្រះវិហារ បានទទួលសិទ្ធិប្រទានពីរាជរដ្ឋាភិបាល តាមរយៈអនុក្រឹតលេខ៨២ អនក្រ. បក ចុះថ្ងៃទី១១ ឧសភា ២០១១ លើផ្ទៃដីសរុបចំនួន៤,៨០០ហិកតា។

តាមការបញ្ជាក់ពីបណ្ឌិត ហេង សំណាង អគ្គនាយករងក្រុមហ៊ុន ទ្រី ភាព គ្រុប ទទួលបន្ទុកកសិឧស្សាហកម្ម និងជាប្រធានក្រុមហ៊ុនទ្រីភាព អ៊ីមផត អ៊ិចផត សាខាស្រុករវៀង ជាប់ព្រំប្រទល់ខេត្តកំពង់ធំ បានឲ្យដឹងនៅថ្ងៃទី២២ ខែឧសភា ឆ្នាំ២០២៦នេះថា ចំការទុរេនក្រុមហ៊ុន ទ្រី ភាព មានចំនួន៥០ហិកតា ដែលមានអាយុកាលដាំ៥ឆ្នាំ ដែលចាប់ផ្តើមប្រមូលផល ឆ្នាំទី១ចាប់ពីពេលនេះតទៅ ។

លោកបន្តថា ក្នុងពេលប្រមូលផលទុរេនឆ្នាំទី១ បានប្រហែលពី៧០តោន ទៅ៨០តោន ហើយឆ្នាំបន្តនឹងកើនជាបន្តបន្ទាប់ ហើយពូជទុរេននេះជាពូជទុរេនខ្ទិះសាច់ល្អ ដែលរឹង ខាងក្រៅទុនខាងក្នុង។ ចំពោះបងប្អូនជាអតិថិជនមានបំណងចង់ជាវយកទៅលក់បន្ត រឺចង់ទិញហូបជាលក្ខណៈគ្រួសារ សូមមកទិញផ្លែទុរេននៅចំការទុរេនក្រុមហ៊ុន ទ្រី ភាព និងមានលេខទូរស័ព្ទទំនាក់ទំនង២ខ្សែដោយខ្សែទី១មានលេខ០៩៦ ៩៧៦ ៥៤៩២ និងខ្សែទី២ មានលេខ ០៩៧ ៩១១ ៩៩៩៦ ឬមកថតរូបលេងកម្សាន្ត ឬថតទុកជាអនុស្សាវរីយ៍ក៏បាន ។

លោកបន្តទៀតថា ផ្លែទុរេនក្រុមហ៊ុន ទ្រី ភាព គឺបរិសុទ្ធល្អមិនមានប្រើប្រាស់ជីគីមី ឬប្រើប្រាស់ត្រាំថ្នាំអ្វីទេ ប្រសិនបើបងប្អូនទិញយកទៅហូបមិនធ្វើឲ្យប៉ះពាល់ដល់សុខភាពឡើយ។ ចំពោះផ្លែទុរេន គឺបេះផ្លែនៅទីនេះសុទ្ធសាតមិនមានការក្លែងបន្លំនោះទេ មកដល់ដើមបេះយកទៅតែម្តង ហើយផ្លែទុរេននេះគឺពូជផ្លែទុរេនទឹកដោះគោស្ងួត។

លោកស្រី ហេង ស្រីណែត ជាអ្នកទិញយកទៅលក់បន្ត នៅផ្សារទ្រីភាព បានបញ្ជាក់ថា ផ្លែទុរេនក្រុមហ៊ុន ទ្រី ភាព ជាប្រភេទផ្លែទុរេនខ្ទិះសាច់ល្អ ដែលរឹងខាងក្រៅទុនខាងក្នុងល្មួត ហើយយផ្លែទុរេននេះ គឺកាត់ពីដើមផ្ទាល់ៗតែម្តងមិនមានការក្លែងបន្លំអ្វីទេ ឬយកពីខាងក្រៅឡើយ។

លោកស្រី រ៉ា គន្ធា អ្នកមកលេងចំការលើកឡើងថា ផ្លែទុរេននេះមានរសជាតិឆ្ងាញ់ មិនប្រើប្រាស់ជីគីមី និងបានឃើញផ្ទាល់ភ្នែកមានទំនុកចិត្តពិសេស បានលើកស្ទួយផលិតផលក្នុងស្រុក ក៏ដូចជាលើកកម្ពស់ជីវភាពប្រជាពលលរដ្ឋផងដែរ។ លោកស្រីបញ្ជាក់ថា ទោះបីមានថវិកាតិចតួចអាចទិញហូបមួយផ្លែពីរផ្លែក៏បាន ឬមកថតរូបលេងកម្សាន្ត ក៏បានដើម្បីបំបាត់ការអផ្សុកផងដែរ៕