(កណ្តាល)៖ បុរសម្នាក់បានស្លាប់ភ្លាមៗ ក្រោយរថយន្តទឹកសុទ្ធមួយគ្រឿងបុកពីក្រោយពេញទំហឹង បណ្តាលឲ្យខ្ទាតផ្លោងជាច្រើនម៉ែត្រ ខណៈតៃកុងបើកទ្វារត់គេចខ្លួនបាត់ស្រមោល។ ហេតុការណ៍នេះ បានកើតឡើងនៅវេលាថ្ងៃត្រង់ ថ្ងៃទី២២ ខែឧសភា ឆ្នាំ២០២៦ នៅត្រង់ចំណុចភ្លើងស្តុបK11 លើផ្លូវជាតិលេខលេខ២១ ស្ថិតនៅភូមិព្រែកសំរោង៣ សង្កាត់តាខ្មៅ ក្រុងតាខ្មៅ ខេត្តកណ្ដាល។

សមត្ថកិច្ចបានបញ្ជាក់ថា មុនពេលកើតហេតុ គេឃើញរថយន្តមួយគ្រឿងម៉ាក HYUNDAI ប្រភេទដឹកទំនិញធុនធំ ពណ៌ខៀវ ពាក់ផ្លាកលេខ ភ្នំពេញ 3E-2651 អ្នកបើកបរមិនទានស្គាល់អត្តសញ្ញាណ (គេចខ្លួន) បើកបរតាមបណ្ដោយផ្លូវជាតិលេខ២១ មានទិសដៅពីជើង ទៅត្បូង លុះដល់ចំណុចកើតហេតុក៏បានបុកពីក្រោយម៉ូតូមួយគ្រឿងម៉ាក HONDA DREAM ពណ៌ខ្មៅ ពាក់ផ្លាកលេខភ្នំពេញ1CD-6570 អ្នកបើកមានឈ្មោះ ជួន សុខហៀង ភេទប្រុស អាយុ ៤១ឆ្នាំ មានទីលំនៅភូមិក្នុងព្រែក ឃុំព្រែកគយ ស្រុកស្អាង ខេត្តកណ្ដាល (ពាក់មួកសុវត្ថិភាព មានកញ្ចក់មើលក្រោយ) ម៉ូតូបើកបរមានទិសដៅពីជើង ទៅ ត្បូង (ស្របទិសគ្នា)។

មូលហេតុបណ្ដាលមកពីអ្នកបើកបររថយន្ត បើកបរក្នុងល្បឿនលឿនខ្វះការប្រុងប្រយ័ត្ន មិនបានពិនិត្យមើលស្ថានភាពផ្លូវនៅខាងមុខ ឲ្យបានច្បាស់លាស់ពេលកំពុងបើកបរ។ សាច់ញាតិជនរងគ្រោះស្នើសូមសមត្ថកិច្ចស្នងការដ្ឋាននគរបាលខេត្តកណ្តាល បើកការស្រាវជ្រាវ និងតាមចាប់ជនបង្កហេតុយកមកផ្តន្ទាទោសតាមផ្លូវច្បាប់៕